#وفاة السيدة ام البنين ع
#يا ام البنين
(خلولي بس ذكراهم)
ألـمـن اعـيش ابـدنيا ما بـيهـه احباب
خـلـونـي كـلـهـم وانـتـظــر دگـت باب
كـلشـي أنـعـدم ويـاهـم
خـلـولـي بـس ذكـراهـم
*--------------------*-------------------*
انتظـر واحـسـب ليالي حصّلت بـس السهر
طالـت الغَيبه عـلـيّـه وصـارت ليـوم ابشهر
جرحت الدمعه جفوني ورسمت بخدي نهر
الـوالـده التـفگـد رباهه حقهه يكتلهه القهر
مـابـيـه اصبـر والگلب ضل متعوب
اه شكبرهـه حسرتي بـكـل اغـروب
ويـن الـزمـن وداهـم
*---------------------*-----------------*
مـلّـت اردان الـعبـايـه لشوكت امسح دمع
رجَوتي ايرجعون أليه وكلمت اليُمه استمع
راح امـوتن يـا الاهي يـمـتـه بيهـم انجمع
هيچي خلاني زماني اشـبـه الحال الشمع
بالغربه ضليت ابجرح واصعب حال
اغــفــه وافـزن والـصـور وي الـبـال
اشلون المشوا انـساهم
*--------------------*-------------------*
الـبُـعـد شـيّـب دليلي وذبـلـت اسنين العمر
ماتت اضنوني ابجفاهم والگلب مثل الجمر
انتـظـر طيف الحبايب بلكت ابـنـومـي يمر
الجـفـن ألّهـم جرحته ونزلت ادموعي حمر
اسـأل وسـولـف للهوى مـن ايـفـوت
امضيّعه شبان اربعه وشفت المـوت
لاخـر حياتي انـعاهـم
*-------------------*--------------*
ازرع آمـال بـصـفـنـتي والـنـظـر يـم الدرب
مظلمه ابعيني المدينه وشيّب الراس الغرب
كلشي بالـدنـيـه كرهته ريـتـه غطاني الترب
الـحزن خـيّـم علـيّـه والـزمـن مـعلـن حرب
تلفي الـمسـيـه والـحـزن بيّه ايزود
ارفـع اديّـه وادعـي رب الـمـعبـود
الدوم ألهج ابطرواهم
*------------------*-----------------*
شـاهـد الليل وظـلامـه عاشرت نـجـم السمه
وحشه بعيوني المدينه وكلهه صارت مظلمه
حـتـه دمعاتي الاهلهه حـمـره وبـلـون الدمه
حيـره حيّرني زماني وخـلـه هـيـچ الخـاتمـه
غايب خبرهم بالمشوا مدري اشصار
بُـعـد الـغـوالـي يـا خـلـگ نـار ابـنـار
ابـروحي ضل رجواهم
*----------------------*----------------*
احسيني عذبني ابغيابه وخله روحي معلعله
احـلــم أيـرد واشـوفــه الاربــعــه فـدوه ألـه
ابساعة العافاني وحدي عمري ما لحظه حله
بـالـوطـن واشـعـر غـريـبـه بالي يَمه ابكربله
خلصت دموعي وما بقت دمعة عين
صعبه اموت وما اصد طول حسين
ابـن الـزچـيه اغلاهم
*---------------------*----------------*
✍خـادم ام البنين ع
الشاعر رعد الجريخي