Salim Ashur ijodi

ҚОРҚИЗ

Қор маликаси, қор маликаси,
Қишнинг энг суюкли қизи.
Кўзида мовий булутларнинг,
Лабида қуёшнинг изи.

Қор маликаси, қор маликаси,
Олов сочларида қор учқунлари.
Нега юрагимда ишқ таҳликаси,
Нега еру кўкда дил кукунлари?

Қор маликаси, қор маликаси,
Тиллақоши кумуш, енг, ёқаси зар.
Интиқ кўнгилларнинг эркаси,
Осмонлардан келтир ерга оқ хабар.

Қор маликаси, қор маликаси,
Этигининг ғарчи-ғурчи маънодор.
Қўлларига шамол тутади жонин,
Қадамига майин тўшалади қор...

Қор маликаси, қор маликаси...


Салим АШУР

✍Salim Ashur – Siz ertaga kelasiz...

🎙Erkin Bozorov ijrosida

Inja san'at youtube sahifasidan olindi.

https://t.center/Surxonadabiyoti

ЯНГИ ЙИЛ

Ўрмондан келди товуш:
Қорбобо кийди ковуш...
Кўк тоғлардан пастга туш,
Янги Йил-Янги Йил-Янги Йил...

Ҳамма шошади уйга,
Соат шай ёруғ тўйга,
Майин чайқалар куйга –
Янги Йил-Янги Йил-Янги Йил...

Яна бир-икки қадам,
Ўзгарар бирдан олам,
Ўзгарамиз Сен, Мен ҳам –
Янги Йил-Янги Йил-Янги Йил...

Эски тўнни бугун еч,
Ғам кўрмайлик энди ҳеч,
Келақолгил бўлмай кеч –
Янги Йил-Янги Йил-Янги Йил...


Салим АШУР

* * *

Хайр, сизнинг йўлингиз бошқа,
Хайр, мен ҳам четга бурилдим.
Баргга ўхшаш кўзларингизга
Кўзим билан тикка урилдим.

Шамол сизни бир япроқ янглиғ
Улоқтирди мендан – дарахтдан,
Қанотлари синди қушларнинг,
Подишоҳлар йиқилди тахтдан.

Хайр, олдга ним эгиласиз,
Сочларимни тарар қўлингиз.
Кетолмайсиз. Карахтсиз. Аммо
Қўлингиздан тортар йўлингиз.

Ростин айтсам, талай қизларни
Ширинликдай татиб кўрдим мен.
Таманнолар жонимга тегса,
Кўчаларда ёлғиз юрдим мен.

Бироқ сиздек асални ҳали
Учратмади ҳеч, қари жаҳон.
Мен билган бу лаззат қошида
Новвотлар ҳам тошдек нотавон.

Ширинлик тез баъдга тегади,
Сиз кўнглимга охир урдингиз.
Буни сезиб бир сафар саҳар,
Кетаман, деб йиғлаб турдингиз.

Нима дердим? Боринг. Соғ бўлинг,
Қўлларимда қўлингиз изи.
Сочларимни оловдай ўртар
Сочингизни муаттар иси.

Хайр, бошқа-бошқа йўлимиз.
Кўзларингиз тўлмасин ёшга.
Қанот қоқар икки қўлингиз,
Хайр, сизнинг йўлингиз бошқа.

Салим Ашур

* * *

Турасиз, пальтони киясиз енгил.
Сизни қучоқлайди гулчамбар,
Эй ғариб, эй гадо, девона сингил,
Эй шамшод, эй сарв, эй мушки анбар.

Лабингиз япроқдек дилдироқ, титроқ,
Эй довул, селларда келган дарахтим.
Тиригимда ўзимнинг бахтсизлигим, эй,
Ўлсам, мендан кейин қоладиган бахтим.

Кўзингиз яшринай деса – паноҳ йўқ,
Севги либосини кийган таҳлика.
Эй кулгичи менинг қайғумга тобут,
Эй бели ингичка малика.

Юрса – этигидан из қолмайдиган,
Кетмакка шайланган эй гули раъно,
Қўлингиздан тутиб қололмас кўзгу,
Сизни чорлаётир олтинчи маъво.

Сочини дуррага бостирган бераҳм,
Кўзгуга ёнлама қараган улфат.
Қўлларим тарбия кўрмаган, бешарм,
Китоб, дафтар, қалам – бир хона кулфат.

