#قسمت_سیزدهمکدخدا علی مروت گوت:
سعید روله! سیچی ایـ دخترن نوئردیه حونه بوئش!
سعید غیظی کرد وم و گوت رو آماده با تا بورمت
رتم آماده بیم ، سوار اسب بردم تِه حونه بوئم پیادم کرد و وِرگشت
لیلا اوما وه پیشوازم گوت:
تیام!؟!
عَه هایی کجا؟ یعنی ایقه بدت دمو میا که حاضر نیسی سری ومو بزنی؟ اصلا ایما هیچ! هِه سی دل بوئت! بوئت حق دِه گردنت داره! سه ماهه دِه اسب افتائه فلج بیه ، ها دِه توجا! چَن دَفه سیت پیغوم فرسنائیم که بیای! بوئت بیقراری میکرد سیت! خوئرت سوریژگه گِرِت تا سر حد مرگ رت ، نیمائی سراغش! مَر تو دلت دِه بَرده؟
سِیلی دِش کردم پُر چشیام بی دِه اَسر ولی هیچی نگوتم
فوری رتم مین اتاق بوئم
چشم که هَرد وش دنیا جلو چشیام تیره و تار بی
بوئه پهلوونم بیئی وه پوس و سِخونی!
سِیلی دم کرد گوت: تیام! روله تونی؟
افتام وه گریوه ، دسیاشن گِرِتم بوس کردم گوتم: عَه بوئه! خومم ، رولَت بمیره! سیقه سرت بام ، عَه چت بیه؟
گوت: روله! سه ماهه چَشم ها وه ایـ در که بیای وامی!
دوروسه مه خیلی دِه حقت گَنی کردمه ولی بوئتم ، وه خدا حقم نیی که سری وم نکشی
هِق هِق کنان گوتم: بوئه وه خدا نِشتنم بیام
اَر بِدونسمه که چِنی بلایی سرت اومائه فرار میکردم میومام
بوئم گوت: روله مَر اذیتت کردنه؟ عَه سیچی نگوتیه؟ سیچی پیغوم نفرسنائیه؟
"کدخدا سِه مَخو" اَر جنازش هم سر زَمی با نِمیله اَلواتی جگرگوشَشه اذیت بکه...
🐞خلاصه او روز چَن همه بدبختیای ایـ چَن ماهم دِه گردن بوئم گریوِسم...
اومام تِه لیلا گوتم: لیلا سیچی بوئمن نوئردیته وه شهر؟
گوت: اوایل حالش ایقه گَن نِوی ، بعدش که فَهمس تو واش قهر کردیه، کمرش اِشکِس! هرچی هم وش گوتیم بیا بوریمت دُگدُر قبول نکرد
تو خو هِشتیمو و رتی! کاش حداقل انوشیروان کمی گَپ تر بیه که کمک حالمو با!
گوتم: خوم راضیش میکم
اَر هم راضی نیی، وه کدخدا علی مروت موئم بیا بورش شهر
سی عوض کردن بحث گوتم: بَچو هان کجا؟
گوت: بچو هم خیلی بیقراری کردن سیت ، انوشیروان بردشونه سر خَرمجا ، ایسه که بوئت فلج بیه ایما و بَچو باید امورات بوئته بچرخونیم
🐞ایواره بَچو دِه سر زَمی اومان حونه ، موقه که یکی یکی اومان وه بغلم تازه فهمسم که چَنی دلتنگشو بیمه ، کاشکـه هیچوَخت سرنوشت چِنی رقم نمیهَرد ، کاشکه مِلّم بشکسه و وه سعید شی نکردمه...
آخر شو لیلا گوت: بوئت گوته اوچه اذیتت کردنه ، ایسه مه ایقه غَریو بیمه که میا دِه زون بوئت بفهمم!
گوتم: لیلا! دَس وه دلم نَزه...
🐞"هرکجا سِیل میکِنم سیا زمینـه
ناوِنم بخت مِنه یا هِه چِنینه..."
🐞#ادامه_داره...
🎼 🍁 #گلونی_Laki 🍁🎶 🟠 @Alshtariii 🔥