▪️ #الإمام_الحسن_المجتبى_ع ▪️ #أبوذية 👇 دمعتي اعليك من تهمل وسلهــه
اگلهه يا محب عنـدج وسلهــه
مصــابك ذوّب المهجــة وسلهــه
صدگ بالسم رحت يبن الزچية
ـــــــــــــــــــــ ❈ ❈ ❈ ـــــــــــــــــــــ
▪️ #لطمية 👇يـــامجتبى نبچيــــك بدمــــوم والهم
ننصب مناحة عليـك هاليـوم بالهم
بهــذا المصاب نـواسي الحسين بالهم
بهــذا المصاب نـواسي الحسين بالهم
ـــــــــــــــــــــ ❈ ❈ ❈ ـــــــــــــــــــــ
سيـــد الشبـــان انت و ابــــن حيـــدر
و الامام الثانــي بالنــص انت تُذكَـــر
انت و حسيـن الشهيـد النـام بالحــر
امكــم الزهــرة العلّــي سمّاهـا كوثــر
جــدك رســـول الله و يسمّـــوك بالهم
والــــدك حيــــدر مايعرفــــوك؟ بالهم
يا حيـف اجتّك غــدرة البيــــن بالهم
بهــذا المصاب نـواسي الحسين بالهم
ـــــــــــــــــــــ ❈ ❈ ❈ ـــــــــــــــــــــ
يا أبــو محمــد نريـــد اليــــوم يمّــــك
نــواسي بدمــوع القهر للزهــرة امّـــك
بالبقيــــع الگبـــرك نطوفـــه و نشمّــك
يا ذنب ننشد يغـالي الطـاغي سمّـك
تقـذف چبدتـك گمت و تصيح بالهم
زينب غـدت كالطيـر الجريح بالهم
والله بمصــــابك تهمــل العيــن بالهم
بهــذا المصاب نـواسي الحسين بالهم
ـــــــــــــــــــــ ❈ ❈ ❈ ـــــــــــــــــــــ
يالحســــن ياسيــــدي ارد اعتـــذرلك
ابچي لمن ينگضي كـل دمعي لجلك
ابذكـرك مقصّــر أنــه لكـن احـن لك
بكل طريقة و كل وضع رايـد اوصلك
اوصل الـى گبــرك المهـــدوم بالهم
وسط الگلب دوم انت مرسوم بالهم
تفـديــك حتـى عيـوني الثنين بالهم
بهــذا المصاب نـواسي الحسين بالهم
ـــــــــــــــــــــ ❈ ❈ ❈ ـــــــــــــــــــــ
نواسي هــذا اليــوم اطفــالك الأيتــام
وبدمع مسفوح نحچــي ويـه جســام
نگــــله الله يعظّمــه لأجــرك بالإمــــام
وانت برض الطف ذبحتك وي الاعمام
رملة اصبحت ثكـلى و تناديــك بالهم
عمـــك تكسّر ظهــره اعليـــك بالهم
انعـاد اعله عمــك نفس الونيــن بالهم
بهــذا المصاب نـواسي الحسين بالهم
ـــــــــــــــــــــ ❈ ❈ ❈ ـــــــــــــــــــــ
المهدي ابهــذا المصاب اليـوم اعزّيـه
و اعـله عمــه المجتبى لازم أواسيــه
قلبه حامل كم مصاب اللي يهم بي
همــك و همنــا بظهــورك ربنــا يجليه
وبطلعتــــك تنصــــر المظلــــوم بالهم
ثــار الشهيـــد الـــراح مسمـــوم بالهم
ثــار الخــذوا راسه الـــى يزيــد بالهم
بهــذا المصاب نـواسي الحسين بالهم
ـــــــــــــــــــــ ❈ ❈ ❈ ـــــــــــــــــــــ
✍ بقلم الشاعرة زينب الخفاجي
~•~•~•~•~•~•~••~•~••~•
#اللهم_صل_على_محمد_وآل_محمد_وعجل_فرجهم