Менгамас... эшикка ярим суяниб,
«Сизни ҳечам яхши кўрмайман» деган,
Ингичка кўрсатгич бармоғи ила
Пучуқ деб бурнимнинг учига теккан.

Эй кўнгли ўксиган. Ўксикларида
Фаришта, ажина тирилган эртак.
Эй ўнта бармоғи ўнта атиргул,
Эй ҳар бир бўғини биттадан куртак.

Ўзгага аталган шеърларни ўқиб,
Мен учун жонини жабборга тиккан.
Ўзи очунларда ягона, бироқ
Менингдек бедаво, куюкни севган.

Кифтимга бошини гул мисол қўйиб,
Муҳаббат сўраган телба тиланчи,
Дунёни кийимсиз кўрмак истаган,
Эй учтами-тўртта расида, ғунча.

Кетса – қадамининг товушларини
Менга бир умрга қолдирган ғамхўр.
Севмаса – йўлидан адашадиган,
Севса – йўл-кўчасин кўрмайдиган кўр.

Тонгда Художонга ибодат қилиб,
Тунларда ўзини итга ташлаган.
Чегарадан уёқ-буёққа ўтиб,
Ҳар куни ғазовот, ғавғо бошлаган.

Қуёш ҳам холининг ярмин илғаса,
Ярмин илғаёлмас қари дўкондор.
Дўконда ҳамён бор. Ҳамёнда эса
Тирик бостирилган икки исён бор.

Боққа оқар сувдек кириб келганда
Ҳайратдан дарахтлар қарсиллаб синар.
Осмон томоғига тоғлар тиқилгай,
Шошиб қиличларни ютади қинлар.

Сиёҳ қоши билан йўлимни тўсган,
Эй кўзлари рўё, киприги гўё,
Соямга тўр солган сайёд сояси –
Чиройли, мукаммал, азалий дунё.

Йигирма тўрт йилда кириб ҳосилга,
Ўзини қисматга топширган фасл.
Эй шамшод, эй сарв, эй мушки анбар,
Эй ғариб, эй гадо, эй телба сингил.


Салим Ашур

✍Salim Ashur – Siz ertaga kelasiz...

🎙Erkin Bozorov ijrosida

Inja san'at youtube sahifasidan olindi.

https://t.center/Surxonadabiyoti

#Sevimli

Кетаяпсиз. Бир нафас тўхтанг,
Ўгирилинг. Жилмайинг. Қайтинг...

✍ Salim ASHUR

@SalimAshur

* * *
Беркитдим мен жонни қафасга,
Кўрмасин деб сени ҳавасга,
Лекин келди сўнгги нафасга.
Чиқса чиқсин шу жон... йўлингдан,
Фақат олиб... қўйма қўлингдан.

"Жоним чиқадур..." сени кўрай деб...


Салим Ашур

Наҳот, яна соғинаяпман...
Юрагимда югурар титроқ.
Тун ярмида уйғонаяпман...
Кўзларини уқалар чироқ.

✍ SALIM ASHUR

🎤 JUMANAZAR URALOV

BIZNING KANAL 👇👇

https://t.center/qalb_daaftari

* * *

Кўзларимдан қувиб уйқуни,
кўзларимга қуйдим ёғдуни.
Юрагимдан юлиб қайғуни,
шудгорларга сочдим туйғуни.

Юрагимнинг ярми гул бўлди,
ярми эса куйиб кул бўлди.

Салим Ашур

КУЗ

Осмонда куз сояси,
Ерда кузнинг ўзи бор.
Боғларда – ҳимояси,
Япроқларда кўзи бор.

Қарға чақар сўзларни,
Тўши қайнар, гупирар.
Ёз куйдирган бўзларни
Меҳнаткашлар супирар.

Олам бунча бетартиб,
Олам бунча тўзғиган.
Осмон туссиз, оч, ғариб,
Узуқ хаёл изғиган.

Дунё – бир устахона,
Хиёбон – чала расм.
Эй, вайрона ғамхона,
Сўнмас сенга ҳавасим!

Юрт деган доирада
Ҳар хас азиз, қадрдон,
Ҳар зарра, ҳужайрада
Бўй чўзар Ўзбекистон!

Салим Ашур

БОЛАНИНГ ЙИҒИСИ

Уйғотиб юборди карахт тунни
боланинг йиғиси.

