ده ویرِم نی گِمونم نو بهاری بی گُمِت کردم
تاوِسو بی خَزو بی بَلگ و باری بی گُمت کردم
کومی روزِ زِمِسو سالِ برفی بی؟؟!! وِه ویرم نی
کزَه کِز باد بی ، دَم چار چاری بی گُمِت کردم
دسِم قُلفِ ضریح پُر نامرادی حضرت نو بی
شوُئی که گُسنِئی مهمونِ ژاری بی گُمت کردم
بَلی سالی "کَوَر" چو پشتِ هوزِ بی قراری بی
سَرم وِه سینَه حوشکِ پیرَه داری بی گُمت کردم
قِیَحطی سالِ سَختی ، پشتِ کوه ، مینجا الاتَش بی
چَشِم تا گرمِ خاو دِه سا کُناری بی گُمِت کردم
پیایا رَتِنی وه پَر عِرُو دُم رزق و روزیکی
ده سینه ام لونِ خینی بی براری بی گُمِت کردم
سِر و داگِش گریتِم وه نشونَه، (دَنگ تفنگ پیچِس)
دَسِم ده پوسِ و خی گرمِ شکاری بی گُمِت کردم
زرَّه زنجیر بی و شُوئِه خو اُردی رضاخونی
مه سینه ام گُل وه گُل سُمکو سواری بی گُمت کردم
دِه چَن منزل گُوارِس ایل نُونم ، (ری وِه سَرحَد بی)
دِه وَرمو رَه دراز و نا هُماری بی گمت کردم
توکَه خینِم دیاری برفِ ایلاخِ غریوی بی
وه دُورم لیلَه لیلِ گرگ هاری بی گُمِت کردم
ده هرجا زخمناسورِ پیایی سوزِ هورِه بی
ده هر جایی کزَه دَنگ موعَه آری بی گُمت کردم
غرورِ کُت کُتی میراتِ مَنَه هفت پُشتِم بی
وه گُردَه ام زخمِ کُهنه بی شماری بی گُمِت کردم
دِه هرجا عشق بی، غم بی، دِه هرجا درد و داغی بی
دِه هرجا دَنگ کِلی یا بونگ هَواری بی گُمت کردم
وه هر برگی ده تاریخی ورق زم کَل وه کَل افتایی
ده هرجایی دلی تنگِ دیاری بی گمت کردم
گِلی بالا پَریه بی گِلی گیسِ شلالی بی
کَمو برمی، چَشِ کالِ خماری بی گمت کردم
مِئیمش بافَه بافَه شُو وه بالا شُو غلیف هَردی
وه هَر تالی ده گیسش تیلَه ماری بی گمت کردم
دلِ لیوه کجا که گُم نعی و پر پرت نوما
دلم چی وه سرت
چی وه سرت
چی وه سرت نوما
@shaeraneDareshahr
#شعرلری#باصدای_شاعر#حجت_زرینجویی@shaeraneDareshahr