Shodi Otamurod

3 КУН ҚИДИРИЛГАН "ҲАЗРАТИ ИШҚ" ТОПИЛДИ

Бугун нотаниш рақамдан қўнғироқ бўлди. "Ҳазрати ишқ" китобини қаердан топсам бўлади, деди қўнғироқ қилган киши. Мендан, дедим. 3 кундан бери қидириб топа олмайман китобни, рақамингиз бор экан, қўнғироқ қилдим охири, деди. Манзил бердим. Етиб келди. Шавкат Алимов деган уста, китобхон экан. Рауф Парфи, Шавкат Раҳмондан гапириб кетди. Амаллаб, битта китоб топиб бердим. Бундай кишига китоб топиб бермасам ҳам бўлмасди.

2025 йилни хайрли иш билан бошладик. Мансур Жумаевнинг "Ҳазрати ишқ" китобини қайта босмага бердик. 15 январда келади.

Китоб “Микрокредитбанк” ҳомийлигида “Чиғаноқ” лойиҳаси доирасида “Ижод нашр” нашриётида чоп этилганди.

30 та китобга буюртма бўлди. Босмахона харажатларини шундан қоплаймиз.

Китоб олмоқчи бўлсангиз, шу ердан ё шахсийга ёзинг. Ушбу рақамга қўнғироқ қилинг: +998909967125.

Китоб нархи 100 000 сўм.

Буюртма беринг.

Эълонни улашинг!

Фозил Фарҳод

👉 https://t.center/fozilfarhod 👈

Бугун 5 январь – истеъдодли шоир Муҳиддин Абдусамад туғилган кун.

* * *

Қай мақсадда келгандим,
Англамадим... Англадим.
Сув томчилаб кўзимдан
Ичимгача зангладим.

Ҳар томон ости-устун,
Остин-устун ер, само.
Бу қандайин кўргулик,
О раб, ё раб, раббано!

Мусичалар ёшидан
Осмон тўла юлдузот.
Мусичалар бошидан
Осмон тўкар юлдузот.

Ерга кириб дарахтлар
Илдиз отар ҳавога.
Ой кўнгил қўйиб ерга
Айланар бедавога.

Недир “чирт” деб узилди,
Сўкилиб кетаяпман.
Қоришиб тупроққача,
Тўкилиб кетаяпман.

Чаппа кетди тириклик,
Не бўлсам бўлаяпман.
Мен ўлиб туғилгандим,
Туғилиб ўлаяпман.

Муҳиддин АБДУСАМАД

ИЗ

Кўкдан ҳали яна қорлар
Ёғишини билмайсанми.
Тафтим билан эриб сувдай,
Оқишини билмайсанми.

Юрагимда из қолдирдинг,
Ёлғизоёқ йўлакдайман.
Бу йўлакдан фақат сен кел,
Фақат ўзинг керак дейман.

Ойна каби музлар, майли,
Синсин қишнинг қиличидан.
Фақат ўзинг эҳтиёт бўл,
Бу кўнгилнинг синишидан.

Зулмат кетса, ҳаётимда
Кундуз бўлсанг, ёруғ бўлсанг.
Дардим сувда оқиб кетар,
Оғриқлардан фориғ бўлсанг.

Шу омонат қорларни ҳам
Эритгувчи қуёшим бор.
Этигингдан сув ўтганда
Товонингда кўз ёшим бор...

Шоди ОТАМУРОД
23.12.2024

СОҒИНЧ

Юрак сўзлаб турибди, жонимнинг танг ҳолидан,
Сени тортиб олсайдим ёлғизлик чангалидан,
Гапни чўзмай қошингда, сўзласам дангалидан.
Меҳрим бошимиз узра бахтдан пардалар ёпгай,
Сени ёнимда кўрсам, соғинчим завол топгай.

Дийдорингиз керак деб йўлимга қарайсанми,
Бири кам дунёсида кунимга ярайсанми,
Нигоҳингда кўп савол – сўзламай сўрайсанми,
Севгим бошимиз узра бахтдан пардалар ёпгай,
Сени ёнимда кўрсам, соғинчим завол топгай.

