🎵🎼گُلوَنی💥Laki🎶🎶

☝️☝️❤️
#داستان_لری
#قسمت_هفدهم

هوفِم رت
دَس و پام بورّسن دِه رکو
رتم دم در گوتم: س س سلام جناب سروان بفرمایید امری داشتیت؟
- سلام خانم! بی زحمت چادرتون بزنیت توک سرتو ، باید رِمو اداره شهربانی
- سیچی جناب سروان؟ اتفاقی افتائه؟
- اوچه سیتو توضیح مِیم!
رتم لباسیامه پوشیم ، بوئم گوت: روله! بیام دِه بات؟‌ گوتم: نه! چییِه نی! احتمالا سی تکمیل پرونده اومانه سراغم
مین رَه جناب سروان رحیمی گوت: رازونه خانم! ببخشید که مزاحمتو بیم ، خداشاهده اصلا دوس ناشتم وا ماشین شهربانی بیام در حونتو ، ولی بازپرس دادگستری مجبورم کرد ، هرچَن مه سی خاطر احترامی که سیتو قائلم دستبند وتو نَزم
- دستبند سیچی؟ مَر مه چی کردمه!
- چطوری سیتو بوئم که ناراحت نویِت! حقیقتش بِهایت غلومرضا میرَه سابقتو فوت کرده ، یعنی کُشتنشه! کی کُشتشه ایما هم ناونیم ، هِه سی یِنه بازپرس حکم جلب شمانه دِئه ، اَلوَت مه مطمئنم که شما روحتو هم خَوَر ناره دِه ایـ قضیه!
یِنونه که گوت ، تَش دِه سرم رت ، هِه مِنسی وا گولَه زَنه دِه مین جگرم ، خدایا یعنی کی غلومرضانه کشته ، غلومرضا هرچی هم آدم گَنی با ، دِه حق هیچکس گَنی نکرده ، ایما وا کسی دشمنی ناشتیم
ایقه گِریوسم که اَسر دِه چَشیام نَمن ، همش تخصیر مه بی ، اَر مه کمی تحمل میکردم غلومرضا ویـ وُل بُنسا نمیمرد!
گوتم: جناب سروان! وه جون دخترم مه شِکم نمیرسه دِه ایـ قضیه!
- دونم خوئرم ، امیدخدا قاتلش پیدا موئه.
رتیم دادگاه ، قَری سوال جواو دِم کردن ولی شکرخدا وَرَز یَه که بُورنم وه زندان قاتل پیدا بی
فقط یه لحظه دِه لا در دیمش ، زینه سی و دو سه ساله بی ، بعدا فَمسم که صیغه غلومرضا بیه و وا ماشین غلومرضا مواد قاچاق کردنه ، بعد طلاق مه غلومرضا بردشه حونه خومو و سر پیل تریاک وا یَک بینه وه قی ، زینه هم فقط یه گولَه زِئه مین سینه غلومرضا و کُشتشه
غلومرضانه آوردن آبادی و خاکش کردن ، خیلی سیش گِریوسم ، هرچی با بوئه دخترم بی ، نِزیک یازده سال چه تَل و چه شیری وا یَک زندگی کردیم ، خدا مابین دوس ناشتم ناخونش هم بَشکیه!
ولی دِه یه لا همه فَمسن که تخصیر مه نئیه ، حتی گُلبانو هم دِم حلالیت گرت ، گوت: روله کُرم حلال کو
گوتم: دِما بارو کَپَرکی! اوسه که میاسی دَس منو کُرت بیری ، آو کردی دِه لیزمو! ایسه دِه!
حلالتو کردم کِچی!

#ادامه_دارد...


‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️❤️
#داستان_لری
#قسمت_شانزدهم

زنگ زَم وه بوئم
گوتم: بیا دادگاه هام ایچه!
فقیر وا گورچِنگ اوما! وَختی که چَشش هَرد وم گوت: سیچی اوماییه دادگاه؟
گوتم: بوئه دِه فایده ناره! سِخونیام سیه بینه! هرچی سِغ و دِغ هَردم دِه بَسه! دلم خوشه سایه میرَه ها بالا سرم! میرَه چِنینه هِه ناشتوئیش بیتره! پا پَتی بیتر دِه کاله تَنگه!
دادخواست طلاق نوشتم و رتم حونه ، وَرَز یَه که غلومرضا بیا ، چیام جَم و جیل کردم رتم وه آبادی
صُو ایواره که دادخواست طلاق رَسس وه دَس غلومرضا اوما وه آبادی کرد وه قی و مِرّو!
تفنگ کَشی وه بوئم ، رتم وه مین رَش گوتم: اَلوات! دِه کِـه تا ایسه بیه وه تفنگچی که مه ناونم؟ اَر پیایه هیسی خو بَزه!
عاموم و عاموزام دِه حونه کردن وه در ، قَری بَرد زَن دِش ، او هم قَری شَنگ هوایی وَن و جِست!
حالم خیلی گَن بی! شُو شوم نَهردم ، خوم و پینه رتیم مین اتاق قدیمیم ، سرش نیام ریـ دَسم ، قَری گِریوسیم و هوفتیِم
پینه گوت: دالکه! دِه نمیها روئم مدرسه؟ آخه صُو دیکته داشتم!
گوتم: مین فکرش نویی روله! هِه دِه مدرسه ایچه نومت مینویسم ، تازه بَچون آبادی خیلی بَچون خویی هیسن ، همشو فامیلون خومونن ، بیر بوفت تا صُو وا یَک رِمو مدرسه...
سر صُو بردمش مدرسه و خومم رتم دادگاه ، مهریه م نیام دِه اجرا ، اوسه چِل هزار تِمه بی ، تا چَن روز یه پام دِه آبادی بی یه پام دِه شهر
افسر شهربانی خیلی کمکم میکرد که کاریام بِفتن جلو ، وش میگوتن جناب سروان رحیمی! وه قاضی گوت: ایـ خانم محترم هرروز دِه آبادی میا وه شهر ، کارش رَه بو! قاضی هم دستور دَه وه جناب سروان گوت: ایسه که خیلی هایی دِه فکرش ، حکم توقیف ماشین میرَشه نوشتمه رو دِه زیر پاش دِرارش!
بعد دوساعت وا ماشی اوما ، وه سَرواز گوت: ماشینن بُور پارکینگ
غلومرضا هم پشت سرش اوما دادگاه هرچی لالک و هاس کرد محل وش ننیام!
ماشینن فروختم و پیلش وَنم دِه بانک
روزیا سختی داشتم ، بوئم پیر و اِشکسه بی ، غیر بوئم پشت و پناهی ناشتم ، فقط خدا کمک کرد که خدابس دِه چی زیتِری نِوی! ناونم شاید دلش سیم میسوخت و عذاو وژدان داشت...
دِه حونه اسیر بیم ، وه در نمیومام ، طاقت سِیل کردن مردم آبادینه ناشتم ، خیلی گَن سِیلم میکردن
تا یه روز که در حونه زِنِس ، بوئم رت درن واز کرد
گوتم: بوئه کیه؟
گوت: افسر شهربانیه! جناب سروان رحیمی!
خیلی سیم عجیب بی ، مه دِه کاری دِه دادگاه ناشتم ، یعنی سیچی اومائه؟

#ادامه_دارد...🦋


‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️❤️
#داستان_لری
#قسمت_پانزدهم

