Ey Sen, Karamidan ko'kni yaratgan!
Ey Sen, Jamolidan yaratgan gulni!
Sen, ey bandasini ishqla sayratgan,
Holini bilgaysan menday bir qulni..
Nomardga egilgan boshimni kechir,
Seni deb to'kmagan yoshimni kechir.
Bir xastayi ogohlik topmadim goho,
Goho bilib turib sarkashlik qildim,
Baridan qo'l yuvib O'zingga keldim,
Beburdlarga uvol lafzimni kechir.
Senga gumroh bo'lgan nafsimni kechir.
Sen, ey g'azabidan cho'lni yaratgan,
Sen, ey haybatidan yaratgan tog'ni.
Sen, ey azobidan dilni yaratgan,
Kechir dilimdagi shu eski dog'ni.
Senga atalmagan onimni kechir,
Sevgidan o'lmagan jonimni kechir.
Bog'boni bilganday gulning holini,
Gar dildor bilmadi dilning holini,
Axir O'zingsanku, tanhoyi Azal,
Har lahza bilguvchi qulning holini.
Sanga bog'lanmagan onimni kechir,
Hajringda o'lmagan jonimni kechir.
Ming bir ranggi bilan tovlandi dunyo,
Tovlandi tog'larning har toshi bilan,
Sargardon kezdimmen yer-u ko'k aro,
G'arib chumolining bardoshi bilan.
Risq axtarib chopgan aybimni kechir,
O'zingga omonat g'aybimni kechir.
Kechir, asrorlaring qatma-qat keldi,
Keldi ruhim aro ishqning hayrati,
Yor desam yoronlar mayus tikildi,
Junayd Bag'dodiyning yo'lin ko'rsatib.
Yodingdan g'ayri har rohatni kechir,
Qadr topdi ruhim qadringni bilsam..
Qadr kechasida umrim arzanda,
Ne baxtki, bosh qo'ysam va o'lsam
San manda, man esa har lahza Sanda,
O'ziga sig'magan ummonni kechir..
Kechir, osmon bilan yer orasida
Qalbimda bir ixlos - go'r, norasida,
Istig'for taskini keldi Arzingda
Yuragimdan uchgan qushlar sasida
Qadr topgan ruhning zorini kechir.
Barini, borini, barini kechir.
Hayot otlig' ilm muborak,
Ey dil, shunday totlig' o'lim muborak.
Yo'l izlab sarsari kezib dunyoni,
Bir kun topganim yo'lim muborak..!
@baxt_va_hayot_maktabi
