KitobHouse | Bookblog

#haqida 📝

"Chol va dengiz" eng sevimli asarlarimdan biri, Xeminguey esa yaxshi yozuvchi. Kitobga ishlangan yuqoridagi muqovani ko‘rib jahlim chiqdi. Yasama zehn orqali ishlanganligi ko‘rinib turibdi, lekin ozgina farosat ishlamay qolibdi.

Cholning bir oyog‘i qayiqda, biri esa g‘alati tarzda suvda (bir maqolni eslatib yubordi). Quyosh yonida delfinsimon mavjudot uchib ketyapti. Chol eshkakni noodatiy ushlab turibdi, qayiq bilan chol hajmi nomutanosib.

Xudoyim farosatdan bergurlar, ozgina ishlanglar, asarlarni hurmat qilinglar. Yasama zehndan foydalanish ishingizni osonlashtiradi, qulayliklar juda ko‘p, lekin uni ham ishlatishni bilish kerak.

Boshqa asar bo‘lganda ham jahlim chiqmasligi mumkin edi, ammo har yil bir qayta o‘qiydigan kitobim bo‘lganligi uchun asabim buzildi.

👉KitobHouse👈

Yildan yilga qish O‘zbekiston uchun qo‘rqinchli tushga aylanib boryapti. Bo‘layotgan falokatlar, taqchillik, tizimning to‘g‘ri ishlamasligi odamlarda ishonchsizlik keltirib chiqaryapti. Har kuni yomon xabarni o‘qishga asablar dosh berishi qiyinlashmoqda, bu hayot tarzini og‘irlashtiradi, ortiqcha stressni olib keladi. Birinchi qor, Yangi yil kayfiyati faqat bolalarda qolgan. Kattalar o‘zlarini xursand ko‘rsatishadi, xolos. Uyni isitish, gazda navbat kutish, to‘lovlarni to‘lash, qo‘shimcha falokat xabarlari ularni charchatdi.

Bir haftadan buyon ruhiy holatim yaxshi emas, ertalab yangiliklarni ochib o‘qishga qo‘rqaman. Atrofimdagilarga sezilmas, lekin ichim yig‘layapti. E’tibor bermaslik imkonsiz, ular bizning yurtdoshlarimiz, jigarimiz, bir tuproq farzandimiz, aka-ukamiz, qondoshmiz.

👉KitobHouse👈

Nashriyotimizga ish bo‘yicha suhbatga keladiganlardan yoshini so‘rasam kamida 5 yosh kichkina bo‘ladi. 2002, 2003, 2004, 2005, 2006-yillar. Bizning ham "Yoshlar ..." deb gapiradigan vaqtimiz kelibdi.

👉KitobHouse👈

#kitobhouse

Doim kitob o'qiyotganda, o'qiyotgan kitobingizda bir olam tasavvuri paydo bo'ladi. Xayolotimiz, ongimizda umuman biz bor deb o'ylaydigan, lekin hech qachon moddiy jihatdan ko'rinmaydigan olamni bizga ochib beradi. Bu juda chiroyli holat. Sizning ongingizda, fikrlaringizda, oʻy xayollaringizda kitob voqealari yashaydi, qahramonlar yashaydi. Bu qahramonlar bilan kechinmalarini o'tkazasiz va bu kechinmalar sizning xayotingizda bo'lmasligi, umuman sizga aloqador bo'lmasligi mumkin, lekin qandaydir rag'bat olasiz bundan, taskin topasiz. O'zingizni mana shu olamning bir qismi sifatida, qahramonlar bilan yashaysiz. Ba'zida qahramonlardan jahlingiz chiqadi, ba'zida ularni qo'llab-quvvatlaysiz, ba'zida esa ular bilan kulasiz, yig'laysiz.

Bu kitoblarning sehrli olami, doim ta'kidlayman, doim aytaman: kitob bu insoniyatning eng yaxshi ixtirosi.

Izoh: Yuqoridagi matnni KotibAI boti orqali yozdim, ya’ni ovozli xabar yubordim bot esa uni matnga aylantirib berdi. Ba’zida uzun matnlar yozish uchun juda qoʻl keladi, birinchi marta sinab koʻrdim menga yoqdi. Matnni ba’zi joylarini tahrir qilish kerak, umuman olganda juda foydali bot.

✨Sinov uchun hayolimga kelgan gaplarni gapirgandi.

👉KitobHouse👈

#video 🎬

Bundan sal kam 2 yil oldin shu videoni olgandim. Ma’lumotni yoz oylarida topgan boʻlsam, unga video ishlash uchun qishni, qorni kutganman ❄️. Oʻsha vaqtdagi instagram blogim uchun yaxshi qamrov olib kelgan.

Oʻsha yildan boshlab “anomal sovuq” 🥶 soʻzi lugʻatimizdan faol joy olgandi.

✨Videoda kamchilik anchagina, lekin nima boʻlmasin video ishlardim, issiqroq kiyinib yuring 🥼

👉KitobHouse👈

#taqrizoldi 📃 (+18)

Asarni oʻqishni boshlashingiz bilan jirkanch mavzu oldingizga qoʻyiladi. Agar tolerantroq boʻlib oʻqimasangiz bir fohisha haqidagi asar ekan deb nari surib qoʻyasiz. Taqriz yozishdan oldin fohishani shu maqomga olib chiqqan jamiyat haqida yozishga qaror qildim va oldinroq yozilgan postdagi fikrni ochib bermoqchiman.