Айтиб-айтолмаганим – тилимда сўз титрайди,
Эриб кетолмаганим – дилимда муз титрайди,
Ором ололмаганим – кеча-кундуз титрайди,
Севгим бошимиз узра бахтдан пардалар ёпгай,
Сени ёнимда кўрсам, соғинчим завол топгай.

Ёруғлигим, ёр дедим, ёндим, дилда оҳ бўлди,
Сени ёлғиз қўймоғим – бу катта гуноҳ бўлди,
Сабр деган йўл босдим, сафарим узоқ бўлди,
Севгим бошимиз узра бахтдан пардалар ёпгай,
Сени ёнимда кўрсам, соғинчим завол топгай.

Шоди ОТАМУРОД
02.12.2024

***
Мўлжалингдан тирикман, ўқ егувчи йўқ бошқа,
Айтганимни қилмайсан, йўқ дегувчи йўқ бошқа.
Юрагингдан чўғ олиб, ёнаётган хат  –   умрим,
Буни бир сен ўқийсан, ўқигувчи йўқ бошқа.

Шоди ОТАМУРОД
29.12.2024

ЯНГИ ЙИЛ

Агар осмон бўлса вақт деган манзил,
Бошим етдимикин юлдуз, ойига.
Зиндонга ўхшаса агар эски йил,
Кўнглим чўкдимикин чуқур жойига.

Оппоқ қўлларингни узат баҳузур,
Қорларинг юракка малҳам, Янги йил.
Зиндондан тортиб ол, осмондан тушир,
Мени бағрингга бос маҳкам, Янги йил.

Шоди ОТАМУРОД
31.12.2024

***
Дунё шудир, жўра, десам,
Умр оқу қора, десам,
Битмайдиган яра, десам,
Йиғлашини билмаганман,
Билиб,  бағрим тилмаганман.

Дийдор ҳам бир эҳсонмикин,
Унга етмоқ осонмикин,
Ё тушлардай пинҳонмикин,
Тушларида бўлмаганман,
Пинҳон бўлса,  кўрмаганман.

Гулим асрай озоримдан,
Бир кун унгай мозоримдан,
Мадор олгай мадоримдан,
Гулни бевақт юлмаганман,
Пайҳон қилиб юрмаганман.

Кўзёшимга доғлар ювманг,
Кўҳна ердан мени қувманг,
Кўзасида мангу сувман,
Балким ҳали тўлмаганман,
Шунинг учун ўлмаганман.

Жафосиздан жафоли кўп,
Нега бунча заволи кўп,
Бу осмоннинг саволи кўп,
Жавобини билмаганман...
Жим туришга келмаганман...

Шоди ОТАМУРОД
28.12.2024

***

Юрсанг, қадамларинг товушларига
Юрагим уриши мос эмас ҳануз.
Кулсанг, уйғун куй йўқ кулишларингга,
Қўлда торим бордир – соз эмас ҳануз.

Ухласанг, тушларга ихтиёринг бер,
Бир кўриб қайтгайсан тўкис дунёни.
Ўқисанг кўргайсан, ҳаётим – хом шеър,
Ҳолвадир ҳали бу юрак қиёми.

Сўрасанг, кўнгилнинг аҳдин сўрагин,
Яшасанг, нафас ол шеър – сўзим билан.
Кетсанг, манзил бўлсин кемтик юрагим,
Мен сайқал топайин чап кўксим билан.

Шоди ОТАМУРОД
24.12.2024

***
Ҳар бир нафасимда ўзинг мўъжиза,
Ифорингдан кўнгил маст бўлсин, гулим.
Йўлларингни ҳаёт завқ билан чизар,
Оқ ранглар бергани рост бўлсин, гулим.

Қаро тун заҳридан бўлма беҳузур,
Оқ тонглар қутқарсин зулмат жангида.
Сийратинг сингдирсин ҳаётимга нур
Садоқат рангида, вафо рангида.

Бўёқ талашади жисму жон ичра,
Ҳайратга қоришиқ олов ҳисларим.
Худо хатоимни энди кечирар,
Илтижо рангига кирган сўзларим...