Боланинг йиғисидан
ҳар ерларга сочилди осмон юлдузлари,
эски замбарак ўқи каби
ғилдираб узоқларга кетди ой,
уфқлардан ўтди ой.

Уйғотиб юборди
боланинг йиғиси
ухлаб қолган уйқуларни...

Салим Ашур

#Sevimli

* * *

Шунча йиллар ўтди. Кўришиш
Иккимизга насиб этмади.
Менда иш кўп, сенда-чи, ташвиш,
Тақдир бизни қайга элтмади.

Боғ. Ўриндиқ. Изҳор ва инкор.
Ўртанаман соғиниб дилдан.
Ёмғир, қорлар ёққан у баҳор
Нега ҳануз чиқмас ёдимдан?

Эсингдами, кўп гапирардим,
Эсингдами, эшитардинг жим.
Сенга яхши кўринай дердим,
Лекин яхши кўринган у ким?

Сочларимга оқ оралади,
Ораларми қалбингга титроқ,
Қисмат мени кўп қоралади,
Айт, қўлларинг ўшандайми – оқ?

Мағрурмисан илгаригидек,
Қилмайсанми ҳеч кимни писанд,
Агар борсам, бўлмаса йўл берк,
Бўласанми хафа ё хурсанд?

Мени жуда қизиқтиради
Кўзинг, узун бармоқларинг ва
Юрагимни тирилтиради
Бизни гап-сўз қилган тоифа.

Эсингдами, тутган гулларим
Қўлларингга етиб бормасди.
Фақат сенга элтган йўлларим
Кет десанг ҳам сендан қолмасди.

Сочларингнинг тўлқинларида
Оқиб кетди қанча кўзларим.
Юлдузларнинг ёлқинларида
Кўрсатмасдан қанча йиғладим.

Сен билмайсан, туриб бекатда
Эртаю кеч термулар эдим.
Деразада ва ё бир четда
Кўринмасанг емрилар эдим.

Ўтди йиллар. Эсласам сени
Ўша ёмғир ёғар ёдимдан.
Боғ. Ўриндиқ... қийнайди мени,
Чиқиб кетмас ҳеч ҳаётимдан.

Салим АШУР

@SalimASHUR

#Sevimli

* * *

Демадим, ҳеч нарса демадим сизга,
Айниқса, севаман деганим ёлғон.
Минг марта йўлиқдим энг гўзал қизга
Ва ҳар гал ўзимни қилдим қатағон.

Демадим, ҳеч нарса сизга демадим,
Яхши кўраман деб алдадим фақат.
Ҳеч қачон ҳеч кимни ҳечам севмадим,
Қилолдим энг нозик зулмга тоқат.

Демадим, демадим сизга ҳеч нарса,
Сиз кимсиз? Илк бора кўряпман сизни.
Менга ёқасиз деб алдадим роса,
Алдадим алданмас кулгичингизни.

Ҳозир кетаяпман, эрта келаман,
Кўрмайман кўзингиз ёшлар тўкканин.
Дунёда мен битта қизни севаман...
Севаман дунёнинг барча тиканин.

✍ Салим АШУР

@SalimASHUR

#Eski_Daftardan

ХАЙРЛАШУВ

Ҳаво тез ўзгарди. Қадаҳ бўшади.
Айвоннинг четида юлдуз ўчади,
Ярим ой кўнгилга ярим кўчади,
Кеча қадаминга қорлар тўшади, –
Энди бор.
Энди бор.
Энди бор.
Худо – ёр.
Худо – ёр.
Худо – ёр.

Тайёра ўтмоқда кўк қирғоғидан,
Балки қувилгандир ўз аймоғидан,
Нурлар томчилайди нурчироғидан,
Шаҳарлар ўтади сўлу соғидан, –
Сен ҳам бор.
Сен ҳам бор.
Сен ҳам бор.
Худо – ёр.
Худо – ёр.
Худо – ёр.

© Салим АШУР

@SalimASHUR

Салим АШУР

КУЗГИ ЯПРОҚЛАР

Йиллар рангларини ўзгартирмоқда,

Куз ёлғиз кезади яқин қирғоқда,

Оловранг тўлқинлар оқар ирмоқда –

Кузги япроқлар, кузги япроқлар...