E’tibor bersangiz oʻrta asrlar burjua jamiyatida turmushga chiqishdan asosiy maqsad kelajakda toʻkin hayotni ta’minlash yoki oilani qarz botqogʻidan olib chiqish boʻlgan. Shu sababli qizlar doim boy oila yigitlarini koʻzlab yurgan, qaysidir ma’noda bu qarash ularga yoshligidan singdirilgan. Tashkil qilinadigan bal kechalarida ovlar boshlangan. Eng qizigʻi aynan shunday kechalar kiborlik belgilarini namoyish qilish maydoni ham hisoblangan. Bu davr haqidagi ijod mahsullarida yaqqol seziladi.

Kiborlar orasida xushtor tutish an’anasi urfda boʻlgan boʻlsa, oshkora, yashirin bunday qiliqlar ijobiy qabul qilingan. Yana hammasi oliymaqomlik belgisi ostida pana qilindi. Asarning ibtidosi umuman davom etishi jamiyatning yuqoridagi illati haqida, ona oʻzi qizini yashab qolish “kapitali” sifatida koʻradi. Va doim unga uqtiradiki qomatidan yaxshigina foydalanib qolsa boʻladi. Qizning hayotida uchraydiganlar esa goʻyoki namoyishchilardek baralla onasining firklarini tasdiqlab hayqirishadi. Orzularing uchun qurbon qiladigan yagona imkoning “qomating”.

Oʻrta asr va qadimda Sharq davlatlarida bu jarayon biroz boshqacha kechgan, bu haram tutish edi. Haram ham maqom belgisi hisoblangan. Urushlardan yoki mustamlaka yurtlardan doimiy qiz-juvonlar olib keltirilgan. Ba’zi vaqtlarda ularning yuborilishi kattagina oʻlpon, soliqlardan ozod etilish evaziga boʻlgan.

Asar haqida tugal fikrga kelganimcha yoʻq, sababi undagi qahramonlarning har biri muhokama qiladigan xulq-atvorga ega. Voqealar rivoji zanjirlar halqasidek bir-biriga bogʻliq.

Yuqoridagi gaplar faqat qoralashdan iborat boʻlib qolibdi. Bunday niyat yoʻq edi aslida, jamiyatning bir illatini aytish xolos. Yana bir tahlil qilsa boʻladigan mavzu aynan sinfiylashish yuqori boʻlgani uchun pastki qatlam yuqoriga faqat tana orqali chiqishga harakat qilgani haqida, doimiy jismoniy mehnat va aqliy qobiliyatni rivojlantirishga imkon berilmagani ularga yagona yoʻl qoldirgandir.

“Osmondagi bolalar” filmida aytilganidek, asar menga yoqdi.

👉KitobHouse👈

#haqida📝

Yil yakuni, orzular 🤩

Yil oxiri men uchun nisbiy tushuncha, shunchaki taqvimdagi raqamni o‘zgartirib qo‘yadigandek. Lekin inson rivojlanishi uchun bir to‘xtab olish zarur, ortiga qarab xulosa qilishi, oldinga qarab yo‘l belgilashi uchun bir sabab lozim.

E’tibor berganmisiz, yil oxiriga yaqinlashgani sari odam o‘zida charchoq yoki bo‘shashlik sezadi. Aksincha yil boshiga o‘tishi bilan quvvatga, kuchga to‘la holda, kayfiyati chog‘ ishga kirishadi. Bo‘lmasam oradan 48 yoki 72 soatlik farq bor, xolos. Ha, biz shunday yaratilganmiz, jismoniy holatimizdan ko‘ra ruhiyatimiz doim ustunlik qilgan, bunga sabab tana yerniki, ruh samoda bunyod etilganidan deb bilaman.

Inson uchun orzular kerak. Kim bo‘lishidan qat’iy nazar bir ko‘zlagan maqsad uchun yashaydi. Eng beg‘am yoki yalqov odamda ham reja bor, bir kunini o‘tkazib olish. Reels ko‘radi, uxlaydi, osmonga tikilib yotadi demak reja ko‘ngildagidek amalga oshdi. Inson ana shu maqsadlarning farqi bilan bir-biridan ajralib turadi. Va oxirida qilgan harakatiga qarab mukofotlanadi. Maqsad bilan harakat parallel ketmasa safsataboz bo‘lib qolishi hech gap emas.

Oramizda ko‘pchiligimiz yanvardan boshlab o‘tgan oylarimizni tahlil qilib chiqyapmiz, ko‘z oldimizda o‘tkazgan kunlarimiz gavdalanyapti. Shaxsiy xulosalar, erishilgan yoki erishilmagan marralar tahlil qilinyapti. Yangi yil uchun ro‘yxatlar tuzyapmiz. Bu hammasi o‘zimizning borligimizni his qilishimiz uchun, ha bormiz, tirikmiz, yashayapmiz, 37 mln, 7 mlrd inson ichida o‘zimizni namoyon qilishga harakat qilyapmiz.

✨Orzularim ro‘yxati. Siz ham kichikdan boshlab ro‘yxat qiling, reja qiling va har kuni ularni qayta-qayta ko‘rib turing.

✨Istaklarni belgilab bayram arafasi linkini tanishlarga yuborib qo‘ysangiz, ba’zilar oldinroq amalga oshib qolishi mumkin. Yana "Secret Santa" o‘ynab qolsangiz ham Santangiz qiynalmaydi 😉

👉KitobHouse👈