گلبانو غلومرضانه دِه رَه وَن
دِه هیچوَخت او پیا سابق نِوی! رفتارش مشکوک بی ، هِه مِنسی زینه هَنی هاسه ، کار وا کارمو ناشت ، خیلی وَخت بی که وه پینه محبت نمیکرد ، بعضی شُویا نمیوما حونه ، وختی هم وش اعتراض میکردم چارتا چَک جایزه میگرتم ، پینه وا ایـ رفتاریا بوئش افسرده بی ، هیچ حسی نسبت وه بوئش ناشت
خوم وا پیلیا بوئم سیش دفتر و قلم و کیف خَرّیم و دِه دِه مدرسه نومش نوشتم ، مدرسه کمی دِه حونه دیر بی ، سر صُو موئردمش ، ظهر هم میرتم سراغش ، درسش خو بی ، معلم خیلی دوسش داشت ، خوشحال بیم ، دوس داشتم ایقه درس بونه که آینده روشنی داشتوئه ، نه چی خوم که هِه دِه بَچیی بدبخت بیم و آرزو درس و مَشخن بردم وه گور...
غلومرضا یه پاش دِه شهر بی یه پاش دِه آبادی ، خَوَر دِه کار و بارش ناشتم ، اَلوَت دش هم نمیپرسیم ، شایدم اصلا سیم مهم نِوی!
جَوونیمه نیام دِه نِتارش ، وا همه چیش ساختم ، بوئه بدبختم گُردالشه سی بی عرضگی کدخدا غلومرضا فروخت! هرچی خویی وش کردم حرومش!
تصمیم گرتم ایسه وه دِما کار وا کارش ناشتوئم
دَرسیا کلاس اوّلن بَلَل بیم ، کتاویا زیاد تغییر نکرده بین ، خط وه خط کتاون دِه حفظ بیم ، آخم سی اوسه که نِشتنم درس بونم ، وا پینه تمرین میکردم ، دوس داشتم دِه همه بَچو سرتر با ، هرچی آرمو و آرزو داشتم و وشو نرسسم ، دوس داشتم پینه وشو برسه...
کم کم قی و مرافه منو غلومرضا هم شِرو بی ، غَرجی حونه ناشتیم ، پیل کِرا حونه ناشتیم ، حتی پیل ناشتم که دفتر و قلم سی پینه بسونم ، انگشترم فروختم که صِحاو حونه وه در نونم...
آغا غلومرضا وا کادیلاک میرَت وه آبادیشو و ایواره میوما حونه ، ناونم پیل ایـ کادیلاکن دِه کجا آورده! اصلا هِن خوشه یا نه! یه گِل هم که دش پُرسیم جواوم نَده! وش گوتم: اَر ایقه پیل داری که کادیلاک مشکی بسونی ، سیچی پیل قلم و دفتر دخترت نِمیی؟
چِنو بست بیخ گوشم که وا سر رتم مین شیشه تلویزیو
دِه فایده ناشت...
"دَس اِشکسـه کار میکـه ولی دل اِشکسـه نه..."
رتم دادگاه و درخواست طلاق دَم

#ادامه_دارد...🦋



‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️
#داستان_لری
#قسمت_چهاردهم

بالاخره بعد یه هفته
گلبانو خانم تشریفش برد وه حونه درّمسه خوش!
حتی تا لحظه آخر هم چی دُمرکول نیشم میزَه! دَم در دَس وَن دِه مِل غلومرضا و گِریوس! اَسر دِه چَشیاش تاف میکرد چی اُور بارو! انصافا خیلی قشنگ هم نقش بازی میکرد! یعنی فِک بکم اَر فردین و بهروز وثوق دِش تست میگرتن میتونس بیترین آرتیست ایران با! چی آو هَردن میتونس دِه فیلم مَمل آمریکایی که او موقه تازه اومائه بی وه بازار نقش دا گوگوشن بازی بکه!
خدا نه شاخ وه خر بِیه نه دِنو وه قورواق! مه خو دونِسم هدفش چینه! میهاس غلومرضانه هوایی بکه که وِرگرده آبادی ، مِنه طلاق بِیه و خوئرزا تُرشسه خوشه بَنیه وش! ولی مَر دِه خاوت بئینی ، گلبانو شلیته! هِیسه هیشتمه دخترم بدبخت بکی!
دیـ یه هفته که گلبانو اومائه بی حونمو ، غلومرضا هم سر کار نمیرَت! نشسه بی مین حونه و وه دِرویا گلبانو گوش میکرد! هرچی بیکِشکی وش گوتم: عزیز دلم! برار بوئم! وِریـ رو سر کار و بارت! ایـ پیا عاشوق چَشیات نی! وا توکپا اخراجت میکه!
ولی سی کی بُویی! دِه گوشش نرت که نرت!
آخرش هم بعد یه هفته رت سرکار ، بعد نیم ساعت وِرگشت! جومَش دِرّسه بی!
گوتم: هَه!! کدخدا غلومرضا!!!
پیا اخراجت کرد واش بیئی وه قی؟ چَنی وت گوتم رو وه سر کارت! ایسه بیا بـور دِه ایـ کاسه وِرت!
دونس که حق ها وا مه! هیچی نگوت!
تا دوماه بیکار بی! بوئه فقیرم سر زمینیا مردم گَنم دِرو میکرد و گوپی نو میاورد سیمو!
آغا غلومرضا آو گَشته دِه لَغرویاش ، پشت کرده وه کار چی زَنی نشسه دِه لا حونه! اَلوَت سه چار گِل هم رت سراغ کار ، ولی کار گیرش نمیوما ، صِحاو حونه هم گِر گِر میوما سی کِرا حونه! دلش سی دخترم میسوخت اَنی هِه زیـ جول و جامونه پرت میکرد مین کیچه!
آخرش هم خوم وه خدیجه زینه هُمسامو گوتم ، میرَش شوفر مینیبوس بی ، مین خط شهرک وه شهر کار میکرد ، غلومرضانه  برد وا خوش ، غلومرضا کمک شوفر بی! ماشینن میشُشت ، کِرا مسافریانه جَم میکرد و آو یخ میدَه وه دَس مسافریا
فقیر کارش سخت بی! ولی نونی بی که خوش سی خوش پخته!
کم کم پینه هم گَپ بی و موقه مدرسه رتنش بی...

