Jaloliddin Sayid

Chiptali yo‘lovchi

Poyezd jo‘nab ketdi.
Perronda yolg‘iz,
Qo‘lda chipta bilan qoldi yo‘lovchi...
Qattiq ishonar u: chiptasi borlarni,
Poyezd tashlab ketmas, lafzidan qochib.

O‘zi kech qolgan-u, asliga boqsang,
Vaqtini hisobga olmagan, beg‘am.
Endi shu chiptaga, umid bog‘lamoqdan
Bo‘lak taskini yo‘q.
Bechora odam.

Hozir o‘ylaydi u; "Bu g‘irrom. Nega? "
Ammo bunda har ne bo‘lishi mumkin.
Masalan, boshqa bir odam o‘rniga
Boshqasi o‘tirib olishi mumkin.

Yoki konduktorning ko‘nglini qayrab,
Sirli imo bilan va'da qilib don...
Uning haq o‘rnida yotgandir yayrab,
Chiptadan qimmatroq, birorta jonon...

O‘zimni ko‘raman, senga termulib,
Men ham tushgan edim shu kabi holga.
Hayot temir yo‘lin, qay vokzalinda
Aldanib qolganman quruq xayolga.

Men-ku kech qolmagan edim, o‘sha kez
Faqat xato ketdi nedir, bilmadim.
Seni tashlab ketgan manovi poyezd,
Mening kutganimda esa...
Kelmadi.

O, manov chiptalar...
mana bir tugun,
Ko‘z tashlab turaman tez-tez bariga.
Senga achinmadim.
Kechir.
Men bugun,
Ishonmay qo‘yganman Poyezdlariga.

23.08.2024y

@jaloliddinsayid

... Men-ku kech qolmagan edim, o‘sha kez
Faqat xato ketdi nedir, bilmadim.
Seni tashlab ketgan manovi poyezd,
Mening kutganimda esa...
Kelmadi.



@jaloliddinsayid

Odam baʼzan o‘z ovozing sabab ham istiholaga borishing mumkin ekan. "Kimnidir bezovta qilmasin", "Kimgadir xalal qilmasin" v.h.k...
Aslida bemalol, ovozingni erkin qo‘yib o‘qish tarafdoriman.(Baqiroqlik chegarasidan o‘tib ketmagan holda,albatta) Qandaydir ichingdagi bir g‘uborlarmi, bezovtaliklarmi chiqib ketgandek bo‘ladi. Ammo bu video olinayotganda nashriyotda hali odamlar bor edi, shunga...
Na chora, har bir xohish, istak bir bo‘lak sharoit so‘rarkanda. Muhimi sheʼrning eshitguvchiga yetib borishi, pastmi, balandmi bu endi boshqa masala, shunday emasmi?

Sarhisob

Fursat charxpalakdek umrimdan olib,
Yana bir yilimni tashladi ortga...
Qancha kurashlardan chiqoldim gʻolib,
Qanchasin boy berdim,
Kimsan,
Hayotga.

Nelarni unutdim,
unuta oldim,
Koʻnglim xalos boʻldi ortiqcha yukdan.
Nelarni naqqoshdek yodimga soldi(m)
Shu «naqsh»lar tufayli balki tirikman.

Koʻp narsa oʻzgardi, toʻgʻrisin aytsam,
Koʻp narsa oʻzgarmay qoldi, bu ham rost.
Gohida chorasiz yoʻlimdan qaytsam,
Gohida yoʻl topdim qayta turib, soz.

Muhimi, dars olib kamalaklardan,
Ikki ters qirgʻoqqa koʻprik boʻlishni.
Yashashni oʻrgandim kapalaklardan,
Chinorlardan esa
qanday Oʻlishni...

Hech narsa qolmagay dunyoda qoyim,
Faqat yasholsang bas,
Har daming bayram.
... Oʻtgan yillar uchun shukur, Xudoyim,
Xayrli qilgaysan kelgusini ham!!!

@jaloliddinsayid

Izoh

Hech qachon hech kimdan olmadik sotib,
Va yoki birovdan oʻgʻirlamadik.
Baqirib-chaqirdik haq soʻzin totib,
Mayda gap boʻlmadik, mingʻirlamadik.

Muloyim koʻrindi garchand chehramiz,
Lek mudom tomirda qaynab turdi qon.
Goh siltab uzdilar yoqa tugmamiz,
Goh eslab qoldik-ki, aslimiz polvon.

Harqalay, yoʻl halol, soʻzimiz halol,
Qoʻl yuvmay hech qalam tutganimiz yoʻq.
Birovni tepkilab qilmadik zavol,
Birovdan oshib ham ketganimiz yoʻq.

Shukur, yashayapmiz baholi qudrat,
Gohida biz kuldik, goh omad kuldi.
Eee, asli bir chaqa hammasi...
Faqat,
Sen mendan norozi boʻlmasang boʻldi.

@jaloliddinsayid

Darvoqe, 22 noyabr kuni Yozuvchilar Uyushmasida shoira Gulrux Xudoyorova bilan "Xiyobon oqshomlari" mehmoni bo‘lib, uch-to‘rtta sheʼr o‘qigandik.
Suratlariga ko‘zim tushib qoldi hozir va bo‘lishgim keldi... 👇👇👇

Ochig‘i kamera qarshisida doim ham (o‘zim xohlagandek) erkin fikr aytolmayman, negadir. Ehtimol, bunaqa narsalardan uzoqroq sohaning odami bo‘lganim uchundir. (Harqalay hozircha shunday) Aslida avval boshidan aytdimki "Abbos, agar ko‘ngildagidek chiqmaydigan bo‘lsa, videoni joylamay qo‘yaver, xafa bo‘lish yo‘q?"
U "xo‘p" dedi... Va (baribir) eʼlon qildi. 🤦
Aniq bilamanki, agar shu savollarni kimdir shunchaki gurung davomida beradigan bo‘lsa, bundan tuzukroq "sayragan" bo‘lardim. Ammo na chora.
O‘ylaymanki, odam tabiiy jarayonda o‘sib, rivojlanib borganidek, fikrlar ham sayqallanib, tiniqlashib borgay. Balki keyingi suhbatlarda fikrimizni bundanda durustroq bayon eta olarmiz. Har nechuk umid bor...
Kimgadir qiziq bo‘lsa ko‘rib olishingiz mumkin. Xato, kamchiliklari bo‘lsa, uzrli.
(Ha-ya Abbos, rahmat...)

@jaloliddinsayid