Шоди ОТАМУРОД
21.12.2024

ШАҲАРГА

Тун тушганда чўнг сокинлик чулғар сени, шаҳарим,
Шовуллаган анҳорларинг сир айтади осмонга.
Не бахтиёр, не кўргулик лаҳзаларни санаган
Юлдузлари санчилади юрак деган томонга.

Кўрганмисан, билганмисан, хира нурларин сочиб,
Ўзин кўриб-кўрмасликка олаётир чироқлар.
Оқ чизиғи йўлдан-йўлга уланган шу бағрингда,
Сезиб қолдим, дилдан-дилга кўчаётир титроқлар.

Тун сўнгида чўнг сокинлик чулғаб олганда сени,
Дарё бўлиб дардларимни тўкиб солсам осмонга.
Майлими, бир лаҳза бўлсин, шодон, бахтли бўлардим,
Юлдузларни санчмай турсанг юрак деган томонга...

Шоди ОТАМУРОД

Шоирларнинг шифокори, шифокорларнинг шоири
Шукрулло Муродовга.

Ёнимда Шукрулло дўхтир бор, шукур,
Гоҳ дўстим, гоҳ укам, гоҳ шоир дейман.
Дардимизга шифо топганмиз кўп бор,
Аммо шеър айтишига кўп қойил дейман.

Қулоғим, томоғим дард кўрганида
Мен бошқа шифокор излаб юрмадим.
Шеър айта олувчи доктор кўрдим-у,
Укол ушлаган бир шоир кўрмадим.

Дўсти бемор бўлса ҳамроҳдир доктор,
Жарроҳ столидан дастурхонгача.
Бу шеъримда асло муболаға йўқ,
Гоҳида даволар ошқозонгача.

Шукур, саломатман, нима ғамим бор,
Ҳозирча томоқда муаммо йўқдир.
Шароб ичган каби хурсанд бўлардим,
Бир сафар шеъримдан маст бўлса, дўхтир.

Шоди ОТАМУРОД
18.12.2024

Докторимизни оиламиз ва барча ижодкор дўстлар номидан туғилган куни билан табриклайман.

16 ДЕКАБРЬ – САЛИМ АШУР ТУҒИЛГАН КУН

Таниқли шоир, устоз Салим Ашурни мактабдалигимизда – “Шарқ юлдузи”дан, “Ёшлик”дан таниганмиз. Кейин пойтахт таҳсилида...
Салим ака “Туркистон”да салкам 15 йил бош муҳаррирлик қилган бўлса, деярли шунча йил бирга ишлашдик. Ўқишимни тугатар-тугатмас мени ишга олган. Ёш журналистларга ҳақиқий устозлик қилди. Газетачиликнинг барча сиру синоати, машаққатигача ўргатди. Барча устоз шоирлар қатори биз ёшлар Салим аканинг нафақат иш фаолиятига, балки сермазмун ва сермаҳсул ижодига ҳам ҳавас қилиб улғайдик. Шоирнинг ўзига хос шеърияти бор. Тенгқурларимиз “Атиргул” достонини қайта-қайта ўқирди:
Достондаги қуйидаги сатрлар ҳозир ҳам тилимизда беихтиёр айланади:

...Нон каби синдирдим Дунёни...

...Юрагим тош эмас, сиёҳдон,
Дунёни ўзимнинг рангимга бўяйман.
Навоийга ўхшаб, қутлуғ ёдингга,
Атиргул, беш ҳайкал қўяй ман!

...Расмингни ишладим, каттакон
Қуёшга ўхшатиб, темирдан.
Менинг ҳам аҳдларим олтиндан қаттиқ,
Менинг ҳам суягим сабрдан!

...Мен Сурхондарёдан чиқиб кетдим, аммо
Сенинг ҳам қалбингга кира олмадим...

Устоз Салим Ашур бугун адабиёт аҳлининг, шеърият мухлисларининг қалбига кира олган, юракларда маҳкам ўрнашган шоир. Акани бир ука сифатида 60 ёши билан астойдил қутлагим келди.
Табриклайман, Салим ака. Ижодингиз янада баракали бўлсин.