قناة خطباء المنبر الحسيني للقصائد

#الزيارة

نزلة للمشّايه



يمشّايْ ساعد الزّهره
يمشّايْ خُطْوِتَكْ نُصره


بالدَّرُبْ إمشي ولا يْهِمَّكْ تَعَبْ
لْيمشي ناجِحْ لاچنِ الگاعد رسَبْ
وٱذكُرِ شْما تتعبِ وْ مشيَكْ صُعَبْ
"قد أحبَّ اللهُ مَنِّ اِحْسينَ اَحَبْ"

يمشّايْ تنفَعِ الذّكره
يمشّايْ ساعد الزّهره


الخُطوه تِنفَعْ يومَ لا يَنْفَعْ أحَدْ
من تشوفِ الوالده تْعوفِ الولدْ
كل غُلامِ اِلْسّيّده تْشوفه گِصَدْ
وْ تَحَتْ رِجلِ احْسين كل خادم گعَدْ

يمشّايْ ما يضيعَ اَجْره
يمشّايْ ساعد الزّهره


محلى صوتِ الموكبِ المِنْ تُوصَلَه
قَوْلُهُمْ فيهِ : "هله وْ مِيَّةْ هله"
وِبْثوابِ احْسين كل خطوه إله
توّه مولود اِلْيزورِ بْكربله

يمشّايْ ذنبكِ يْغُفْره
يمشّايْ ساعد الزّهره


بْهالدَّرُبْ إسحگِ وْ خَلْ عندك يقينْ
بْبابْ صحنه واگفه أمِّ البنينْ
تْصيحْ يا مِيَّةْ هله بالزّائرين
"أدخلوها بسلامٍ آمنين"

يمشّايْ حيلكِ تْجُرّه
يمشّايْ ساعد الزّهره


شي أكيدِ المهدي حاضر بالمسيرْ
يِنظُرَ اَوَّلْ زايرِ وْ ذاكه الأخيرْ
يْگول بِطْويريجْ لو شافِ النّفيرْ
مثل هالرّكضه لَمَنْ أظهَرْ تِصيرْ

يمشّايْ مْهَنَّدَكْ حَضْره
يمشّايْ ساعد الزّهره


يگصدِ الجدّه وْ عُيونه كالغمامْ
وِبْزِيارةْ وارثِ يْزورِ الإمامْ
شْواط سبعه يْطوف مهدينا المقامْ
وْ تنزفِ دْموعه دمه وَيْ كل سلامْ

يمشّايْ مْحَزَّمِ بْخضره
يمشّايْ ساعد الزّهره


إدعي للما زار وِگْليبه ٱحْتِرَگْ
يالعشگتِ اِحسينْ هم هذا عِشَگْ
ياما حَنِّ يْزورْ گلبه وْ ياما دَگْ
بَلّغِ الغالي سلامِ الگلبه طَگْ

يمشّايْ ناره مِسْتَعره
يمشّايْ ساعد الزّهره.



واللهُ وليّ التّوفيق

#الزيارة
#شوق_الاربعين
#الاربعين

حمّلتكم يا راحلين لكربلا
متناً به ضمَّنتُ كل شجوني

فإذا وصلتم للحبيب ألا اسألوا
ماذا جنيتُ لكي تخيب ظنوني؟!

ماذا جنيتُ أرى الاحبة كلهم
وصلوا إليه وخلفهم تركوني...

طوبى لهم قد سَطرت أسماءهم
كفُّ الحبيب وأدرجتهم دوني...

