YOZUVCHILAR UYUSHMASI XORAZM VILOYATI BO’LIMI

8-yanvar– Shoir, noshir va dramaturg Anvar Obidjon tavallud topgan kun

Anvar Obidjon Farg‘ona viloyati Oltiariq   tumanining   Poloson qishlog‘ida 1947 yilning 8 yanvarida xizmatchi oilasida tug‘ilgan.Anvar Obidjonning birinchi kitobi 1974-yilda «Ona yer» nomi bilan bosilib chiqadi.

Shundan buyon qariyb 20 yil davomida «Masxaraboz bola» (1980), «Olovjon va uning do‘stlari» (1983), «Bahromning hikoyalari» (1984), «Ey, yorug‘ dunyo» (1983), «Ketmagil» (1985), «Bezgakshamol» (1985), «Juda qiziq voqea» (1987), «Oltin yurakli avtobola» (1988), «Dahshatli Meshpolvon» (1990) kabi she'riy, nasriy kitoblari chop etildi.Anvar Obidjon so‘nggi yillarda «Ramazon va Gulmat hangomasi» (1992), «Meshpolvonning janglari» (1994), «Alisher ila Husayn yoki uch dono va o‘g‘ri» (1996), «To‘tiqush», «Topsang hay-hay...» kabi qissa, pyesa va she'r, dostonlarini ham yaratdi.

U «O‘zbekiston xalq shoiri» unvoniga sazovor bo‘lgan(1998).

#Янги_китоб

Бугун бўлимга устоз адиб, носир Ёзувчилар уюшмаси аъзоси Рўзимбой Ҳасаннинг ташрифи дилимизга қувонч бағишлади.
Сабаби устоз бўлимга ўзларининг таниқли ёзувчи Норқобил Жалил билан ҳаммуаллифликдаги янги китоби " Генерал Жўрабек: давр ва қисмат" тарихий китобини туҳфа қилдилар.
Ушбу китоб бугун барча адабиёт аҳли ва китобхонларнинг назарига тушган, яхши эътироф топаётган асарлардан бири бўлганини фахр билан тилга оламиз.

Китоб ижодий жамоаси ҳам улуғ устозлар, ўткир адиблар ҳамкорлигидан иборат эканлиги эътиборга молик жиҳатидандир.

Ушбу янги асар билан устоз Рўзимбой Ҳасанни қутлаб, янги йилда баракали ижод ва мустаҳкам соғлик тилаймиз.

https://t.center/Yoz_uyushmasi_Xorazm_viloyati

Зар талашган ким бунда,
Зор адашган ким бунда,
Боқиб одамга ҳайрон,
Алғов-далғов дунё бу.

Жоҳил қўли гоҳ баланд,
Оқилда дод, оҳ баланд,
Гоҳо тиллари бийрон,
Гоҳо соқов дунё бу.

Жило сочар ранг-баранг,
Дилда берар сас, жаранг,
Кимга синов, имтиҳон,
Кимга сийлов дунё бу.

Тиним билмас кўҳна чарх,
Даркор эмас асло шарҳ,
Айланса неча даврон,
Эркка чорлов дунё бу!

✍🏼Сайёра Самандар

@Samandarqush

Дарахтман мен - сояси қуюқ,
Япроқларим - дилимнинг расми.
Шу азиз эл жонимдан суюк,
Яшнагайман ҳатто куз фасли.

Таралади жисмимдан Сўзлар,
Жаранг сочиб тўрт томонимга.
Баргларимга қўнар юлдузлар,
Туташаман кўк осмонимга.

Новдаларим ураверар барқ,
Мен ҳаётдан бераман хабар,-
Илдизимга тушмаса қуртлар,
Қуримаса илдизим агар!

✍🏼Сайёра Самандар

@Samandarqush

ШОИР ЎЗИ КИМДИР?

Шоир ўзи кимдир? Ўйладим бир он,
Лаҳзада баҳору, лаҳзада исён...
Лаҳза бахтиёрдир, лаҳзада гирён...
Бирда ер-у бирда осмондир шоир!

