#مثنوی_لُری
ای زمی ای آسمو ای روزگارو
مِ چی افتاو رتمه ده یاد یارو
چی بهار سرخوشی ری وه زوالم
چشه یامه واکنی کوره خیالم
اسر چش امو بوری بی وه گلالی
غم نشس واتخت دل چی کور جهالی
طاق دل ویرونه ی عهد قدیمه
آسمونی بار غم وه دل کشیمه
ملونی ده اسر چش ده آخر کار
ونمه ده گردن یاری وفادار
گل تونی مٍ بلبل سر پَل نشینم
توبمو ،مِ بایه قوش ها ده کمینم
مِ چنو دل واپس عه روزگارم
هی مری کموترکه سرتل چنارم
دیرادیر سیلم نکو بیا وا نزیکم
باده غم سر شیونه وه تال ودیکم
مِ چی بیدی قاصد فصل بهارم
سوز کنم شادی دیئم خوم میوه نارم
زرده خار سرگم واسیر بادم
سوزیه فصل بهار رته ده یادم
بشگنی زنجیر پام وقته بمیرم
جرم دوسی سنگینه تاکی اسیرم
ای اجل ار ها بیای شو وه سراغم
سوز کرده دسه ی نرگس ده مینه باغم
کوگه نامنم که وا هر خشه ی باد
کول وه کول هوا گیرم زه ترس صیاد
ده جومه ی دنیا فره کرده اسیرم
بال خینی،بیخ برد،کی رووه ده ویرم
کوره آوکه بن بَرده تاوسونم
انتظار ریف رَفی ده آسمونم
ار بیای سر بکشی وه حال و روزم..
سوز سوارم رت و باقی من وه توزم...
#جعفرفیلی@shaeraneDareshahr