لطفاً ايا أهلَ المفازةِ بلّغوا
قلب الحسين النازف المشحونِ

أَني سعيتُ إليه دون تلكؤٍ
لكن رجعتُ بخيبةِ المغبونِ

حتى جُننتُ فهل سيتركني تُرى
أمدا بعيداً غارقا بجنوني؟؟؟

حسين يحيى الحاج

#الاربعين
#الزيارة

لزيارة الاربعين

خطوه خطوه لكربلا مشايه
بأسم مهدينه ترف الرايه
وآحسيناه   وآحسيناه
★★★★★
هاذي ساعات المشي وأيامه
كل محب ماتنوصف آلامه
خطوه خطوه. ماتمل اجدامه
راية المهدي ترف گدامه
وي الزمن يبقه عطرها احچايه
بأسم مهدينه ترف الرايه
وآحسيناه.  وآحسيناه
★★★★★
للضريح وهيبته. وانواره
گلوب ملهوفه ودمع يتجاره
درب ابواليمه عظيمه أسراره
كل كتر هبت جميع انصاره
ابراية الحب تعتني ألوَفايَّه
بأسم مهدينه ترف الرايه
وآحسيناه.  وآحسيناه
★★★★★
للذبيح امسلبات أثيابه
نمشي ودموع الهظم سچابه
يوم عدنه واجب استحبابه
نشارك الحجة بعظيم امصابه
النصرة الدين الهدف والغاية
بأسم مهدينه ترف الرايه
وآحسيناه   وآحسيناه
★★★★★
اربعين حسين ربنا  اختاره
ثابت أجره  وماتزول آثاره
الف حجة أنكتبت  الزوَّارَه
وشوكه بعيون العده الغداره
وبيها ماتنعد معاني اهوايه
بأسم مهدينه ترف الرايه
وآحسيناه.  وآحسيناه
★★★★★
راية الحق واضحه ومعلومه
بأسم آل المصطفى  مختومه
وراية الباغي  تضل  مهزومه
راية الشر خاسره و ملمومه
وراية الحق بالوفه محَنْايَّه
بأسم مهدينه ترف الرايه
وآحسيناه.  وآحسيناه
★★★★★
أَحْزَانَّه اتلاگت تصُبّْ بأحزانه
صاحب الطلعه الرشيده ويانه
بوسط گلبه لوعته ونيرانه
يذكر حسين وعطش رضعانه
وچف گطيعه. للحرم  رَوَايَّه
بأسم مهدينه ترف الرايه
وآحسيناه    وآحسيناه
★★★★★
المجد عَطَّرْ جبينه وباسه
الشامخ الحق ابعبير انفاسه
الثبت الدين الحنيف وساسه
الفوگ رمح الظلم شالوا راسه
الراس رتل آيه بعد الآيه
بأسم مهدينه ترف الرايه
وآحسيناه  وآحسيناه
★★★★★
كل سنه الذكرى الأليمة انعيدها
اجموعنا عطر الولاية ايزيدها
ملحمة حق  الإمام ايريدها
وصرخه بوجوه الحقد ترديدها
ورايه للحق ترف للحق هايه
بأسم مهدينه ترف الرايه

الشاعر حسن لعيبي الحريشاوي

https://youtu.be/HxjWD4_TF58

#الزيارة
#شوق_الاربعين

رُوحِي تِحِنِّ لْكَرْبَلَه مِشْتَاگَه لِلْحَضْرَه
هَجْرَكْ صَعُبْ مَا يِنْحِمِلْ يَا مُهْجَةِ الزَّهْرَه
مَالِي غِيرَكْ....مَالِي غِيرَكْ

يَالْعَايِشِ بْگَلْبِي جَرِحْ وَدِّينِي يَمْ بَابَكْ
مِشْتَاگَ ازُورَكْ وِالْگَلُبْ ذَايِبْ عَلَى غْيَابَكْ
مِثْلِ الْعَلِيلَه أَنْتِظِرْ وَاتْنَطَّرِ جْوَابَكْ
يَمْتَه أَصُبَّنْ دَمْعِتِي وَاشْوَاگِي بَاعْتَابَكْ
إِعْطِفْ تَصَدَّقْ سَيِّدِي عَالْعَاشِگِ بْنَظْرَه
هَجْرَكْ صَعُبْ مَا يِنْحِمِلْ يَا مُهْجَةِ الزَّهْرَه
مَالِي غِيرَكْ....مَالِي غِيرَكْ

