🎵🎼گُلوَنی💥Laki🎶🎶

#قسمت_یازدهم

روز وه روز هرچی وه داوَت نزیکتر بیم ، لَرتر و افسرده تر بیم
تا یه روز لیلا اوما مین اتاق گوت‌‌‌‌‌‌:
تیام!! سِکو چی وه خوت کردیه
سیچی ایقه هایی دِه هول او گَشتل!
بَردیا اَر پیایی بی و غیرت داشت میوما وه کیخاییت نه دِه ترس خان گم و گور با...
دونی اَر سعید بفهمه که عشق بردیا ها ده سرت چی میکه؟
بالاخره هرچی با تو الان زینه سعیدی و حتی فکر کردن وه بردیا هم گناه کبیرا!!
تازه سعید هم خیلی کر خوئیه ، کُل دخترون آبادی آرزوشونه که زینه سعید بان
وختی وه حرفیا لیلا فک کردم ، دیم واقعا حرفیاش منطقی بین
او روز تصمیم گرتم عشق بردیانه بَنیم دِه سیک قلبم و زندگی جدیدمه وا سعید بسازم...
دِه او روز وه بعد سعی کردم که خومن خوشحال نشو بیم که کسی وم شک نکه...
🐞
قرار بی که عقد و داوَت وا یَک برگزار بان
ظهر وه صرف چاس فامیلون ایما دِه حونمو مکیس بین و شو هم حناوَنو انجام بی
روزی که نشمینه (آرایشگر زنونه آبادیمو) اوما بَن وَن وه صورتم و میام کوتاه کرد ، دِه واقعا باورم بی که همه چی تموم بیه...
همه زنون فامیل وه دورم مَتل وَنن و کِل زَن ، ولی مه "رو رو" میگریوسم
اَلوَت شانس آوردم که همه فک میکردن گریوِسنم سی درد اصلاح صورته...
"کولایی سیت بَوَنم وا بَلگ پینه
چَشیات دِه نازکی اَفتاو نئینه"
🐞
بالاخره منو سعید وا یک عقد کردیم و سی اولین بار خیلی وا دقت سِیل سعید کردم ، فقیر! کُر خوش قیافه و خوشگلی بی ، ناوِنم سیچی کَچ گرتشی و دیـ همه دختر اومایی سراغ مه
نشمینه خانم شروع کرد وه آرایش صورتم ، اَلوَت چه آرایشی! نهایت آرایش اوسه سورمه چَشی بی
بعدشم لباس عروس اِسپی قشنگی کردن دِه وَرِم
خیلی دوس داشتم دالکم زِنّه با و دِه لباس عروس بِئینم ولی چی بکم که دَس سرنوشت چِنی سیم نوشت...
دالکه هایی کجا که بئینی دخترت گَپ بیه...
🐞
بالاخره دوماوَن اومان وه حونمو و مه وا استرس و چشیا خینی رتم وه حونه کدخدا علی مُروت
برخلاف تصوراتم حونه سعیدینو وا حونه ایما خیلی فرق داشت
بوئه سعید واقعا کدخداپیایی بی و امکان ناشت مِنه بئینه و مین سَرم ماچ نکه
داش هم واقعا شیرزنی بی و نمیهیشت مه دَس وه سی و اِسپی بزنم...
کلا دنیای جدیدی واز بی وه ریم...
🐞
#ادامه_داره...


‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥

👆👆
#داستان_لری
#قسمت_یازدهم

کم کم وه روزیا زایمو نزیک بیم
خیلی زَلَم دِه زایمو میرَت! دام سر زایمو مُرد ، ننم همیشه میگوت روله! بوئتو طالع گَنی داشت! اَر دات دِه سر سیاوش نمیمُرد ایـ ملاکت نمیوما بالا سر بَچونش!
هروَخت وه زائسن فِک میکردم چارستون بدنم میوما دِه رکو
دِه همه مهمتر پیل هم ناشتیم
نزیک یه ماه بی که خَوَری دِه بوئم ناشتم! کسی هم نِوی که خَوَری دِه آبادی سیم بیاره! خیلی دل ناگرو بیم ، بوئم همیشه هفته دو گِل میوما تِم! یا شِهامه دَمشه وه دَس خوت! مه غیر بوئم کس و کاری نارم!
بالاخره یه روز سر صُو بوئم دِه لا پیداش بی
دَس وَنم دِه گردنش و ماچش کردم
گوت: اَی! اَی!
- چت بی بوئه؟
- هیچ! هیچم نی روله
- عَه کجا بیه؟ یه ماهه سر وا دیارم نیاوردیه؟ هیچ نگوتی رازونه بی کس و کاره؟
- روله! گرفتار بیم ، نتونسم بیام ، بَوَخش روله! بیا! انجیر بَنی سیت آوردمه ، دِه وِنو که خیلی دوس داری!
- اوفیش! دست درد نکه بوئه ، دِه کجا دونسی بیزَه انجیر دارم؟
- فِک کردیه فقط دایا دِه ایـ چیا بَلَلن؟
هردوتامو افتائیم وه خَنه! خیلی روز خویی بی!
خیلی خوشحال بیم و خدانه شکر میکردم که سایه بوئم ها بالا سرم
موقه که هاس روئه یه دَسه پیل دِه جیو کُتش دراورد دَه وم گوت: روله! ایـ پیلیانه بیر یخچالی واشو بسو ، بقیشون هم قایم کو سی روز زایمونت ، دَس میرَت خیلی تنگه ، خراوشو نکی که پیل بمونه مین دَس و بالت
گوتم: بوئه! یِنونه دِه کجا آوردیه؟
گوت: کاری وا ایـ کاریا ناشتو
هوار کشیم سرش! گوتم: کلایی اسکندر! مه دِه ایـ پیلیا نمیهام! راسش بُو بینم چی کردیه؟ هم دوارته چی قدیم وا روسَم رتیه دُزی؟ حتما ایـ انجیریانه هم وا ایـ پیلیا سیم خریدیه؟
سرش وَن وه هار گوت: روله! وه خدا حلالن ، مه توووئه کردمه! مَر لیوام مال حروم بیارم سی بچونم
ایقه وش اصرار کردم تا بالاخره جومَشه زَه بالا
پَلیش چَن یه بِگِس تِلیشِسه بی!
- حونم درِمس! وا کی قی کردیه؟ کی کارچو زِئه مین پَلیت؟
- قی نکردمه ، رتم تیرو ، بیمارسونی اوچه بی دُگدُر خارجیه مینش بی ، وا یکی دِه رفیقونم رتم گُردالمه فروختم
اوّلش باورم نِوی! فک کردم قی و مرافه کرده! آخه مَر گُرداله هم فروشیه؟ ولی وَختی که ایـ همه پیلِن مین پاکت دیم مطمئن بیم که حرفش راسه
گوتم: بوئه سیچی چِنی کاری کردیه؟
گوت: روله! مه خیلی گَنی دِه حقت کردمه ، ریـ سیاهم که مال و منالی نارم کمکت بکم ، خومم هیچم نی ، دُگدُر گوت هِه وا ایـ یه گُرداله تا آخر عمرت راحت میتونی زندگی بکی..
چِنو گِریوسم که اَسر دِه چَشیام نمن! بوئم سی خاطر مه جونش نیا دِه نِتار! تازه فَمسم که بوئم چَنی دِه هولِم بیه

#ادامه_دارد...🦋



‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‎‌‌‎‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‎‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‍‌‌‌‎‌‌‌‌‌‌‌‌‌‌‌‌‌‌‌‌‌‌‎‌‌‎‌‌‍‌‍‌‌‌‌‌‌‌‌‌‌‌‌‌‌‌‌‌‌🎼 🍁 #گلونی_Laki 🍁🎶

🟠 @Alshtariii  🔥