#قسمت_چهاردهملیلا خیلی زن خویی بی
محرم اسرارم
سنگ صبورم
کسی که بیشتر دِه هرکسی دِه هولم بی...
وش گوتم: لیلاجان سیچی بخت مه سوخته؟
دِه روزی که چشیام واز کردم، قی و مرافه ننه و دام بی ، بعدشم که داغ دام و خوئرم دیم ، ایسه هم باید سی حال و روز خوم بگریوم...
اوایل سعیدینو خیلی دوسم داشتن ولی ایسه که دینه بچه دار نموئم روزگارم شیوَننه
لیلا جان زَلَم میره!
اَر بلایی سر بوئم بیا چی بکم؟ ، دِه باید سَرم بَنیم بمیرم...
لیلا گِرِتم بغل دَسی آورد مین میام
گوت: عزیزم اصلا مین فکرش نویی ،مَر تو بی کس و کاری؟ امیدخدا بوئت که کمی حالش بیتر با ، آو میکه دِه لیزشو ، دَسی که ریـ ناموس کدخدا سِه مَخو بلند با باید بَشکیه!
ایسه هم رو دَس و ریته بَشو تا ننه قمرتاج قضیَنه نفهمسه!
🐞ایواره زیـ کار ، شوم هَردم و مَنم اَنگلات سعید که بیا بُورم!
ولی خَوَری دِش نِوی!
ننه قمرتاج هم چار چَپ و راس میگوت: ناوِنم چی کردیه که حاضر نیسن بیان سراغت!
فِک کردیه اوچه هم حونه بوئته که هرکاری دوس داشتی بکی؟
ایسه حداقل اَر بچه داشتی ، هِه سی دل بچه میومان سراغت!
دِه حرفیاش ناراحت نئیم چون اصلا حرفیاش سیم مهم نئین ، دِه وه نیش و کِنایاش هوکاره بیم!
خلاصه سرتون وه درد نیارم
او شو سعید نیوما سراغم...
نیوما سراغم و مه تِه ننه قمرتاج و لیلا هیرد بیم!
صدای اِشکسن سِخونیامِن میفهمسم...
شو تا صو که خاوم نگرت ، سر صو سی بوئم اناشتا دوروس کردم
هَروَخت که چَشم میهرد وه بوئم داغ دلم تازه میبی...
بوئم گوت: روله مِنِسم دیشو رتیه!؟
الکی گوتم نه زندگیم نرتم! دوس داشتم بیشتر بِسم وه تِت ، دِه سعید اجازه گرتم که بمونم
معلوم بی که حرفیامن باور نکرد ، هیچی نگوت!
کاشکه هِه چی او روزگارو میگوت: غلط کردیه که نرتیه! مَر تو حونه و زندگی ناری که مَنیه ایچه؟ اصلا کاش چَکی هم بَزئـه بیخ گوشم...
آخ و صد آخ که هیچی نگوت...
سِیل مین چشیاش که کردم ، بعد ایـ همه سال تازه فهمسم که چَنی دوسش دارم..
بوئـــــه یعنی "چو پُشت شو!
کسی که هِرنگ دل دختره ، وجودش باعث قوت قلب دختره...
🐞چَن لقمه نون و خائه و کره نیام دِه دَمش
زیاد نَهرد! ناونم! شاید سیر بی ، شایدم خجالتی میکشی دِه دَس مه غذا بـوره
وش گوتم: بوئه! خیلی دوست دارم
❤قول بِه که زیتری خو بای ، هممو وت احتیاج داریم
دَسم فشار دَه و هوفتی
🐞دِه اتاق که کردم وه در احساس کردم همه ها موئن: سیچی نرتیه حونه میرَت؟
آخه اوسه رسم نِوی که دختر بعد شی ، زیاد دِه حونه بوئش بِسه
رتم مین طویله نشسم
کدخدا علی مُروت دِه در اوما وامی گوت: یالله!
رتم استقبالش گوتم: خوش اومایی کدخدا
🐞#ادامه_داره...
🎼 🍁 #گلونی_Laki 🍁🎶 🟠 @Alshtariii 🔥