هَاذَه ارْبَعِينَكْ يِقْتِرِبْ وِايْهَدِّمِ بْصَبْرِي
خَايِفْ يَبُو الْيِمَّه انْحُرُمْ مَا أَحْتِمِلْ تِدْرِي
لُو تِمْشِي جَدْمِي لْكَرْبَلَه لُو تِعْتِنِي لْگَبْرِي
دُونَكْ فَلَا رِيدِ الْعُمُرْ يَا أَغْلَى مِنْ عُمْرِي
حَلَّفْتَكِ بْرَاعِي الْعَلَمْ وِبْزِينَبِ الْكُبْرَى
هَجْرَكْ صَعُبْ مَا يِنْحِمِلْ يَا مُهْجَةِ الزَّهْرَه
مَالِي غِيرَكْ....مَالِي غِيرَكْ

مَعْقُولَه مَا أَمْشِي إِلَكْ وَاحْزَانِي تِحْدِينِي
وِمْنِ الطُّفُولَه لْخِدْمِتَكْ نَاذِرْهِنِ سْنِينِي
صُوتِ الْمَوَاكِبْ وِالْخَدَمْ أَسْمَعْ يِنَادِينِي
تِرْضَاهَه كَسْرَةْ خَاطِرِي يَا قِبْلِتِي وْدِينِي
مَا ظَنِّي تِتْرِكْنِي تَرَه لِلْوَنَّه وِالْحَسْرَه
هَجْرَكْ صَعُبْ مَا يِنْحِمِلْ يَا مُهْجَةِ الزَّهْرَه
مَالِي غِيرَكْ....مَالِي غِيرَكْ

يَبْنِ الزِچِيَّه فَاطِمَه يُومِيَّه أَتْحَسَّرْ
وِابَّالِي مَا لَحْظَه أَبَدْ فَارَگْنِي هَالْمَنْظَرْ
وَاگُفْ عَلَى بَابِ الصَّحَنْ يَمَّكْ يَبُو الْأَكْبَرْ
أَبْچِي وْدُمُوعِي هَامِلَه وَاسْتَقْبِلِ الْخِدَّرْ
مَحْلَه السُّجُودِ بْعَتْبِتَكْ مِنْ تِطْفَحِ الْعَبْرَه
هَجْرَكْ صَعُبْ مَا يِنْحِمِلْ يَا مُهْجَةِ الزَّهْرَه
مَالِي غِيرَكْ....مَالِي غِيرَكْ

الشاعر حسن خنافر العاملي

#الزيارة
#شوق_الاربعين


كلها راحت كربلا
وآنه بس المارحت سيدي بحيره طحت
آنه مشتاك الك يااباعبدالله

اعترفلك ياحبيبي وگلبي يتگطع ألم
يمكن المانع ذنوبي اينزّل الذنب النقم
يمكن ابإيدي ولساني زيدت نار الخيم
تمتلي عيني حرام وانحرم من الحرم

هالبعد استاهله
هالجنايه جنايتي من حدت عن غايتي
اشكي الفراك الك يااباعبدالله

سيدي استغفرلي ربك ياحسبن اتوسلك
ميت انه بلا طفوفك واحيا بس ارجع الك
كل وكت ادعي ولعلها دعوتي بمره ملك
خلني اتوفق وازورك المهم بس اوصل الك

هاللقاء اتأمله
سيدة كل النعم وگفتي اباب الحرم
اروي الاشواك الك يااباعبدالله

ياحسين انت حياتي وحاشا احيا بلا حسين
فرگتك معناها موتي وماكو دنيا بلا حسين
گرت العين بضريحك عيني عميه بلا حسين
كربلاءك جنه شنهي الجنه هيه بلا حسين

كربله جنه عُلا
وانت لو عني رضيت وانه مثل الحر اجيت
گلبي خفاك الك يااباعبدالله

للشاعر عبدالله السقاي

#الاربعين
#الزيارة
#في_الخدمة_المقدسة
#الأربعينية

أنوي الزيارةْ لغربتكْ
قبّل حبيبي تربتَكْ
وانظرْ منارة قبتكْ
وجدّد عهود الأربعينْ

أدخل مقامَكْ يا الغريبْ
واذكرْ مصابكْ يا السليبْ
وخدّك على الغبرةْ تريبْ
ودمّك عشيبكْ والجبينْ

أمشيلك وروح المقامْ
واقرأ تراتيل السلامْ
سلّم على ثالثْ إمامْ
واذرفلهْ دمعاتِ الحنينْ

امسحْ عشباكِ الضريحْ
وابكي بِرُوحي همْ أصيحْ
من أذكرِ مصابِ الذبيحْ
أنحب وَنَادي يا حُسين

قلك يا غالي آنا جيتْ
وبظلّك حْسين احتميتْ
يا سيدي بروحي ارتجيت
أرفع دعائي باليَدينْ

#زينب_فياض
#عظم_الله_أجورنا_وأجوركم

#الاربعين
#الزيارة
#شوق_الاربعين

(على لحن يالناصر ما الك للرادود علي فارس)

شُوقِ الأربعينْ
نُوصَلْ زايرينْ
نقصدْ كربلا
وما نترُكْ حسينْ

ننظرْ للمقامْ
نهتفْ يا إمامْ
نلبِّي دعوتَهْ
ونْرِدّ السّلامْ..حُسين.
&&&&
بَيْنِ المَشهَدِيْنْ
بَيْنِ الجَنَّتينْ
قلبي مَسْكَنَهْ
عبَّاس وْحُسين

للحَضْرَاتْ أَهِيمْ
زُورِ الأربعينْ
وَاسي فاطِمةْ
وْمَهدينَا العظيمْ..حُسين.
&&&&
آهِ لْشوفِتَكْ
وشَمَّة تُربتَكْ
ودَعوَة مُستجيرْ
أَسْفلْ قُبِّتَكْ

آهَاتِ العَزَاءْ
أصو‌اتِ البُكاءْ
أشو‌اقْ وحَنِينْ
نِرْسِلْهَا بندَاءْ..حُسين.
&&&&
مِنْ أرضِ النَّوى
أشواقِ الهَوى
تِسعَى للحسينْ
تُوصَلْ نينوى

حَسَرَاتِ القُلُوبْ
خُطُوَاتِ الدُروبْ
قَلبي يِحْتِرِق ْ
شَمْعَاتَهْ تِذُوبْ..حُسين.
&&&&
رُوحِي تُقْصِدَكْ
تُوصَلْ مَشْهَدَكْ
تِبكي بالنَّحِيبْ
تُنصُبْ مأتَمَكْ

تِذرِفْلَكْ دُمُوعْ
تِحْنيلَكْ ضُلُوعْ
تُضوِي هالطَّريقْ
للمَهْدي شُمُوعْ..حُسين.
&&&&
لِلْمهديْ سَلَامْ
مِنْ بُعْدِ المَقَامْ
مِنْ تُوصَلْ تِزُورْ
أَوْصِلِّي السَّلَامْ

إِشْرَحْ حَالِتِي
إِسْكِبْ دَمعِتِي
للمَولَى حُسين
أَرسِلْ قُبْلِتِي..حُسين.
&&&&
#زينب_فيَّاض
#عظم_الله_أجورنا_وأجوركم

