#قسمت_دهمشو و روز سر نماز اَسَه دعا میکردم که دا و بوئه سعید ، مِنه نپسندن
بالاخره روز موعود اوما و کدخدا علی مُروت و سعید و فامیلونشو سوار اسب اومان وه حونمو
بوئم و عامویام قَری تفنگ وَنن مین رَشو
موقه که رَسسن رتن زیر دوار نشسن ، ننم گوت: روله وِریـ چایی بور سیشو
چایی خَس و پررنگ و پُخته بردم سیشو و دِه سیک دُوار نشسم
بوئم گوت: روله یِنه چاییه یا آو جَفت؟ زیتری رو عوضشو کو!
عوضشو کردم و ورگشتم ، هرچی حال و احوال و سوال دِم پُرسین وا سر جواوشونه دَم
بعد گِرّی که بوئم و کدخدا علی مروت ، نَقل سند زمینیا و گو و گله صحبت کردن ، دا سعید گوت: وَلا ایما دِه خدامونه که وا کدخدا سِه مَخو پِیوَنی بکیم
یه هفته هَنی میایم سی جَواو
ننه قمرتاج گوت: ایما هم دِه خدامونه ، تیام دختر خوتونه!
خوشو بورّین و دوختن و دِه مه هم هیچ نظری نگرتن!
یه هفته بعد اومان سی جواو ، بوئم جواو مثبت دَه وشو و قرار شیرینی هِرو و دَسبوسن هم واشو نیا و خدافظی گرتن رتن...
🐞هیچ اراده و اختیاری دِه خوم ناشتم ، اصلا ناوِنسم هام وه سر چه خاکی!
دوس داشتم سی بار آخر روئم سر چشمه و بَردیانه بئینم ولی لیلا نِشت...
تقریبا همه آبادی خَوَردار بین که قراره مه شی بکم وه سعید ، الوَت حتما بَردیا هم فَهمسه بی ولی ناوِنم چه حالی داشت!
شاید دِه آبادیمو رت! شایدم اصلا سیش مهم نِوی و مه الکی زندگینه سی خوم تَل کردم!
🐞یه شُو بعد شوم سعید و خونوادش اومان ، پیایا زیر دوار و زِنو مین اتاق نشسن
لیلا گوت: تیام بیا مین پنجره سِیل دوما بکو! وه حرفش توجه نکردم و گِز بورّیم وه آسمو...
اَلوَت همه زنون فامیلشو دِه رفتار مه دونسن که راضی نیسم ولی وه ریـ خوشو نمیاوردن...
مهریه و شیربهانه مشخص کردن و قرار داوَتن هم نیان سی یه ماه هَنی...
وَختی وا خوم فِک میکردم که قراره یه ماه هَنی تا آخر عمرم دِه حونه کدخدا علی مُروت زندگی بکم میهاسم لیوه بام!
🐞مین او یه ماه ، ننه قمرتاج و بوئم چَن گِل سی خرید جهاز رتن وه شهر ولی مه واشو نرتم
بالاخره یه روز سعید و داش اومان سراغم سی خرید داوَت ، هَرچَن دلم نارضا بی ولی واشو رتم
اول کار رتیم وه پاساژ طلافروشی ، مه هیچ قصه نمیکردم ، گوتم: هرچی خوتو دوس داریت وا سلیقه خوتو بَسونیت
اَلوَت اونو هم دِه هر چییه بیترینش سیم اِسّن ، یادم میا هیچ دختری دِه آبادیمو تا او زَمو لباسیا و طلایا مِنه ناشت ، ولی مه دلم فقط بَردیانه میهاس..
🐞#ادامه_داره...
🎼 🍁 #گلونی_Laki 🍁🎶 🟠 @Alshtariii 🔥