#ادامه_دارد...🦋


‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️❤️
#داستان_لری
#قسمت_سیزدهم

گوتم: غلومرضا هـا سر کار
گوت: وا غلومرضا چارم؟‌ اومامه سرنافونه بَچم ، سِقه سرش بام ، هـا کجا؟
- ها دِه خاو ، تازه شیر هَرده و هوفتیه
رت مین اتاق دِه گاواره دراوردش ، سِیلی دش کرد گوت: ایـــ !! ینه خو دختریه؟ چَنی هم وا خوت و بوئت بُرده! سِه پِتِش چَنی قئینه! عَه سیچی کُلپیچکش نکردیه؟ سِکو سِکو! سیچی خمیر نَوَنیه مین ریش! سیچی می کِز نَدئیه بونی مین نافش! سِکو گِئش چَنی باد کرده؟ ژیره و رازونه نهردیه؟ کسی جوجوش سیت دوروس نکرده؟ حتما صُو تا ایواره هم نوژی و نُخه و لوبیا هَردیه؟
ایقه گوت! ایقه گوت! که اعصابم هیرد بی هاسم وا توکپا بونمش وه در! خو تو هم چی هُسیرون مردم میومایی تِه بِییت! درد هسیرون دخترون مردم وه جونت!
گوتم: چرا! زن عامو همه ایـ کاریانه کرده! دَسش درد نکه! منتبارشم دِه ایچه تا حونه خدا!
تیه پیسه وِم کرد ، گوت: نومش چینه؟
- پینـه!
- پینه؟؟ اَری حونه بوئه مه درّمیه! پینه هم بی وه نوم؟ حتما خوت و بوئت نومش نیایته؟
- نه! کُر خوت نومش نیائه! اَر دِه سؤالیه سَختیه سفارشی ناری تا روئم کُهنیاشه بشورم!؟
- چَشیام روشه! مِنی زونت درازتر بیه! کُرم آوردیه وه غَریوی! صُو تا شُو فَرمو بُوره سی مردم سی چار قِرو پیل که تو دختر دِه بارش بکی؟
دِه طاقت نیاوردم! دخترم گرتم بغل و رتم مین اتاق ، سرم نیام ریـ زونیم و گِریوسم...
غلومرضا دِه سر کار اوما
تا چَشش هَرد وه داش دَس وَن دِه مِلّش
- سلام دالکه! خوش اومایی
- سلام روله! قدم دخترت هم مارک با! اوسه که مَش کبری طالع سیت گرت ، گوت: بچه اوّل غلومرضا کُریه! ناونم چطور طالع کُرم سوخت که بچش بی وه دختری!
غلومرضا لُوگَزه وه داش کرد که چِنی نُو!
گُلبانو رت مین آشپزخونه غِرّی آورد گوت: نوم خدا! سِقه کُرم بام یخچالی هم سیش خَرّیه!
وش نگوتم بوئه فقیرم گُردالش فروخته سیمو خَرّیشه! دوس ناشتم غلومرضا دِه نِها داش خیت با...
غلومرضا بیکشکی وم گوت دِه حرفیا دام ناراحت نویی ، دایایَـه! حرفش دِه کلوم خدا نی!
گُلبانو تا چَن روز مَن دِه حونمو!
کم کم اخلاق و رفتار غلومرضا هم عوض بی!
ناونم گُلبانو چی وه بُن گوشش گوت که غلومرضا بی وه پیایه هَنی!
دِه چی زیتری دِه کاریا کمکم نمیکرد! غذا دِه کافه نمیاورد! میگوت: غذا کافه خو نی! غذا دِه حونه سیم دوروس کو!
چطور تا دوش غذا کافه خو بی! ایسه که دات اومائه غذاش کثیف و گَن بیه؟

#ادامه_دارد...🦋


‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

👆👆
#داستان_لری
#قسمت_یازدهم

کم کم وه روزیا زایمو نزیک بیم
خیلی زَلَم دِه زایمو میرَت! دام سر زایمو مُرد ، ننم همیشه میگوت روله! بوئتو طالع گَنی داشت! اَر دات دِه سر سیاوش نمیمُرد ایـ ملاکت نمیوما بالا سر بَچونش!
هروَخت وه زائسن فِک میکردم چارستون بدنم میوما دِه رکو
دِه همه مهمتر پیل هم ناشتیم
نزیک یه ماه بی که خَوَری دِه بوئم ناشتم! کسی هم نِوی که خَوَری دِه آبادی سیم بیاره! خیلی دل ناگرو بیم ، بوئم همیشه هفته دو گِل میوما تِم! یا شِهامه دَمشه وه دَس خوت! مه غیر بوئم کس و کاری نارم!
بالاخره یه روز سر صُو بوئم دِه لا پیداش بی
دَس وَنم دِه گردنش و ماچش کردم
گوت: اَی! اَی!
- چت بی بوئه؟
- هیچ! هیچم نی روله
- عَه کجا بیه؟ یه ماهه سر وا دیارم نیاوردیه؟ هیچ نگوتی رازونه بی کس و کاره؟
- روله! گرفتار بیم ، نتونسم بیام ، بَوَخش روله! بیا! انجیر بَنی سیت آوردمه ، دِه وِنو که خیلی دوس داری!
- اوفیش! دست درد نکه بوئه ، دِه کجا دونسی بیزَه انجیر دارم؟
- فِک کردیه فقط دایا دِه ایـ چیا بَلَلن؟
هردوتامو افتائیم وه خَنه! خیلی روز خویی بی!
خیلی خوشحال بیم و خدانه شکر میکردم که سایه بوئم ها بالا سرم
موقه که هاس روئه یه دَسه پیل دِه جیو کُتش دراورد دَه وم گوت: روله! ایـ پیلیانه بیر یخچالی واشو بسو ، بقیشون هم قایم کو سی روز زایمونت ، دَس میرَت خیلی تنگه ، خراوشو نکی که پیل بمونه مین دَس و بالت
گوتم: بوئه! یِنونه دِه کجا آوردیه؟
گوت: کاری وا ایـ کاریا ناشتو
هوار کشیم سرش! گوتم: کلایی اسکندر! مه دِه ایـ پیلیا نمیهام! راسش بُو بینم چی کردیه؟ هم دوارته چی قدیم وا روسَم رتیه دُزی؟ حتما ایـ انجیریانه هم وا ایـ پیلیا سیم خریدیه؟
سرش وَن وه هار گوت: روله! وه خدا حلالن ، مه توووئه کردمه! مَر لیوام مال حروم بیارم سی بچونم
ایقه وش اصرار کردم تا بالاخره جومَشه زَه بالا
پَلیش چَن یه بِگِس تِلیشِسه بی!
- حونم درِمس! وا کی قی کردیه؟ کی کارچو زِئه مین پَلیت؟
- قی نکردمه ، رتم تیرو ، بیمارسونی اوچه بی دُگدُر خارجیه مینش بی ، وا یکی دِه رفیقونم رتم گُردالمه فروختم
اوّلش باورم نِوی! فک کردم قی و مرافه کرده! آخه مَر گُرداله هم فروشیه؟ ولی وَختی که ایـ همه پیلِن مین پاکت دیم مطمئن بیم که حرفش راسه
گوتم: بوئه سیچی چِنی کاری کردیه؟
گوت: روله! مه خیلی گَنی دِه حقت کردمه ، ریـ سیاهم که مال و منالی نارم کمکت بکم ، خومم هیچم نی ، دُگدُر گوت هِه وا ایـ یه گُرداله تا آخر عمرت راحت میتونی زندگی بکی..
چِنو گِریوسم که اَسر دِه چَشیام نمن! بوئم سی خاطر مه جونش نیا دِه نِتار! تازه فَمسم که بوئم چَنی دِه هولِم بیه