Бисотида қиммат матоҳи дилдир,
Ишқ деган қисматнинг ҳукмига қулдир,
Бирда хазондир у, бир пасда гулдир...
Ошиқ кўнгулларга сарбондир шоир!

Бўғзида ханжардай ботган Сўзи бор,
Замоннинг кўксига ботган кўзи бор,
Ҳақиқат ўзини кўрган юзи бор,
Мудом эрк истаган даврондир шоир!

Бошига гар қилич келса баногоҳ,
Овозин бўғсалар аждар мисол гоҳ,
Самони титратар у чеккан бир оҳ,
Зулмга ўт қўйган замондир шоир!

Етмоқ истагани сўзнинг бир васли,
Мазҳаби ишқ унинг, ишқ унинг насли,
Бир бора туғилиб,бир ўлмас,асли
Жони кунда минг бор қурбондир шоир!

Гар ўзин истар ким, шоирда кўргай,
Ул дили саждагоҳ, зоирда кўргай,
Ўзин соғинса ким, шоирдан сўргай,
Қалами музаффар майдондир шоир!

Етмиш икки мингта томирдан оқиб,
Замон қўнғироғин бўйнига осиб,
Миллат байроғини кўксига босиб,
СЎЗни ортиб борар карвондир шоир!

✍🏼 Сайёра Самандар

@Samandarqush

#####ҚУТЛОВ.

Бугун 6 январь куни дилбар шоира,  Ўзбекистон Ёзувчилар уюшмаси аъзоси,  Филология фанлари бўйича фалсафа доктори,   Урганч инновацион университети доценти, Турон халқаро фанлар академияси академиги,   "Шуҳрат"  медали соҳибаси Сайёра Самандар туғилган кун!
Эркин Самандар янглиғ улуғ ижодкорнинг  зурриёди,  гўзал фасоҳат ва жозиб нутқ эгаси,  нуктадон олима ва бахтиёр она,  устоз ва мураббий мақомида элдошларимиз ҳамда шеъриятга ошуфта  муҳлислар қалбини  забт этган бетакрор шоирамизни бўлим жамоаси ва воҳамиз ижод аҳли номидан қизғин муборакбод этиб,  ижодига  барака, ишларида улкан муваффақиятлар,  тани жонига соғлик омонлик,  хонадонига файзу барака тилаймиз.

https://t.center/Yoz_uyushmasi_Xorazm_viloyati

#ҚУТЛОВ

Қадрли ижодкорлар. Воҳамизда юзлаб истеъдодлар, қалами ўткир ижодкорлар бугун нафақат воҳа адабий муҳитида балки республика ижод аҳли орасида ҳам ўз сўзига, ўз овозига эга.
Ана шундай икки ижодкор, носир, адиб Рўзибой Қулмат ва журналист, шоир, Бахтиёр Маҳмуд ижоди кўпчиликнинг қалбидан жой олган. Ушбу икки ижодкоримизнинг туғилган кунлари кеча ва бугун ўз оиласи ва дўстлари даврасида нишонланмоқда.
Бўлим жамоаси ва воҳа ижодкорлари номидан биз ҳам ушбу таниқли, қалами ўткир ижодкорларимизни чин дилдан табриклаймиз ва саломатлик, узоқ умр, хонадонига файзу барака тилаймиз.

https://t.center/Yoz_uyushmasi_Xorazm_viloyati

ЮРАГИМ


Менинг дўстим ўта зиёнкор,
Менинг зиёнкорим жуда дўст.
Қоқ кўксимда топган у қарор,
Ғамимни еб кечиради рўз.

Шодлик, қайғу унга барибир,
Қайси келса ўйнай бошлайди.
Вужудимни титратиб дир-дир,
Руҳ-равоним қийнай бошлайди.

У, бу, дейди, ақлим, у, деса,
Исён қилиб, қайнатар қоним.
У туфайли кўзларимда нам,
У туфайли оғрийди жоним.

