_على فكرة أنا والبنات جاينك المسا ظبطي لينا قهوة وقولي لأسرار تكتر الفشار .. عندنا شمارات كتيرة. طلعت الدفتر الكنا مخططين فيهو صورت كل الحاجات المهمة .. وفي حاجات إتجاوزتها لأنو ده ما وقتها .. بعد خلصت مشيت إتدوشت في الأثناء دي جات خالتو فاطمة لأمي بعد طلعت لقيتا مشت .. أمي قالت لي جابت قروش وإتفقوا في شوية حاجات جيت إتصلت لـ نود : _نود وين إنتِ؟ =في المكتب. _مش قلتو المسابقة خليتوها بتعملي شنو هناك .. إنتِ صحبة هسي أنا عرسي قرب وما عايزة تقيفي معاي؟ =عندنا شغل ضروري .. أساسًا مقررة أطلع بدري وأجيك ما تستعجلي للسمح. _قصدك للشين. =المهم ياخ .. أها أحكي في شنو جديد؟ _البنات جايني للجبنة عايزاك تجي عشان ما عارفة أعمل شنو؟ =الله يخليني ليك .. خلاص أنا بجيب معاي الفواكه والتسالي والحاجات ديك .. بتصل لماما تعمل لينا بمبي بالدكوة .. إنتِ أعملي الفشار وجهزي قعدة الحوش .. لو أسرار جات بدري أعملوا كيكة ما جات أكسري الحنك. _بحبك. =عزيز قصر معاك في شنو لما تحبيني أنا؟ _بكرهك اقفلي مصلحتي معاك إنتهت. =إتشايليها. قفلت من نود ونضفت البيت وإتمسحت وقعدت زي العروس حارسة أسرار تجي عشان تعمل الحاجات. _____ "في مكان أخر" في واحد من بيوت الحي العامر .. مجموعه من النسوان قررن يعملن قهوة ويشربنها على شرف سيرة أولاد هدى ومحمد الزمراوي: عشة: يا جماعة عاد أولاد هدى العاملنو كتير وشين. عايدة: مالهم يا عشة يختي .. أنا الايام دي بشوووف شوف عيني طلعاته لكريم مع بت سنية. فطين: اي والتوم داك ماشي مع بت الشيخ بلا خجلة. عايدة مستنكرة: علووو علي يا فطين ؟ فطين: لالا علي شنو .. التاني داكا عثمان. عشة:من يومه بتاع حركات الحمد لله بس. آمنة : هي زاتا بت الشيخ ما هينه .. زولة اتزوجت وعاشت حياتا واطلقت تاني تقعد تربي ولدها بس الحب والمعشقة ليها شنو كمان؟ فطين:يا قولك يختي بنات اخر زمن. ______ "بـ لسان نود" بعد القالوا لي كريم قعدنا نفكر إنو معقولة خالتو زينب ؟ لا بكون في شي ما مظبوط .. بس وارد تكون هي أساسًا من جينا الحلة وهي ساكنة هنا براها ما معاها زول .. في ناس قالوا جات من البلد وراجلا مات وما عندها عيال .. ناس طلعوا إشاعة إنها ما متزوجة أصلًا .. وناس قالوا عندها قروش ورثة كتيرة بس ما في يدها. وكترت الأقاويل بس البنعرفه إنها إنسانة طيبة وتعاملا حلو كل شباب الحلة بكنوا ليها مكانة خاصة .. طلعتني من تفكيري ننا .. كلمت كريم إنو نمشي نسأل حبوبة عنها ده أفضل حل .. فطرنا وطلعنا دخل معاي السوق شلت الحاجات وجينا راجعين .. غشيت ننا الكيس وقلت ليها برجع أغيير وأجيك .. دخلنا لحبوبة السرة كريم مشى الصالون وأنا مشيت لروضة .. _يا حبوبة .. يا روضة وينكم الليلة؟ =النويدة أبقي لجاي. _يا حبوبة مشتاقين والله. =بالحيل والله ستهم .. كيف حالك؟ _كويسة الحمدلله .. وين روضة؟ =طلعت بركة الجيتي ناوليني موية باردة من زيري داك الله يرضى عنك. _حاضر يا حبوبة. طلعت أجيب ليها موية لأنو المزيرة بداية الحوش وناديت كريم .. جينا سوا قالت: _ها الشقي إت جيت من وين؟ ="ضحك" .. نود جابتني أسأليها. _بري يا حبوبة دي شوفتي ليو معاك هسي دي. =ما تكذبي يا زولة. _أقعدوا واقفين ليه وشنو الكلام التحت لسانكم أمرقنو. نود: يا حبوبة إنتِ خالتو زينب ست الشاي دي سكنت في الحلة دي متين؟ =يا قااادر قبلتوا على زينب .. بتدوروا منها شنو .. أوعى يكون شيتن ما ياهو؟ كريم: يا حبوبة معقولة لكن .. بس عايزين نعرف عنها شوية معلومات. =زينب دي من اوان قاعدة في الحلة دي من سنة ولدوك يا كريم وجات يوم سمايتك جابت لنا تمر سمح سماااحة عمري ما ضوقته .. وإتي يا نود ما بتتذكري زمن فسدتك بالموس وفكيتي السرخي فينا مليتي الحلة بحسك العالي .. كتي عيانة شديد والتُمرجية ما عرفوا علاجك إلا زينب دي عالجتك. كريم: ضحك بأعلى صوته. نود: "بزعل" .. حبوبة قولي ليو ما يضحك .. أمشي يا قاعد من زمن الهدايا بلح. السرة: أجيي بتضاحكوا في شنو .. عاد قت النصيييحة بس. كريم:أها يا حبوبة ولما صرخت حصل شنو تاني؟ نود: كريم نحن ما جينا للقصة دي .. ويا حبوبة ما تحكي ليو قصصي حيمسكا لي ذلة. السرة: بري والله الما رادك ما حجاك .. وقت قاعدين هسي سوا النحجيكن بطفولتكن حجوها لأولادكم كان الله ما حضرني ليهن. نود"بحزن" : حبوبة تفي من خشمك ما تقولي كده ياخ بعد عمر طويل إن شاءالله. كريم: يا حبوبة أنا هسي عايز أعرس عشان أجيب ليك مرتي وعيالي تربيهم لي إنتِ تقولي كلامك ده؟ السرة: مرتك هدية ورضية ومربية أحسن تربية .. وبتربيك إت والعيال ما تشيل هم. نود "ضحكت" .. عجبني ليك عشان تاني تقابض الكلام. كريم: خلوا عيالي ومرتي .. الخالة زينب دي إنتِ بتعرفي أهلا يا حبوبة وساكنين وين؟ السرة: إن ما وريتوني بتدورا منها شنو ماني حاجاكم بيها. نود وكريم "عاينول لبعض".