كعديه للسيده زينب عليها السلام
°°°°°°°°°°°°°°°°°°°°°°°
الماله اخوان ما ينهاب يا شيعه
اليموت بغربه فاهي يصير تشييعه
اروي قصتي وصبري
من مهدي لحد گبري
اليموت بغربه فاهي يصير تشييعه
°°°°°°°°°°°°°°°°°°°°°°°
انه زينب اروي قصتي حين وافتني المنيه
جنت اتنومس بخوتي ومتت مامروا عليه
جنت اتمنى بوفاتي الكفيل يسبل اديه
حسين يقرالي العديله وبيده يگطرلي اميه
تمنيت امي ام الحسن
بجفوفها تلفلي الجفن
ونسوان هاشم يلطمن
وينصبن ليه عزيه
هوسات وعراضه اخوتي يشيعوني
وبيديهم بني هاشم يدفنوني
اموت بغربه ما ادري
من مهدي لحد گبري
اليموت بغربه فاهي يصير تشييعه
°°°°°°°°°°°°°°°°°°°°°°°
آنه صبر ايوب مني والجبل مني ثباته
الله خله بصبري آيه وجعل بيه كل صفاته
يا بشر يحمل مصايب بأول سنين بحياته
ويابشر مثلي تحمل غربته حتى بمماته
بأول سنيني تيتمت
من جدي وامي نحرمت
وبصباي حيدر شاهدت
طبرته الختمت صلاته
شفت جبد الحسن من انمرد بالسم
وجبد حسين شفته بكربله تثلم
وصبرت على الكفل خدري
من مهدي لحد گبري
اليموت بغربه فاهي يصير تشييعه
°°°°°°°°°°°°°°°°°°°°°°°
بعد واقعة الطفوف تكفلت عيله سبيه
ورافجت جتال اخوتي مو رضا غصبا عليه
مشيت درب الما مشيته ودخلت ديوان اميه
الزيد احزاني وشجوني بالقصر ماتت رقيه
من حسين مستحيه من ارد
لو عنها يسألني شرد
اعدااه تحصد بالورد
اطفالنه شبعوا اذيه
ياهو البيه صبر الصابنه يحمله
واني امشي دفنت بيديه جم طفله
جنازه خلص عمري
من مهدي لحد كبري
اليموت بغربه فاهي يصير تشييعه
°°°°°°°°°°°°°°°°°°°°°°°
يوم رديت المدينه وشفت بيتي طافي نوره
اعلنت بيها حدادي واشعلت للثار ثوره
اني والسجاد نخطب گمنه كلمن اخذ دوره
نحجي مضلوميه صارت بينه والطاغي وجوره
والي المدينه من سمع
ليزيد دز يحجي الوضع
لو بقت زينب ترتفع
اصوات شيعتها الغيوره
جواب يزيد اجانه وجان مضمونه
شكو هاشمي عليه بيته يحركونه
لو زينب تجي لقصري
من مهدي لحد كبري
اليموت بغربه فاهي يصير تشييعه
°°°°°°°°°°°°°°°°°°°°°°°
رحت للشام بدمعتي وعلي وعبد الله ويايه
وانفرض نسكن بغربه حالنه حال السبايه
تحملت واجرعت مرها وهالسنه طالت هوايه
تخيلو مسمومه اموتن اي نعم هاي النهايه
لا ناعيه ولا صايحه
لا بيرغ ولا فاتحه
هاي النهايه الجارحه
غربتي تنهي الحكايه
لا يمي مره تغسلني لو تثغب
وشماته اباب بيتي من الفرح تطرب
لله سلمت امري
من مهدي لحد گبري
اليموت بغربه فاهي يصير تشييعه
°°°°°°°°°°°°°°°°°°°°°°°
ب
🖋️العلويه زهراء الموسوي
___________لااجيز
❌❌❌حذف الاسم والتلاعب بالكلمات
https://t.center/azm20001982