Батартиб ва тўғри ҳаётни
Ағдар-тўнтар қилиб ташлайди.
Мажнунликдан топади тотни,
Ўзин ўзи тилиб ташлайди

Сендай дўстдан кечдим, деб, шартта
Отиб юборолмайман, юлиб.
Зиён келтирса ҳам минг марта,
Тургани соз кўксимда уриб.

Чунки ҳақиқатан чин дўст у,
То ўлгунча қилмас ҳиёнат.
Айнан унинг бағрида уйғун
Сақланади жоним омонат.

Бахтиёр Маҳмуд.

Бахтиёр Маҳмуд – 1966 йил 4 январда Хоразм вилояти Хива туманида туғилган. Айни замонда Урганч шаҳрида яшайди. 1997 йилда ҳозирги Ўзбекистон миллий университети журналистика факультети сиртқи бўлимини тугатган. Кўп йиллар давомида  «Хоразм истеъдоди» вилоят газетасида ишлаган. Унинг кўплаб назмий ва насрий асарлари маҳаллий ва марказий газета-журналларда, вилоят теле-радиосида, интернетда кўп бора эълон қилинган. 1994 йилда «Шодлик ва ғам» шеърлар тўплами, 2002 йилда терроризм ва диний экстремизмга қарши «Разолат таназзули» ҳужжатли рисоласи, 2013 йилда “Муқаддас юрак” шеърий тўплами нашрдан чиққан. Шунингдек, туркум шеърлари «Ажабтовур болалар», «Уч илдиз», “”Ватан мадҳи созимда” каби жамоавий тўпламларда ҳам ўрин эгаллаган.

Рўзибой Қулмат ижодидан.

Мансуралар

***
Жуда худбинман
Яхши кўраман фақат ўзимни ўзим.
Худбинлигимдан жуда улканман,
Ўтирибман Урал тоғини қилиб курси.
Мободо турсам, эҳе, бемалол
Эверестга тирсагимни тираб туравераман.
Пастга қарайман,
Пастда бозор қайнайди.
Ана, мол бозори,
Анави югуриб юрган даллол.
Мана, мева бозори,
Ана, ишқ бозори,
У ернинг ҳам даллоллари бор.
Ана, мансаб бозори,
Анави шуҳрат...
И-е, ким у шимимдан тортқилаётган?
Э-э, онама-ку,
Унутибман, сиз ҳам борсиз-а
Ахир сизни ҳам яхши кўраман.
Фақат, эҳтиёт бўлинг, қўрқаман,
Янчиб қўймайин деб, улканлигимда.
Кичик бўлиб қоламан яна.
Онамга эргашиб кириб кетаман,
Катта бозор ўртасидаги кичик уйчага.

***
  Мен

Мен, деди хона бурчагида турган кичкинагина, оппоққина мен.
Мен, деди мен баландроқ овозда.                Мен, қичқирди мен хона ўртасига чиқиб. Бошқа олмошлар бунга эътибор қилишмади. Фақат улар жилмайиб қўйди.            Мен, мен, мен, дея чинқириб кўкрагига ура бошлади мен. Кўкрагига ҳар урганида катталашиб, шишиб борарди.         Бақираверма, қулоқни единг-ку, деб танбеҳ беришмоқчи ва ҳатто чаккасига бир шапалоқ уриб, бурчакка турғазиб қўйишмоқчи бўлишди биз, сиз, улар, аммо улгиришмади. Шишиб кетган меннинг гавдаси бутун хонани эгаллаб, биз, сиз, уларни деворга сиқиб қўйганди.            Мен, ҳайқирди мен охирги марта ва ёрилиб кетди. Ичидан чиққан қоп-қора иллат биз, сиз, уларнинг юзига сачради. Семиз меннинг ўрнида кичкинагина, оппоққина мен қолди.              Мен, мен, яна чинқириб шиша бошлади хона ўртасида турган  оппоққина мен…                      Менни тартибга чақиришолмади. Негаки, биз, сиз, уларнинг юзлари қора эди.