#ادامه_دارد...🦋



‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️
#داستان_لری
#قسمت_دهم

غلومرضا نِشس لا راننده
مه هم نشسم ایلانش ، مین دلم ساز دهل بی! دو دَسماله میباختم و خومه شَوا میکردم! اوفیش! ریم دِه مین ریـ گلبانو افتا!
اوسه که ماشی افتا وه رَه ، گُلبانو هوار کشی و غلومرضانه هِنا کرد!
هوووو غلومرضاااااا؟
غلومرضا گوت بِس! راننده چِنو وا پا کوفت سر ترمز که سرم گوت پِروووووق!‌ زَه دِه مین شیشه!
غلومرضا وه راننده گوت: حونت درّمیه! گوتم بِس! نگوتم سخونیامون هیرد کو!
دِه ماشی دِروما رت تِه داش!
خدایا یعنی چی میها وش بوئه! پشیمونش نکه!
🐞
گلبانو ایقه چِنه درازی کرد که کاملا ناامید بیم!
غلومرضا اوما وه راننده گوت: بیا کمکم یخچالن بون وه هار!
عَه براره! خر گوزنی مال وِرگشت!
مه چَنی شانسم گَنه! ایسه چه خَرّه بیرم وا کپو؟
جو دِه دلم نِوی که سِیلشو بکم! دَس دِه گِئم گرتم و رتم نشسم جلو ماشی ، سرم نیام سر زونیام و سی بخت گَنم گریوسم
بعد گِرّی راننده اوما نشس جلو ماشی! مه دِه ماشی دِرومام! غلومرضا اوما نِشس ، وه مه هم گوت بیا بَشی تا رِمو!
باورم نِوی! مِنسم هام دِه خاو! وش گوتم چی بی؟؟ هیچی نگوت!
هَرچَن بعدا فَمسم که داش وش گوته: ایسه که هیشتیم و رتی ، یخچالم بون وه هار!
عیو ناره! اَر صُو تا ایواره آوجوش بـورم ، هَنی بیتره دِه ایچه!
دِه آبادیمو تا شهر یه ساعت رَه بی! جَده خاکی بی و پُرش دِه چال و بَرد بی! تا رَسسیم وه شهر چِنو دلم درد گرت که هاسم بگریوم
ولی بالاخره رسسیم! بالاخره دِه جهنم جِستم!
دِه بَچیی دوس داشتم حونمو دِه شهر با! غلومرضا حونه پشت ایسگا قطار کرا کردی! حونه قدیمیه بی ولی سی مه دِه قِلایه هم بیتر بی
زندگیمو سخت بی! هیچی ناشتیم! درآمد غلومرضا خیلی کم بی ، ایقه بی که فقط تونسیم کِرا حونَن واش بِییم ، ولی بوئم فقیر صُو تا شُو دِه آبادی مین زمینیا مردم کارگری میکرد و گوشت و میوه میاورد وه شهر سیم!
اعتیاد داشت ولی ایقه غیرت داشت که دِه تریاکش بگذره که دخترش دِه آسایش با...

#ادامه_دارد...

‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️
#داستان_لری
#قسمت_نهم

گوتم: گارسون! بیسواد
چِنو خَنس که لَغرویاش دِه پِتش درومان!
خومم بعد چَن ماه خَنه گَشت وا لُویام! حتی اَر زندگی سختی هم دِه شهر داشتوئم و تنگی تَلی بکشم ، بیتر دِه ایـ جهنم و هُمنشینی وا دا غلومرضائه...
وه غلومرضا گوتم:
- سِکو! وه دات که نگوتیه قراره دِه ایچه رِمو؟
- نه! هِیسه وش موئم
- مَر لیوه ای! بِیل یه گِلی موقه که هاسیم چیامونه بزنیم دِه بار ، وش بُوئیم که سوپرایز با و بفهمه که کُرش چَنی گَپ بیه و ایقه غیرت داره که دَسش ها دِه درکِل خوش و نیاز وه کسی ناره!
غلومرضا خوشحال بی ، گوت: آفرین وه مَزگت! هِه چِنی خوئه!
🐞
اوفیش! سِقه خدا بام! تونسم گولش بِیم! اَر وه داش میگوت حتما پشیمونش میکرد و نمیهیشت رِمو
سرصُو وِریسام و قایم قایمکی و بیکِشکی چیامونه نیام دِه کارتو! وا بَن و کَش و پَرّو و هرچی که دَم دَسم بی ، محکم بَستمشو
او روز سر شانس گَن مه ، گلبهار و بَچونش هم دِه حونمو بین ، دو سه گِل نزیک بی گلبهار بیا مین اتاق و قَضیَنه بفهمه! وا هر مصیبتی بی جَم و جورش کردم
تا ایواره همه اَسباو و اثاث حونن جم کردم
غلومرضا اوما گوت: سِکو ایچه! همه ایـ چیانه خوت جم کردیه؟ عَه هیچ فک نکردی بلایی میا سر بچه؟
واقعا هم راس میگوت ها! ایقه دِه هَوس جِستن بیم که دِه ویرم رت باردارم
او شُو حتی یه دییقه هم خاو دِه چَشیام نرت! خداخدا میکردم که هرچی زیتر اَفتاو دِرا و رِمو!
"بار کنیت تا بار کنیم دیـ مُلک دلگیر😔"
سرصُو غلومرضا رت سر کَل ، نِیسون کیویی آورد
درن واز کرد ، نِیسو عقب عقب اوما وامی ، مه هم چیا سوئکن آوردم نیام جلو تارمه
گُلبانو اوما مین هُوش گوت: غلومرضا؟ ایـ نِیسو سیچی اومائه؟
- دالکه! دونی چینه؟ حقیقتش کاری دِه شهر گیر آوردمه ، حقوقش خوئه ، بیتر دِه ایچنه! حونه هم کِرا کردمه
گلبانو گوت: ایسه باید وه مه بُویی؟ بی عقل خدا! زینه گولت دَه؟ نِشس وه زیر پات که دالکت بِیلی و رویی؟ خَرّه هفت تژگا دِه کپوت! زَه وه زور!
رت مین آشپزخونه و رو رو گِریوس! غلومرضانه وا چیا مشغول کردم که نیا مین آشپزخونه و منصرف با
اوسه که همه چیانه نیایم دِه ماشی و وا قَرس بستیمشو ، وه رسم ادب رتم مین آشپزخونه گوتم: حاله گُلبانو! ممنون و مِنتبارتم ، ایـ مدت همه زحمتیامو دِه سرت بین ، امیدخدا زیـ زیـ میایم سر میزنیم وت
گوت: رو گُم با شِلیته! دومی! قاو رنگ کرده! خیلی بچه تر دِه ایـ چیایی که وه مه  مَتلک بشونی!
گوتم: حاله! اَروا دام مَتلک نَشَنم! ایـ حرفیا چینه!
گوت: خدا سیت نسازه! رویی پشتاپشت ماه صفر! واگذارت کردمه وه امیرالمامنین! ایـ کارت تقاص میکم!

