عثمان(بحركة درامية مسك قلبه): سنة يا أنا .. أمووووت ولا أحضن العمود.
هدى: لا إله إلا الله .. مُحمد رسول الله .. عثمان إنت أنا شكلي إنشغلت بي علي والظاهر إني نسيت أربيك.
عثمان: معليش يا حاجة أعملي رايحة ياخ.
كريم: شايفة قلتدبو يلا أسألي هو زيما سألتيني.
عثمان: يا ناس هووي واحد زايد واحد يساوي إتنين أنا داير أعرس عدييل كده.
هدى(بخلعة) : سجمي يا عثمان إنت جنى متين .. كدي خلص قرايتك اول.
عثمان: قلت أوريكم من هسي بس عشان بعدين ما تقولوا لي أُووك أرا روك ونينيني.
كريم: شايفاهو يا أمي .. لو كان بتخليني أدقو من زمان كان إتربى.
هدى: وداير تعرس منو إن شاءالله .. دي منو تعيسة الحظ دي؟
عثمان: ما بقدر أقول اسمها.
كريم (ضحك): مالو شين ولا شنو؟
هدى: هو فضل شي ما قلته .. قول يا عثمان وإلا بتعرفني كويس لو قمت ليك.
عثمان: رحيق.
كريم (بصدمة): بت ناس الشيخ؟
هدى (بهدؤ): ياها يا كريم ما تستغرب.
عثمان: مالكم بتلوموني فيما لا أملك.
كريم: هسي بقيت شيخ وبتستدل بأحاديث؟
هدى: عثمان يا حبيبي زول لامك مافي .. بس إنت عارف نفسك ناوي على شنو؟
عثمان: أي يا أمي عارف .. إنت معاي صح؟
هدى: تفتكر شنو؟
عثمان (بخوف وتوتر): مـ ع ـاي.
هدى: بسم الله إستعنا على الشقة .. شكلكم ناوين تجيبوا العيد في البيت ده.
عثمان نط ليها في رقبتا وحضنا وهو بقول: والله يا هدهد أبوي ده لو كان عرس مرة غيرك والله ما كنت حأعفي ليو.
هدى وهي بتزحو : زح خنقتني على قول أمي طويل العوقة .. خلاص يا عوير زح وبعدين أنا ما عارفاك بتفهم القراية كيف بي مخك التفكيرو عو ير ده .. كيف يعني أبوك يعرس مرة غيري وتجي إنت إحتمال كان يجيبوا بنية أصلًا.
كريم (ضحك) : ناس بيتنا مجانين وأغبياء والبت العايز أعرسا أجن وأغبى منهم .. شلت هم عيالي حيطلعوا كيف لو الجينات دي إنتقلت ليهم.
هدى(بجدية): على العموم أنا عايزة اقول الناس بدت تتكلم فيكم وأنا عارفة إنتوا شنو وتفكيركم وإحترامكم .. بس الناس ما حتشوف غير الهم عايزين يشوفوه .. فحافظوا على سمعة بنات الناس المعاكم ديل .. وإنت يا كريم سوق أبوك وأمشوا بالباب وخير البر عاجله دايرة أفرح بيك برضو .. وإنت يا عثمان موضوعك طويل إتهدا وخلص لي قرايتك اول وبعدين نشوف لو ما غيرت رايك.
أمشوا الحقوا صلاتكم وأدعوا ربنا يسهل ليكم
_____
"بـ لسان ننا"
كنت راقدة على سريري بقرا في إسكريبت نزلته نود من شوية وبتخيل عزيز محل البطل وببتسم شوية كده وشاشة تلفوني نورت بإسمه .. رديت بإبتسامة عريضة:
_عزيزي.
=يعني ما عزيز قلبك !؟ كيفك كويسة؟!
_كويسة بس تعب المشوار والسوق حيلي إتهد.
=لسة لسة نحنا في البداية .. شدي لي حيلك شوية الراجيك كتير.
_إنت بتخوف فيني يعني ولا كيف؟!
=أخوفك شنو يا ننا .. أنا خايف منك والله خليني ساكت أحسن.
_"بطفولة" .. زعلااااانة منك
=حبيبي ما بزعل مني .. أها إشتريتي حاجاتك كلها القروش كفتك يا إيناس بصراحة كده ؟
_كفت ووفت والله يا عزيز ما أتحرم منك.
=عايني إشتقت ليك ولوشك الشين ده.
_صحي نحنا من متين ما إتلاقينا؟!
=لو مهتمه كان عرفتي.
_"ضحكت بصوت عالي" .. عزيييييز والنكد يلا دي جديدة.
=بتعلم منك .. خليك من النكد اشتريتي شنو كده أحكي لي؟
_إشتريت حاجات كتيرة وسمحة شديد.
=شففيني ياخ صحبِك بليد.
_إنت مالك شفقان كده يا عزيز الصبر حلو.
=ليك يوم أصبري بس.
_ما تهدد بقوم أسي أغير رايي.
=وين تاني .. إتدبستي خلاص .. عارفة يا ننا نفسي في شنو؟
_"بصوت ناعس" .. شنو !؟
=حفلة عزوبية ظاااابطة عشان إنتي تاني ما حتديني فرقة أنا عارف.
_أمممم عزيز أنا شايفة أحسن تتلمى قبل أنكد عليك جد جد.
="بضحك" خلاص خلاص إتلميت .. أنا والله متوتر ياخ وفرحان ومتحمس وخايف وكله.
_ما تخاف يا عزيز الموضوع بسيط وعادي.
=بسيط وعادي ؟
_ايوة.
=الموضوع ؟؟
_أيوة يا عزيز مالك.
=خلاص لو انتي شايفة الموضوع بسيط وعادي .. أنا كده ضميري مرتاح شديد على الحأعمله فيك.
_تعمل شنو ما فهمت َ؟؟
=عايني ... تصبحي على خير بكرة وراي صحية بدري ماتنسي أذكار النوم وسورة الملك اتفقنا.
_كده يا عزيز ؟؟ أصبر بس
="ضحك" .. يلا سلام.
تميت الإسكريبت ورقدت نمت بمزاج.
_____
"أحداث_متقاطعة"
_يعني أديتي الغريب وولدنا رفضتيه؟
=أنا ما أديت القسمة أدتو.
_سمح يا سنية .. في النهاية ديل بناتك وإنتِ البتعرفي مصلحتهن أكتر مننا.
=العفو يا بكري أخوي .. أنا ما كان قصدي..
_أبشري يا أختي خليهم يجوا أديهم عنواني والمبدية متمومة.
___
_حباب ود أمي.
=أبو حميد الغالي كيف حالك؟
_إلا فاقدك بس يا أخوي.
=أخوك طالبك خدمة بتسدها ليو؟
_أبشر تب .. مقضية من الله.
=داير أناسبك .. أها بتدينا مودة بتك لمعتصم ولدي.
#يُتبع.
#على_الهامش:
