View in Telegram
ننا: حضرة سيادتا عايزة تخلي عروس بحالا تنتظرا ؟
روضة: شكلو العرس عاجبك شديد يا ننا.
ننا: ماهو بعجب لكن أنا أسوي شنو؟
فضلوا يتكلموا في كذا موضوع أنا جهزت صينية وديتا لناس أمي ونحن ننتظر البت العاملة فيها صحبتي دي .. قبل أطلع خالتو هدى طلعت وراي ولما بعدنا قالت لي:
=ننا.
_أيوة يا خالتو.
="بهمس" إنتِ يا نوسة عزيز ما قال ليك حيجيب المأكولات متين والتفاصيل دي ؟؟ لأنه مفترض تنزلي دخان يا بت ولسة ما جابوا شيلة المأكولات.
_والله يا خالتو ما سألته بس ممكن أتصل عليه أسي أشوف فهمه شنو؟
=أي إتصلي وأسألي براحة كده عن الموضوع .. وختيتا ليك في ذمتك لو في أي شي ناقص كلميني أنا دي بتمه ليكم ما عندي أي مشكلة.
_يا خالتو كلام شنو ده العفو ياخ.
=إنتِ هبلة يا بت ! كان إنتِ كان عزيز زي أولادي واااحد وأقيف في فرحكم ده لمن يتم بإذن الله تعالى.
_كتر خيرك يا خالتو هدى ما بتقصري والله.
=انتو هينين ولا لينيين إن شاء الله ربنا يتم ليكم على خير .. كدي خلي المواضيع دي هسي وإتصلي لعِزو شوفيه.
_طيب حاضر.
ربتت على كتفي ودخلت جوة .. مشيت المطبخ شلت تلفوني وإتصلت على عزيز :
_يا عِزو.
=أيوة يا إيناس كيفك؟
_إيناس؟؟
="بهمس" في الشغل أنا.
_اهاا اسمعني.
=معاك قولي.
_أنا مفترض أنزل دخان وكده أتحبس يعني .. ف خالتو هدى قالت أتصل عليك أشوفك حتجيب باقي الشيلة متين وكده ؟؟
=والله في بالي يا إيناس ومشيت السوق ظبطت الأوضاع كلها بس باقي حاجات بسيطة إن شاء الله لي بليل كده بتصلكم الحاجات كاملة.
_عزيز لو فيها ضغطه أو كده..
="قاطعني بهمس" .. بتنا ما عندك شغلة بالقصص دي أنتِ بس ركزي لي على نفسك لمن الله يلمنا في بيت واحد والباقي كله ما مهم والله.
_عزيز على فكرة بقيت تخوفني بكلامك ده.
=مش براك قلتي الموضوع بسيط وعادي !
_موضوع شنو يا عزيز ؟
=هو ذااتو.
_أنا ما قادرة عليك.
=ولا تحاولي ما حتقدري أصلاً .. عايني خشي وتسب ما قادر أتكلم معاك براحتي.
_تمام.
فتحت وتسب لقيته مُرسل لي:
_أدفع دم قلبي عديل عشان الطلح والشاف يصلوك الليلة يا عروس.
=عزيز .. إنت بتعرف الحاجات دي من وين ؟
_أهم حاجه خلي حبوبة هي التظبط الدلكة بخبرة السنين دي.
=أنا مصدومة .. طلعت غاشيني السنين دي كلها وعامل فيها مهذب وبريء .. وإنت ماشاء الله عارف حاجات أنا نفسي ما عارفاها؟
_بعلمك ما مشكلة.
طلعت العريشة لقيت نود بتسلم عليهم .. جيت قعدت في مكاني وصريت وشي:
_ما شنو يا عروس؟
=شنينة.
_اووبا شكلو الموضوع دخل الحوش .. يا جماعة الزعل البت صحبتي منو؟
روضة: بتتعلم فيك الدلع.
روڤي: أسألي روحك.
ننا: أقعدي يا نود نحن ورانا مواضيع.
نود: مواضيع زي شنو؟
وريف: أنا حأشرب فنجاني ده وأستأذن عشان مواضيعكم دي بكرة ما بجيبوها لي في الإمتحان.
نود: أي شوفي مستقبلك يابتنا.
روضة: وإنتِ هاملة كده إن شاءالله شايفة مستقبلك؟
نود: شايفاهو شنو أنا هسي جاية منو عديل.
ننا"ضحكت" .. كشح عشا شديد.
روضة: فظيعة يا نود إحترميني أنا خالتك بعد كده.
نود: إحترام يعني شنو؟
ننا: قلتدب يعني شنو؟
وريف: تربية يعني شنو؟
روضة: أنا بس محترمة وريف ما عايزة أقول حاجة كده ولا كده.
فضلنا نتونس ونسة البنات اليوم ما خلصت دي بعدها لموا معاي الحاجات .. نود كنست البرندة وشدت الملايات .. روضة غسلت العدة وطلعوا من عندنا.
____
"بـ لسان عزيز"
قفلت من ننا لما كريم جا داخل مكفكف أيادي قميصه وبدندن ..
_ما كان تجي عليك الله.
=عصرت عليك في الشغل؟
_إنت عصرت على الخوة عديل كده.
=ما إنتبهت .. المهم وريني عملت شنو؟
_الحاجات جاهزة فضل نمشي نرفعهم وشوف لي الشباب ديل يجوا عشان ننزلهم.
=إشتريت كل حاجة؟
_تقريبًا.
=ما نسيت حاجة كده ولا كده؟
_بتسأل مالك يا زول؟
=داير أتشف منك.
_"ضحك" .. دي خصوصيات.
=مافي وقت للتفسير سلمني الورقة القبيل حسبت فيها الحاجات.
_يا زول خلصانة ودفعتها.
=والله دايرا لروحي ما داير أدفع ليك.
_"بإستغراب" .. ما مرتاح ليك.
=فاكر حتعرس براك وتتبسط وأنا اقعد أكشف ليك؟
_دقيقة إنت ما جادي صح؟
=مافي زول جادي أكتر مني لما اقوم.
_خططا من وراي يعني؟
=والله يا عزيز ما عندي اي خطة أنا سايبة لربنا بس حاسيها حتجي زيما داير .♡"
_يا زول مبروكات والله .. ربنا يتم على خير.
=الله يبارك فيك يا خوة.
إتبسطة شديد لكريم ما عشان صحبي والله بس هو يستاهل كل الخير والسمح .. خلصنا شغل دخلنا المسجد صلينا العصر وطلعنا على السوق عندنا صاحبنا كده عندو كريز إتصلنا ليو جانا رفع معانا الحاجات .. لما وصلنا الحلة لقيت الشباب متلمين قدام البيت .. اول ما نزلنا كريم سلم ليوسف:
_ وين يا زولي.
=حبيب زولك والله .. اللمور والصحة؟
_كله مظبط الحمدلله .. وين إنت يا زول؟
=بالنية بس والله.
_لينا قعدة.
عثمان: علوبة كشف السلام ده.
علي: يا صحبي نحن ليه ما بسلموا لينا كده؟
Love Center
Find friends or serious relationships easily