#ادامه_دارد...🦋

‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️
#داستان_لری
#قسمت_هشتم

مین ایـ مدت
وه تَنیا چییه که فِک نمیکردم بچه داری بی!
چِنو اعصابم هیرد بی که هاسم دوارته خودکشی بکم
وه فاطی گوتم رو دِه دات بپرس باید چی بکی که بچه بَکِنیه؟
وه دُو رت وا یه مُشت زعفرو اوما ، گوت: دام گوته آوجوش بون دِه سر یِنو بعد گِرّی بـورش! بیکِشکی مین آشپزخونه دوروسش کردم و یه هِناسه کشیمش بالا
رتم مین اتاق و چِنو مین اتاق نیام وه دُو و غِرّ آوردم که شَل و شَکت افتام وه زَمی ، فاطی گوت: وا ایـ کاری که تو کردی مطمئنم بچه کِنسه! گوتم: خدا دِه زونت بَشنوئه! هَرچن گناه کبیرا! ولی خدا خوش دونه که مه مجبورم! کسی که بی کس و کاره و پشت و پناهی ناره نباید بچه هم بدبخت بکه!
روزیا وه رِقاد و گَن گَن سپری بین ولی بچه نَکنس هیچی! روز وه روز هم گِئم قِیی تر میبی!
کم کم دِه هوکارَش بیم! بی وه کُل کس و کارم! شویا تا روز واش پِژاره میکردم ، دِه کارم پشیمو بیم ، دِه خدا طِلو بخشش کردم و توئه کردم که دَفه هَنی چِنی کارینه نکم
وَختی که غلومرضا فَمس باردارم ، یه روز خوش تَنیا اوما حونمو وه بوئم گوت: دِه کاری که کردمه پشیمونم ، دوس دارم زینم ورگرده حونمو ، وا درس و مَشخش هم مشکلی نارم! اصلا هرچی که رازونه بوئه قبول میکم! مه خیلی رازونن دوس دارم و حاضرم سی خاطرش هرکاری که شما بوئیت بکم
ایسه دِه موقش بی که ورگردم! هرچی با غلومرضا بوئه بچمه و آینده ایـ بچه ها دِه دس غلومرضا
بوئم فرسناش مین اتاقم که خومونی وا یَک حرف بزنیم ، وَختی که اوما مین اتاق گوت: اَر دوس ناشتم رویی مدرسه سی یِنه بی که دوس ناشتم معلم مدرسه سرپَتی بئینت! تو ناموس مِنی! سی پیا لُر هیچی مهمتر دِه ناموسش نی
وَختی وه حرفیاش فک کردم فَمسم که حق ها واش! آخه او زَمو قانون میگوت که دخترو باید سرپَتی و بی حجاب روئن مدرسه ، مه هم دختر شی کرده بیم و سی میرَم افت داشت که نامحرمی سِیل ناموسش بکه ، هَرچن قارئو مابین هیچوَخت معلممو وه چَش گَنی سِیلم نکرد! آخه ایما دخترو دِه سِیل پیا میفهمیم چَشیاش خیزن یا نه!
وا غلومرضا وِرگشتم حونه ، فک میکردم ایسه که باردارم شاید داش کمتر وام لَنج بکه ، ولی رفتارش وام گَن تر بی! چی مار هَفیه نیشم میزَه! تموم کاریا حوننه نیا ریـ گُرده مه! نمیگوت ایـ دختر بدبخت بارداره ، بِیل کمی استراحت بکه! تَنیا آرزوم یِنه بی روزی بیا که دِه ایچه رِمو!
تا یه روز غلومرضا اوما گوت: رازونه! دِه شهر کاری پیدا کردمه
- کار چی؟
- مین کافه! کارم فقط یِنا که سفارش بیرم و غذا بَنیم سر میز سی مُشتریا ، صِحاو کافه گوت: گارسو! گارسوم! ناونم چی!
خَنسم گوتم: گارسون! بیسواد!😄

#ادامه_دارد...

‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

☝️☝️☝️
#داستان_لری
#قسمت_هفتم

سر صُو وریسام
خیلی حالم گَن بی ، دوس داشتم روئم مدرسه ، ولی مطمئن بیم غلومرضا دِه دیشو هوفتیه اوچه که مین رَم بیره!
نشسم و وه یاد روزیایی که زیاد هم قدیمی نِوین وا عروسکیام بازی کردم
بوئم و خدابس دوارته بین وه قی! بدم دِه خوم میوما! کاشکه مرگ میشک ایـ زندگی تَلن تموم میکرد ، ورگشتنم وه ایـ حونه باعث بی که بوئه مریضم هم روز وه روز پیر و اِشکسه تر با!
بوئم در اتاقم واز کرد گوت: خدابس خجالتی بکش! ایـ بچه ساوَه هَنی هم عروسک بازی میکه! خدا سیت نسازه که آو کردی دِه لیزِش!
روزیا پشت سر یَک و گَن وه گَن سپری بین غلومرضا و داش هفته یه گِل میومان سراغم که وِرگردم سر حونه و زندگیم ، کم کم خوم هم دِه ایـ شرایط شَکت بیم و دوس داشتم ورگردم! وه قول قدیمیا ، مه خو آو بردمه چَمی هارتر! ایچه و اوچه هم زیاد فرقی وا یَک نارن! چه خدابس وام لَنج بکه چه دا غلومرضا! ولی بوئم دوس ناشت ورگردم! هردو پاش کردی دِه یه کاله که حتما میا طلاقت بِیم... یه روز دِه حونه بیم ، در حونه زِنس! سیاوش رت درن واز کرد ، فاطمه هُمکلاسیم بی! ایقه هَوَس کردم که پام وه زمی نمیرسس ، رتم مین حیاط دَس ونم دِه مِلّش
- سلام فاطی! اَر دونسویی چَنی خوشحالم که دوارته مِینمت!
- مه هم خوشحالم عزیز دلم ، راسش بِهای آغامعلم و همه بَچو ناراحتن که دِه نمیای مدرسه!
- خیلی دوس دارم دوارته بیام ولی خوت بیتر دونی که سیچی نمیام!
- دونم دردت وه جونم! عِیو ناره! خوم چَن روزی یه گِل میام دَرسیا جدیدن یادت مِیم!
فاطی فقیر تا یه ماه بی وه معلمم و تونسم وا کمکش دِه درسیا عقب نَمونم!
ولی شانس یتیم یا باده یا بارو!
بی وه او چیه که نباید با! هِه مِنسی دنیا هم وا مه ناسازگاره!
یه روز که دِه حونه بیم رتم مین هُوش و پِلیله سی مُرغو دوروس کردم ، دِلشیوه عجیب و غریبی گرتم! چِنو حالم خراو بی که تا شُو چَن بار مین اِشکم خومن آوردم بالا ، ایقه حالم گَن بی که بوئم میهاس روئه سراغ مُلا آغاجو!
خدابس گوت:‌ کَلایی اسکندر! چَشیات روشه!
بوئم گوت: هم شِرو کردی! کوری نِمینی دخترم ها دِه نِها چَشیام میمیره؟
- هیچش نی! امیدخدا نُه ماه هَنی بَچش ها دِه بغت‌!
یِنن گوت و پِل میاورد وه زمی و میخَنس!

هِه یِنن کم داشتم...

#ادامه_دارد...

‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

👆👆
#داستان_لری
#قسمت_ششم

تا چَشم هَرد وش جِستم پشت بوئم قایم بیم
بوئم گوت: هَه روله! زَلت نروئه! اَر پیایه خو ایسه دَس وه ریت بلنگ بکه تا خینش بریزم
غلومرضا اوما نِهامون گرت
- چطورفِلو کره! دیشُو سی قی و مرافه وا معلمت صدتا شلاق هَردمه!
زیرچَشی سِیلش کردم ، راس میگوت: زیر چَشیاش دوتا بائمجو درومائه بی! اوفیش! سِقه دَسش بام هرکه بیه!
اوما که دَسم بیره بُورم حونه! صدا قیرَّم رت دِه هوا! گوتم:‌ دَس بَنی وِم ، خین خومن میزنم دِت!
بوئم گوت: دَست بکش! فک کردیه دختر مه بی کس و کاره که دوش ایواره دِه نها هُمکلاسیاش چَکی زئیه بیخ گوشش!
غلومرضا گوت: وه تو چی! اسکندر شَل! رو تریاکت بکش! معتاد مفنگی!
بوئم غیرت وَن وا خوش! چِنان چَپلاقی زَه وه بیخ گوش غلومرضا که گِلِّس!
- هَنی اسکندر نمرده که الواتی چی تو دخترش بزنه!
دوارته فامیلون غلومرضا ریختن دِه سر بوئم! گُلونیمه دِه سر دراوردم و گرتم مین رَشو! خومن وَنم دِه سر بوئم که کاری واش ناشتوئن...
آخرش هم وِرگشتیم حونه! دِه هرچی مدرسه و درس و مَخش بی زِنِسم...
رتم مین انباری! مرگ میشک دِه مین جاکِرمیتی بی ، وازش کردم و نیامش دِه دَم!
چَشیامن نیام وه یَک! دام وا لباس اِسپی اوما وه خاوم! خیلی خوشحال بیم ، دام تَنیا کسی بی که میتونسم سرم بَنیم ریـ شونیاش و بگریوم!
دام دَسش سیم دراز کرد گوت: روله دَسم بیر!
اوسه که هاسم دَسش بیرم وا چَک مُلا آغاجو بیدار بیم! ملا آغاجو بیتال آبادیمو بی ، دُگدُر محلی بی و سر دِه همه کاری دِرمیاورد
گوت: چی هَرده؟(ینونه بعدا سیاوش سیم گوت)
بوئم گوت: ناونم! سیاوش وا گِریوه گوت: مرگ میشک هَرده! مُلا گوت: یه دَله شیر بیاریت! چِنو شیر دَه وم هَردم که شیر دِه پِتم دِروما...
اومام وه هوش! بوئم و سیاوش رتن زیر هَنگلم بردنم حونه ، جایی وَنن سیم دراز کشیم هوفتیم ، اَسه دعا میکردم که خاواخاو روئم...
سرصُو که دِه خاو وریسام وه گوش بیم که خدابس وه بوئم سَمسی میکرد که سیچی ایـ دختر دوارته وِرگشته!
بوئم وش گوت: میهام طلاقش بِیم...

#ادامه_دارد...🦋


‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

#داستان_لری
#قسمت_پنجم

بالاخره رتم مین حونه دوما
احساس غَریوی گَنی داشتم ، تا ایسه حتی یه شُو هم دیر دِه حونه خومو نَهفتیه بیم
هرچی بیشتر دلم سی بوئم و سیاوش تنگ میبی ، بیشتر هم دِه غلومرضا و خونوادش نفرت پیدا میکردم!
اخلاقش خیلی گَن بی! مین حونه وه دا و بوئش گَن و فاش میکرد ولی هَنی پیش نیومائه بی که وه مه حرفی بزنه
چَن روز گذشت! روز شَمه بی
سر صُو خیلی جدی و مصمم دِه خاو وریسام مانتومه کردم دِه ور و کیفم ورداشتم و کتاویا روز شَمَنـه نیام دِه کیف
گُلبانو دا غلومرضا گوت: امیدخدا کجا میها منزل خیر بکی؟
سِیل مین چَشیاش کردم گوتم: مدرسه!
- چَشیا میرَت روشـه! دِه که تا ایسه دختر شی کرده رته مدرسه که تو دوّمیش بایی؟
- بیتر! پس مه اوّلین بِیی هیسم که قراره روئم وه مدرسه
کُوشیامه کردم دِه پا و رتم! وَختی که آغا معلم دیم ایقه خوشحال بی که میهاس بَگریوه
- رازونه! بچه ها گفتن دیگه مدرسه نمیای؟
- نه آغامعلم! سیچی نباید بیام؟
- خداروشکر! امیدوارم حالا که تصمیمتو گرفتی که به دَرست ادامه بدی تلاشتو بیشتر کنی
معلم راس میگوت! زیتر درسم زیاد خو نِوی! ولی ایسه که هیسامه مین ریـ حسیرم و اومامه مدرسه پس باید بیشتر دِه اوسه درس بـونم
مدرسه که تعطیل بی ، مطمئن بیم که غلومرضا اومائه سراغم! اَر تا ایسه هم نیومائه مین مدرسه سی یِنه بیه که او زَمو معلمیا خیلی ابهت داشتن و کسی نمیتونس دِه نِهاشو ریداری بکه
رَسسم وه تِش! گوت: وا اجازه کی اوماییه مدرسه؟
- مَر شُو داوَت وت نگوتم مه دوس دارم روئم مدرسه؟
- خیلی بیخود کردیه!
زیلا هُمکلاسیام چَکی زَه بیخ گوشم!
آغامعلم دوئس اوما وَنش ور چک و توکپا
فامیلون غلومرضا هم که ریوِری مدرسه دِکو داشتن ریختن دِه سر معلم و کُفت و کوش کردن
پشیمو بیم! کاش هیچوَخت نمیومام مدرسه
هِه چِنو که حدس زَم ، شُو ژاندارمری اوما غلومرضانه برد بازداشتگاه
گُلبانو چِنو نُفرین کرد وم که دِه طاقت نیاوردم! چادرم زَم توک سرم و رتم حونه خومو
تا در حونه سی بخت گَنم گِریوسم
خیلی گَنه که بی کس و کار بای! دونِسم که دِه حونه بوئم هم روزگار خویی دِه انتظارم نی! دیو هفت سری ها اوچه که روزگارمه بَشیونه!
رَسسم در حونه ، دَسم بردم بالا که در بزنم! پشیمو بیم ، دَسم آوردم وه هار! نشسم سر زَمی و چادرم کشیم مین سرم
زن عاموم اوما گوت: زن عاموت بمیره که نِشسیه سر زمی ، وِریـ رِمو حونه خومو
رتم حونشو ، چِنو شَکت بیم سرم نیام ریـ بالشت ، ناونم چطور رتم دِه خاو که وا دَنگ بوئم دِه خاو وریسام
بوئم اوما بردم حونه خومو ، سرصُو که وا بوئم رتم مدرسه ، غلومرضا اوچه بی!

#ادامه_دارد...🦋
‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

#داستان_لری
#قسمت_چهارم

دِه زیر تور سِیل میکردم
تَنیا کسی که سیم اَسر میریخت قدمخیر زن عاموم بی...
عاقد خطبه عقدن وَن ، عروس خانم آیا وکیلم؟
کِش نکردم!
دوارته دِه نو گوت: آیا وکیلم؟ ولی مه دوارته هم کِش نکردم! دوس داشتم بمیرم و "بله" وه سر زونم نیا!
بار سوم هم هِــه چنو...
عاقد گوت: اَر ایـ دختر ناراضیه که فایده ناره! وه زور که نموئه!
خدابس اوما مین گوشم گوت: زونت واز کو! اَنی ایمشو زِنّـه نِمیلمت!
دونِسم که هرکاری دِه خدابس میا! هیچوَخت دِه ویرم نمیره روزی که دِه نِها فامیلونش سِقلی و شیطونی کردم وم گوت:‌ بِیل ایـ آدمیا وِریسن تا داغت بکم! آخرش هم هرچی وش لالکِسم وا سیخ داغم کرد...
هرچَن دوس داشتم بمیرم و ایـ زندگی حرومن تموم بکم ولی ناونم چطور بی! اوسـه اومام وه خوم که گوتم: بله!
صدا کِلکلریزون زِنو وِریسا!
گیلیلیلیلیلیلی!
لوطیا زَن وه زیر تِلـه دهل ، میمونیا دَس گرتن و چوپی باختن
وَختی که غلومرضا تور مین سَرم ورداشت ، میهاسم "مین اِشکم" خومه بیارم بالا! یِنه یارو کُرکـا که مین رَه مدرسه گِز موئرّی وه دخترو! توووووف!! عقب مَنــه!!
دوماوَن اومان مین حونمو که بُـورنم! اَلوَت حونه دوما هم نِزیک حونه خومو بی ، هِه سی یِنه هم پیاده اومان
تا پیایو جیازم زَن دِه بار قاطر ، رتم پشت دار انجیر مین هُوش! همیشه وَختی بوئم دِه چییِـه ناراحت بی میرَت اوچه...
- سلام بوئه! خویی؟
سِیلم کرد! پوکی زَه وه چاوِک(پیپ) سرش وَن وه هـار
- سلام روله
هِه چِنو که اَسر دِه چَشیام جُـر میکرد وه هار گوتم: مه هـا میرم! کاری وام ناری؟
سی اوّلین بار دِه زندگیم دیم که بوئم افتا وه گِریوه
- اَی رووووووله ، بوئت بمیره و ایـ روزن وه چَش نئینه!
وا دَسیا کُچکم دَسش گرتم گوتم: سِقت بام نگریو! مه دِه گَپ بیمه! باید روئم سر حونه و زندگی خوم! وِریـ بیا تِه پیایو! صُو مِنامونه میکن!
-‌ روله بِیلم! آز دِه پایام نی که وِریسم! روله رو! خدا دیار سرت با...
- باشد بوئه ، تو هم ویردار خوت با! تونه خدا حَپیاته سر موقه بـور! دَمته وه دَس شِهامه!‌ حواست وه سیاوش هم با!
مین سر بوئمه ماچ کردم و رتم
زن عاموم سوار اَسبم کرد ، تورن کَشی مین ریم و گوت: رازونه خوئرزا! خدا دیار سرت ، هروَخت مشکلی داشتی وه خوم و عاموت بُو!
تا موقه که حونمو وام دیار بی ، چَن دَفـه وِرگشتم وه دِما سِیل حونمو کردم! سیاوش دَس تِکو میدَه سیم...
خدایا ایسه که مه اوچه نیسم کی حَپیا بوئمه وش بِیه؟ اَر قلبش بیره و بمیره چه خَرّه بیرم وا کَپو!
خدایا خوت حواست وه بوئم و برارم با که جز خوت مِنت هیچکسن نمیکشم...

#ادامه_دارد...🦋
‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

#داستان_لری
#قسمت_سوم

هَنی هم ناونسم چه خاوی سیم دینه
تا روزی که تاج طلا اوما وه حونمو!
دِه چَن تا دِه هُمکلاسیام شنفته بیم که وَختی تاج طلا روئه وه حونه کسی یعنی او حونه بِیی داره! ایـ حونه هم که غیر مه دختری ناشت! فَمسم که خدابس چه نخشه گَنی سیم کَشیه
تاج طلا گوت: دِشکه بیاریت تا بَن بونم وه ریش!
جِستم مین اتاقم افتام وه گریوه
اَی! خدابس! مه نمیهام بَن بونم وه ریم ، تونه قُورسون مُردیات!
دَسم گرت!
- وِریـ بینم! مَر میها بـورت؟ دِه خدات هم با که بَن بونه وه ریت ، وا ایـ سولیات ریـ دیـه ناری!
تاج طلا دِشکه وَن وه ریم! ایقه اَسر دِه چَشیام اوما وه هار که دوبار قهر کرد!
خدابس گوت: یمان دِه دلت! بِیل کار تاج طلا تموم با اوسه ایقه بگریو تا باداباد رویی
ایقه پوس ریم سوز میزَه که نُو! رتم مین آینه سِیل کردم! بدم دِه خوم میوما!
وه سیاوش گوتم: برار! تو دونی که قراره مِنه بِین وه شی؟
- عَه! قراره شی بکی وه غلومرضا
- ولی مه دوس نارم شی بکم
- مه هم دوس نارم! ولی تو مویی چی بکیم؟ بوئم هم نارضائه ولی زورش وه خدابس نمیرسه! مطمئنم که بعد تو نوبت مِنه! بلایی هم سر مه میاره!
هیچکسی ناشتم که کمکم بِیه
نه دَس براری! نه کَس دلسوزی! نه هِنارسی! هیچکس! فقط خوم بیم و خدای خوم
تصمیم گرتم صُو که رتم مدرسه بَجیم وه ولاتی! هرکجا با مهم نی! فقط ایچه نوئه! هر بلایی هم بیا وه سرم بیتر دِه ایچنه...
سر شُو کتاویامن دِه کیف دراوردم! عکس دام و لباسیام و کوشیامه نیام دِه کیف
سرصُو وریسام مانتومه کردم دِه ور ، سِیل ایلا اولا کردم ، در هُوشن واز کردم ، اوسه که هاسم روئم وه در ، خدابس هِنام کرد
- کجااا؟
- م م م مدرسه
- بیخود! مدرسه و درد بی درمو! امروز قراره بیاین سی غَرج بورّو!
- امروز ریاضی داریم! اَر نروئم معلم جریمم میکه
- عِیو ناره! زَلَت دِه معلم نروئه! دِه هیچوَخت وه چَش نِمینیش
- یعنی چی؟ یعنی دِه نباید روئم مدرسه؟
- نه! تو هم چی بقیه دخترو! باید کِینوگری یاد بیری سی میرَت!
ورگشتم رتم مین لامَردو! بوئم شال کِلاو کردی که روئه وه شهر
- اَی بوئه! خدابس نِمیله روئم مدرسه
بوئم دَسی کَشی مین سرم
- نگریو روله! چیا مین کیفت دِرار ، کتاویات بَنی مین کیفت تا بُورمت مدرسه!
کتاویام نیام دِه کیف و رتم مدرسه! دِه جرئت فرار هم ناشتم...
ظهر وِرگشتم حونه! حونه که نه! ورگشتم وه قُورسو
هم دوارته گلبهار اوچه بی! بدم دِش میوما
اَفتاو که دِروما زن عامو لباس اِسپی کرد دِه ورم بردم مین اتاق اولایی ، نشسم سر صندلی، زَنون فامیل کِل و گاله کردن
غلومرضا اوما نِشس جفتم! خومن کَشیم ایلا!
عاقد خطبنه وَن! آیا وکیلم؟

