#الرضيعفي ليلة 10 محرم
على لسان السيدة الرباب (ع)
لا مو حلو اعليك الموت
اتنام ابمهد مو تابوت
عبدالله يبني يالولد
بعدك صبح خالي المهد
&&&&&
عبدالله يبني الذبح مو للترفين
بالسهم كطعوا نحرك او دمك ساح
يوليدي ورده جان أبوك ايسمِّيك
ابجف لازم انته تنقطف مو بـ ارماح
إلسهم من كطَّع نحر ينزف ياس
بالركبه ما شاف النبي الهادي لاح
يوليدي شو مالك صوت
اتنام ابمهد مو تابوت
يالشوفك ابطعم الشَّهَد
بعدك صبح خالي المهد
&&&&&
عبدالله راسه ازغير كد جف الإيد
بس المصيبه ارماحهم كلها اكبار
يرضع رمح و ايموت ما شاف النوم
إلركبه ترفه و السهم كلش حار
معروفه للرضَّع يفصلون اكماط
بس هوه عبدالله ابدِمَه امكمَّط صار
ابدال العَذِب سهم ايفوت
اتنام ابمهد مو تابوت
ودَّعتَكَ الله يا ضُمَد
بعدك صبح خالي المهد
&&&&&
إلسهم يكطع لك نحر يبني ليش ؟!
يالنحرك امن الهوه أترف ابهواي
نحرك شفت ينزف ضُوه موش ادموم
و الورد ينحب شفته عبدالله اوياي
إلعلكمي من شاف كلبك عطشان
يا ويلي ناده و انكِسر كلب الماي
كلبي اعله وضعك مفتوت
اتنام ابمهد مو تابوت
من إيدي ضَيَّعْت السَّنَد
بعدك صبح خالي المهد
&&&&&
نايم على التربان يا وجه الخير
و تستاحش أدريك انته لو مرِّ الليل
استقبلته عبدالله السهم لمَّن جاك
و أنطيته نحرك و انته مهدود الحيل
يوليدي كل خوفي اعله جسمك ينداس
و اكماطك انته ايجلِّب ابحافر خيل
بـ اعيوني إسمك منحوت
اتنام ابمهد مو تابوت
راح السَّعَد راح السَّعَد
بعدك صبح خالي المهد
&&&&&
لبكدك اينام ابحضن مو عالكاع
بثنينهن بس انته ما شفت النوم
أمك دللول العطش تقره ابصوت
إتكول يمكن إبني عبدالله ايكوم
إشفافك انته امن العطش ذبلانات
هم شايف امن الماي واحد مفطوم
يونس أنا و انته الحوت
اتنام ابمهد مو تابوت
للسبي دلاَّلي استعَد
بعدك صبح خالي المهد
&&&&&
اتشَيْعك فراشات الصبح منِّ اتطير
و اكماطك امن السهم صاير مفتوكـ
مالت ركبتك والظَّهَر يبني مال
او منِّ السهم يا يُمه شفتك مخنوكـ
عبدالله يبني الـ حضني شو ما حنّيت ؟!
إنته النِّده او بالخيل شفتك مسحوكـ
يالأحله منِّ الياقوت
اتنام ابمهد مو تابوت
يوليدي ما غيرك مدد
بعدك صبح خالي المهد
&&&&&
خادم الرباب (ع) : إبراهيم الدريس