كريم: يا حبوبة نحن شفناها بتطلع تمشي مكان كده وعايزين نعرف منك بس. السرة: خلوا المرة في حالا زولة خير وست حارة إنتوا جارين ورا الشمارات دي شغلتكن مع الناس؟ نود: يا حبوبة الموضوع ضروري والله. كريم: ممكن يغيير حياة ناس كتار. _____ بعد تحانيس حبوبة حكت لينا الخطوط العريضة وبرضو ما قطعنا الشك وارد كل القصص السمعناها تكون صح .. رجعت البيت إتدوشت صليت العصر وطلعت لـ ننا .. شُفت رونة ومعاها وريف بِفرشوا في الملايات .. وأسرار ومفاز بيرصوا في الحاجات مع بعض .. كنت قايلة نفسي بتوهم لأنهم بتونسوا والوضع بينهم عادي .. بس لأ هم فعلًا طلعوا شغالين سوا وكمان بضحكوا وبتونسوا .. الحمدلله إنو علاقتهم ما خربت بسبب موضوع يوسف .. أخر حاجة أتمناها تحصل إنو أخت صحبتي الما عندي غيرا تكون على عداوة مع أختي .. قربت شوية وسلمت عليهم أول ما دخلت يدي في الفشار نتالي هرشتني: _نووود أوعك .. إستني لما نجيب باقي الحاجات وناخد صور بعدين نتلمى كلنا وناكل. =يا قول حبوبة أكل كمان بيصورا فيهو شنو؟ بِقوا يضحكوا بعدما خلصوا رص وصوروا ستمية صورة .. إقترحت عليهم نقعد تحت أريح وأحسن من السراير .. في الأثناء دي جات ننا وقعدت جنب روان. مفاز: عاينوا صح كلام نود انزلوا تحت أحسن. روان: أنا أعفوني. ننا: وأنا كمان. =أنزلوا ياخي عشان بعد القهوة نلعب صراحة وجراءة. مفاز: أوعى من جراءة عشان سرو ما تكلفنا نغسل ليها العدة باقي الليل ده. ضِحكنا وننو إتبرعت تغسل العدة بعد نخلص من العك البنعملو ده .. وبعد تعب ننا إقتنعت تنزل وتلعب معانا هي وروان .. في الأول كنا بنفتح مواضيع وبنتونس عادي لحدي ما خلصنا من القزقزة .. أسرار خلصت قزازة الميرندا وبدون سابق إنذار لفتها .. وقعت بيني وبين مفاز. ننا: أووه لِقاء العمالقة. =أحم أحم أسألي يلا. مفاز: لو السعادة زول حيكون منو !! =ننا طبعاً. ننا: بوسااااتي يا ملكة يا سوسنة يا.. =فولغير ياخي. لفينا القزازة تاني ووقعت بين روان ونتالي: نتالي: بتحبي أمك أكتر ولا أبوك ؟ روان: دي شنو أسئلة تالتة أساس دي ؟ نتالي وهي بتضحك: بهظر بهظر .. ما حصل حبيتي ليه؟؟ روان: لسة ما جا الشخص المناسب بس. لفينا القزازة والمرة دي وقعت بين أسرار ومفاز: أسرار: إختاري أكتر تلاتة أشخاص بترتاحي ليهم بدون أسباب دون عن ناس بيتكم طبعاً. مفاز: روان ونتالي ويوسف. حصلت لحظة صمت غريبة فعلى طول لفيت القزازة وأنا بضحكك =بحب يسألوني عشان كده الدور وقع علي .. يلا أسألي يا روان. روان: قبيل قلتي السعادة بالنسبة ليك ننا .. طيب الأمان منو ؟؟ ="جاوبت بدون تردد" كريم .. بحس إسمو التاني الأمان أصلاً. روان ابتسمت: ياريتنا كريم. لفيناها تاني ووقعت بين وريف وننا: وريف: ننا. ننا: الله يستر .. أسألي ؟؟ وريف: لو خيروك بين نود وزول عزيز على قلبك حتختاري منو؟ ننا: العزيز على قلبي طبعاً. =يا شيييخة لالا تمام .. ما سعادتي ولا شي زاتو يا زولة. ننا: هو أنا أقدر بدونك يا أم جضوم إنتِ. =هسس أسكتي خلي العزيز على قلبك ينفعك. ننا: ديل بيسألوا أسئلة تخرب العلاقات والله. =خلاص آخر لفة. لفيتها ووقعت بين مفاز وننا: مفاز: بما أنها آخر لفة .. فأنا عاوزة منك نصيحة ما عاوزة أسألك .. تنصحيني بشنو ؟ ننا: أممممم النصيحة المُكررة اهتمي بقرايتك ثم قرايتك لأنها سلاحك .. واهتمي بنفسك ودلعيها وحبيها أكتر من أي زول تاني .. واهتمي ببشرتك وخليك حلوة ورايقة ورقيقة دائماً يا مفاز .. ما أعتقد الحياة ممكن تهزم الحلوين. =قصدك شنو يلا .. لأنو أنا الحياة طحنتني طحن. ننا: قلنا الحلوين يا نود إنتِ الدخلك في الحوار شنو أساساً؟ كلهم قعدوا يضحكوا .. بعدها لمينا المكان .. نضفناهُ وغسلنا العدة صلينا المغرب وأخدنا بعضنا وطلعنا .. كالعادة المُعتادة كريم كان واقف جنب العمود . ننا قدمتنا وهي بتقول: ننا: أستاذ قلقان مُستنيك .. يلا يا بنات تصبحوا على خير ويا ننو شكراً على فكرة اللمة الحلوة دي بجد غيرتوا مزاجي واتبسطت. نتالي: حبيبتي ولو العفو ياخي كل فترة والتاني نعمل كده لو حابيين. ننا: إن شاء الله. نتالي مشت ناحية بيتهم ووريف ومفاز إتقدموا من قبيل أصلا فِضلنا ماشين أنا وروان جنب بعض قبل نصل كريم قالت لي: _على فكرة كنت زعلانة منك. =على فكرة كان واضح. _فهمتك غلط وحكمت عليك بدون أسمع منك .. معليش يا نود حقك علي سامحيني. =معلشتك مقبولة يا رونة .. وأنا ما زعلت منك أصلًا. _أمس أنا وكريم إتكلمنا عنك. =قلتوا شنو يا قطاعين !! _لا ده سر بيني وبين أخوي .. يلا تصبحي على خير. _____ "أحداث متقاطعة" _مودة .. ممكن نتكلم في موضوع بخصنا الاتنين ؟؟ =أكيد يا معتصم .. خير؟ _ بصراحة .. أنا كنت بفكر كتير قبل ما أتكلم معاك .. بس حسيت إن ده الوقت المناسب. ="صمت" _أنا ما عاوز أكون سبب ضغط عليك وجيت أسمع منك إنتي. =تسمع مني شنو !؟ _موافقة بي يا بت الناس ولالا ؟؟ #يُتبع.