#ادامه_دارد...🦋

‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

#داستان_لری
#قسمت_دوم

رتم سراغ مَخشیام
خدا بوئم چی وت بکه فاطمه! چن دَفه وت گوتم ایقه سر کلاس وام حرف نزه! ایقه چِنه زه تا دوارته معلم جریمم کرد
تا نِصم شُو طول کشی تا بیس دَفه دِه ریـ درس امروز نوشتم! ناونم چطور خاوم گرت که بوئم هِنام کرد: رازونه! رازونه! وِریـ ! مدرسه ت دیر بی
وریسام فوری مانتومه کردم دِه ور و اِناشتا نهرده رتم مدرسه! ظهر که وِرگشتم هم دوارته گلبهار دِه حونمو بی ، زینه قِئینه و پیا لَری هم واش بین، گوتم: سلام
گلبهار گوت: سلام عزیرم! شَکت نویی! نوم خدا سی شاگرد اول مدرسه!
خَنم گِرت دِه حرفش! شاگرد اول مدرسه!
گلبهار گوت: دالکه! رازونه یِنا
داش گوت: سرم وه سِقت! بیا ماچت بکم! رتم تِش چَن نیم کیلو توف سایی دِه ریم! خدا سیت نسازه! فوری جِستم وه در و آو زَم وه ریم
رتم مین اتاقم! سیما و مینا اومان عروسکیام دراوردن! ایقه خاوم اوما حوصله بازی واشو ناشتم
خدا بَس گِلشو دَه سی شوم! گوت: اسکندر رته وه شهر باید بِسیت تا خوش بیا
بعد شوم خدابس اوما گوت: رو مین آشپزخونه چایی بریز بُور سی میمونیا
رتم شیش پیاله چایی نیام مین مَجمه ، ایقه سنگین بی زورم وِش نمیرسس! خدابس گوت: کمی جو بون وا خوت! بینم چاییانه نمیریزی وِشو آوریمونه بُوری! وه زور چاییانه بردم نیام وِرشو
هاسم وِرگردم ، زینه قئینه گوت: روله گِرّی بِس بئینیمت
دوس ناشتم بِسم اوچه! بالاخره وه بونه درس مَخش ورگشتم مین اتاق وا بَچو بازی کردم
بوئم کِلیل وَن وه در اوما وامی! تا چَشش هَرد وه کُوشیا میمونیا ، فوری ورگشت وه دِما
ناونم چِش بی! اصلا یِنو سیچی اومانه ایچه؟‌ بوئم واشو چاره که دوس ناره بِئینشو؟
هرچی مَنن که بوئم بیا نیوما! خدافظی کردن و رتن ، سر شُو که بوئم اوما ، قی بی وه قی! خدا بس و بوئم رتن دِه گیژ یَک
خدابس گوت: یا قبول میکی یا جا مه مین ایـ حونه نی!
زنگ دوم مدرسه ، معلم گوت: رازونه! دات اومائه سراغت! چیات جَم کو رو
چِنو هَوس کردم ، مِنسی کُل دنیانه دَنه وم
اومام دم در! لوخَنه قشنگی تحویلم دَه، بلاجینیم میوما! اولین باره که خدابس ایقه مهربو بیه
- ها بُوریمت وه شهر چی سیت بَسونیم
- مَر عیده؟
- حتما میا عید با؟
- عَه دِه چی!
- خا! ایقه چِنه نزه! بیا رِمو که دیره
رتیم سوار مینیبوسیا بیِم ، گلبهار و داش هم اومان ، هم دوارته یِنونه دیم! ناونم چی دِه جونم میهان
رَسسیم وه شهر ، دا گلبهار مین گوشم گوت: گوسنَت نی؟ دِه بی عقلی گوتم: چرا! خدابس تیه پیسَه گَنی کرد وم! گلبهار رت چَن سیخ کواو آورد هردیم ، بعدشم رتیم پاساژ، چادر اِسپی و لباس مجلسی قشنگی و قَری لوازم آرایش سیم اِسّن، دِه هوس پام وه زمی نمیرسس
🦋
#ادامه_دارد

‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

#داستان_لری

#قسمت_اول

ایواره بی ، دِه مدرسه اومام حونه ، چَنی شیفت ایواره گَنه!
او موقه چی ایسه نِوی! مَدرسیا شلوغ بین و دو شیفته ، تازه هر میزی هم سه نفر نشسه بین!
شَل و شَکت کیفم پرت کردم گوشه حونه ، مانتومه عوض کردم، رتم مین کُله مُرغو دوتا خائه دراوردم و مین دَسه دار نیمرو کردم
اوّلین لُقمن که نیام دِه دَم ، خدابَس گوت: رازونه! دختر وِری بیا بینم!
وا دَم پُر گوتم: هِیسه میام! یه لیوان آو ریختم ، اوسه که هاسم بـورم ، خدابس وا دَس زَه دِه مین سرم
- ژَر مار بـوری! دِه سرصُو تا ظهر هایی دِه خاو! ظهر تا ایواره هم هایی دِه مدرسه! مه که نوکر شخصیتو نیسم شُو و روز بَپزم و بَشورم سیتو!
بوئم گوت: زینه! خجالتی بکش! مارن هم دِه سر آو نمیزنن! وا ایـ بچه ساوَه چاری؟ بِیل گوپی نو بـوره ، دِینش دِه گردنت بازار قیومت
- مه شی نکردمه وت که بَچونت گَپ بکم! روزی که اومایی کیخاییم وت گوتم: بَچونت سی خوت! مِنی دِه یادت رته؟
غذامه نِصمه هَردم و سُفرنه جَم کردم!
- روله! سِقه سرت بام! نونت بـور دردت وه جونم! وه حرفش محل نَنیه! راسی امروز مدرسه خو بی؟
- عَه! معلم ومو گوته کاردَسی بیاریت
- ایـ معلمو هم فقط بونه الکی مِیرن! بچه کلاس سه چی بَلله که کاردَسی دوروس بکه!
روله سیاوش! کمک خوئرت بِه وا چویا مین انباری کاردَسیه سیش دوروس کو
خیلی خوشحال بیم! کاردَسیم افتا دِه گردن سیاوش چون مه میاسی زیر پا گُویانه پاک میکردم و دَرفیانه میشُشتم اَنی شرّ خدابس میگرتم! تقریبا کار هرروزم بی ، دِه هوکاره بیم وه کار کردن
شُو تا دیروَخت مَخشیامه نوشتم و هوفتیم! سرصُو وا سر و صدا بَچون گُلبهار بیدار بیم
گلبهار و میرَش تازه دِه آبادی اولایی اومانه بینه وه هُمسامو! خیلی بَچونشه دوس داشتم ، دوتا دختر لِفونه! فوری دِه خاو وِریسام دَس و ریمه شُشتم که وا بچونش بازی بکم! عشقم یِنه بی که وا مینا و سیما عروسک بازی بکم
بازیمو که تموم بی ، گلبهار اوما گوت: سیما ، مینا وِریسیت رِمو! تا چَشش هَرد وه مه لوخَنه زَه گوت: عِه! سلام رازونه خانم نازار! حالت خوئه! نوم خدا سی خوئر قشنگم! مین سرم ماچ کرد و رت
شُو که بوئم اوما ، خدابس گوت: کَلایی اسکندر! امروز گلبهار زینه بهرام هُمسامو اوما ایچه!
- او خو هرروز ها ایچه! خا! چی گوت؟
- وِریـ رِمو مین هُوش تا سیت بوئم!
وریسان رتن مین هُوش! مه دِه دِریژنه پنجره سِیلشو کردم! بوئم هَوار میکشی دِه سرش و میگوت: صدگِل گوتم نـــه! سیچی حالیت نموئه! مَزگ خر که نهردیه؟
اَلوَت حتما دوارته انگشتری دِه شهر دیـه وه بوئم گوته سیم بَسونش! نمردی ایقه طلا خریدی عقب مَنه!
🐞
#ادامه_دارد

🦋
‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