#الاربعين
#الزيارة

بِيدِي رَايَه...گَاصِدِ لْشُوفَةْ حَبِيبِي بْأَرْبَعِينَه
بِيدِي رَايَه...آنَه وَاصْحَابِي بْدَرُبْ حُبَّه مِشِينَه
-----------------------
آنَه مِنْ عَامَ انْتِظِرْ مِنَّه الْإِشَارَه
بْگَلْبِي لِحْسِينِي فَلَا تُبْرَدْ حَرَارَه
عِينِي مِشْتَاگَه تِصِدْ گُبَّه وْمَنَارَه
وِشْكِثُرْ رُوحِي تِحِبْ هَايِ الزِّيَارَه
كَرْبَلَاءَه...خَلَّتِ عْيُونِ الْمُحِبْ لَجْلَه رَهِينَه
بِيدِي رَايَه...آنَه وَاصْحَابِي بْدَرُبْ حُبَّه مِشِينَه
-----------------------
أَمْشِي أَيَّامِ وْلِيَالِي بْهَاذَه دَرْبَه
يِشْهَدَ الله شْگَدْ أَوِدَّه شْگَدْ أَحِبَّه
كِلْمَنِ يْحِبِّ الْحُسِينِ يْحِبَّه رَبَّه
صَارَ ابُو الْيِمَّه تَرَه لْعِشَّاگَه كَعْبَه
لِلْهِدَايَه...هُوَّه مِصْبَاحِ وْغِدَه أَسْرَعْ سَفِينَه
بِيدِي رَايَه...آنَه وَاصْحَابِي بْدَرُبْ حُبَّه مِشِينَه
-----------------------
هَالشَّعِيرَه حَيِّرَتْ أَرْبَابِ الَافْهَامْ
سُفْرَه مِنْ أَرْبَعْ جِهَاتِ وْكِلْهَه إِطْعَامْ
بْكِلْ كِتُرْ گَاعِ الْعِرَاقِ انْتِرْسَتِ خْيَامْ
وِالْكُرَه الْأَرْضِيَّه صَارَتْ كِلْهَه خِدَّامْ
بِالْمَوَاكِبْ...تِلْگَه شَايِبْ مَا گِدَرْ يِخْفِي وِنِينَه
بِيدِي رَايَه...آنَه وَاصْحَابِي بْدَرُبْ حُبَّه مِشِينَه
-----------------------
يَا حَلَاهَه مْنَ اسْتِمِعْ صُوتِ الْمَوَاكِبْ
هَمْ (عَسَاكُمْ مَا تِعَبْتُو) يَالْحَبَايِبْ
(يَا هَلَه بِيهُمْ) دِلِيلِي بِيهَه ذَايِبْ
هَالزِّيَارَه ثَامِنَه بِينِ الْعَجَايِبْ
هَالزِّيَارَه...أُمْنِيَةْ كِلْ عَاشِگِ وْلَهْفَةْ حَنِينَه
بِيدِي رَايَه...آنَه وَاصْحَابِي بْدَرُبْ حُبَّه مِشِينَه
-----------------------

#صفر_١٤٤٤هج
حسن خنافر العاملي

#الاربعين
#الزيارة

#قصائد_المشايه
#زيارة_الاربعين
حماسيه

ثوار         ثوار   واهل المرجله
زوار         زوار    جينه الكربله
وحسين كَاصدينه
وبدمنه اربعينه
........................................
كل عام نكَصد كربله ابيوم اربعينه
يطلبنه دم وبالعزه نوافيله دينه
مشايه نمشي ونذرف الدمعه الحنينه
نذكر رقيه الما اجت وي الضعينه
بدموع        بدموع            وبحركَة سنه
مفجوع     مفجوع           كل شيعي اعتنه
نشعر ما وفينه
وبدمنه اربعينه
........................................
رايه بدينه اترفرف وزايد عزمنه
ماعفنه اهلنه لا اجو ويانه اهلنه
شيب وشباب وكل فرد للطف تعنه
واهناك  يستقبلنه وابصحنه يلمنه
لحسين          لحسين  لو نوصل زحف
كل حين       كل حين     دمعه وما تجف
احنه العاشكينه
وبدمنه اربعينه
........................................
تنطوي يم قبره الارض  وتزوره كلهه
حته الملائك تجتمع واتلم شملهه
سبعة سموات التجي ابكامل شكلهه
كل خلق ربنه ابكربله  الخالق جعلهه
مشاي        مشاي     أرضين وسمه
عناي          عناي     تحظر مأتمه
بايامه الحزينه
وبدمنه اربعينه
........................................
دك صدرك ابدرب العشك واوجع ضلوعه
للطفو اشموعه ابضمه اشعل شموعه
من الجفن دم ابجي لا موبس دموعه
ينحني ظهرك بالحزن واعلن خظوعه
بالصوت         بالصوت     نبراتك حزن
للموت             للموت  خل كَلبك يون
للغالي اشنطينه
وبدمنه اربعينه
........................................
حين النصل يم كَبته نقراهه التحيه
بكل انضباط ابصحنه كون وعسكريه
قائد امام وعسكري  وسيد البريه
لبيك نهتف ياحسين انت الهويه
بحماه        بحماه نهتف هالعهد
وياه            وياه وبرغم  الشدد
لو كَطعوهه ادينه
وبدمنه اربعينه

الشاعر
ياسر العارضي

#الاربعين
#شوق_الزيارة
#الزيارة

فائزي شوق لزيارة المولى الحسين عليه وآله السلام

مشتاق أزورك ياللي ظل جثه بلا راس
بالرمح راسه والجسد بالخيل ينداس

كل عام اعقد نِيِّتِي وانوي الزياره
وابقلبي يا سبط النبي لهفه او حراره
مشتاق أشاهد قبتك ويه المناره
اوبعدك اروح ابلهفتي واتعنى عباس

مشتاق أزورك يالذي حزوا وريده
اوقطعوا ايادي جثته اوهم خنصر ايده
ماظل عضو إلا اوصابته طعنة حديده
وابحافر الخيل انتثر جسمك ينبراس

مشتاق أزورك يالذي سِلْبَوا حريمه
اوراحت على ظهر الهزل اخته العظيمه
كلما تون طقها الرجس نسل اللئيمه
اوظلت عقب ذاك الخدر مابين لرجاس

مشتاق أزورك يالذي قادوا عليله
ابدرب اليسر ياحسرتي فوق الهزيله
شمر اوخَوَلَّه اوحرمله فَطَّرْ دليله
والجامعه ابعنقه اويون رحموني ياناس

مشتاق أزورك يالذي أَسْرَوا بناته
اومجلس يزيد ابن الخنا طبت خواته
واقبل يناشد بالضحك ويه الشماته
هاذي بنات المرتضى من غير حراس

مشتاق أزورك يالذي بالطشت راسه
ابضرب الحديد ابن الخنا كَسَّرْ اضراسه
اوينظر خواته اميسره اوينبع احساسه
لمن تنادي ام الخدر يا راعي لحساس

مشتاق أزورك يالذي وسط الخرابه
نامت اعياله ياوسف فوق الترابه
اوقتلوا رقيه اِبْنَيِّتَه ذيچ العصابه
جابوا الراس اوشافته اولفضت الأنفاس



رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي
السيد موسى الأحسائي
صفر 1444 هـ

فهرس ١٤٤٤ ه‍ـ 📚
لمتابعة ما تم نشره حتى الآن على قناة خطباء المنبر الحسيني من قصائد جديدة لعام ١٤٤٤ ه‍ اضغط على الهاشتاغ 👇

#محرم_الهلال
#محرم_الخروج
#الخروج_من_مكة
#محرم_النزول
#محرم_العليلة
#محرم_مسلم
#محرم_الاصحاب
#محرم_القاسم #ليلة_القاسم
#محرم_الاكبر
#محرم_العباس
#الرضيع
#ليلة_العاشر
#العاشر
#ليلة_الحادي_عشر
#وداع_الاجساد
#السبي #الشام
#الدخول_الى_الكوفة
#الدفن
#السيدة_رقية
#شهادة_السجاد
#الحسن_المجتبى
#الاربعين
#شوق_الاربعين
#الزيارة
#الرجوع_الى_المدينة
#الرسول_الاكرم
#الشهداء

ملاحظة:لا تنسى تصفح فهرس ١٤٤٣ه‍ـ للمزيد من القصائد المميزة
https://t.me/manbarhoysayne1/24664