Ёш боғни айрилиқ тирилтирмоқда,

Маҳкума дарахтлар юпун титроқда,

Йўлини йўқотган севги сиртмоқда –

Кузги япроқлар, кузги япроқлар...

Кўприкда учрашди иккита достон,

Битта ўриндиққа келди тўрт томон,

Йиғлаган куз эмас, эски патефон –

Кузги япроқлар, кузги япроқлар...

Олис чеҳранг каби милтирар қуёш,

Ўчган муҳаббат ва узилган бардош,

Барини бир четга супурар фаррош,

Тонгги изғиринда изиллаган ёш –

Кузги япроқлар, кузги япроқлар...

* * *

Ёғаётган ёмғирда – малол,

Шамолларда тўзди сўзларинг.

Тун пардаси зич тушган. Хаёл

Сураётган сенинг кўзларинг.

Борган-келган ул-булларимиз

Бўлмас энди дўсту дугона.

Бир-бирига зор қўлларимиз

Бири-бирига энди бегона.

Тупроқларга чўкди изимиз,

Исмимизни унутди тонглар.

Бир-бирини кутган кўзимиз

Бир-бирининг йўлига томар.

Кипригингга ҳаловат инди,

Кўзларингдан ўпдими биров?

Қўлимизни иситмас энди

Кўнглимизни куйдирган олов.

Ёғаётган ёмғирда – малол,

Шамолларда тўзди сўзларинг.

Тун пардаси зич тушган. Хаёл

Сураётган сенинг кўзларинг.

СИЗ ЭРТАГА КЕЛАСИЗ


Муаллиф: Салим Ашур.


Ижрода: Музаффар Ҳафизович.

БАЙРОҒИМИЗ

Байроғимиз – шонимиз,
Еримиз, осмонимиз,
Қиссамиз, достонимиз,
Эту устухонимиз,
Ҳилпира баланд-баланд,
Қуёш парчаси монанд.

Байроғимиз – боримиз,
Номусимиз, оримиз,
Ёмғиримиз, қоримиз,
Яшнаган диёримиз,
Ҳилпира баланд-баланд,
Ойнинг парчаси монанд.

Байроғимиз – сўзимиз,
Пок юз, кўрар кўзимиз,
Бахмалимиз, бўзимиз,
Ўзлигимиз, ўзимиз,
Ҳилпира баланд-баланд,
Ҳаёт парчаси монанд.

Байроғимиз – аҳдимиз,
Шиддатимиз, шаҳдимиз,
Ёғий олмас тахтимиз,
Гуллар очган бахтимиз,
Ҳилпира баланд-баланд,
Хаёл парчаси монанд.

Байроғимиз – йўлимиз,
Кўкка етган қўлимиз,
Равон ўнгу сўлимиз,
Бизнинг довул, дўлимиз,
Ҳилпира баланд-баланд,
Орзу парчаси монанд.

Байроғимиз маррамиз,
Тупроғимиз, заррамиз,
Ў, тузалган ярамиз,
Ў, чорлов, ў, наърамиз,
Ҳилпира баланд-баланд,
Осмон парчаси монанд.

Байроқ – қанотимиздир!
Байроқ – нажотимиздир!
Байроқ – бунёдимиздир,
Ҳайрат, ҳаётимиздир!
Ҳилпира баланд-баланд,
Ватан парчаси монанд!


Салим АШУР

ИБРОЙИМ ЮСУПОВ

АЙТ СЕН АЖИНИЁЗНИНГ
ҚЎШИҚЛАРИДАН

Айт сен Ажиниёзнинг қўшиқларидан,
Йиғласин ёр ишқи бағрин тешганлар,
Бўзласин юртидан айри тушганлар,
Айт сен Ажиниёзнинг қўшиқларидан.
Созин сабо ёдлаб, сўзин ел билган.
Бир шоир дунёга келдию кетди,
Мажнунтол ортидан ойга термулган,
Бир дилбар тушимга кирдию кетди.
Қўшиқ дарё-дарё нур бўлиб оқсин,
Севгисиз қалбларга ишқ ўтин ёқсин,
Қиз йигитга жилва-ноз билан боқсин,
Айт сен Ажиниёзнинг қўшиқларидан.
Айт сен “Бўзатов”ни нағмага солиб,
Дили ёнмаганнинг бағри тош бўлсин,
Қорақалпоқнинг кўҳна дарди қўзғалиб,
Бу кунга боққани сари маст бўлсин.
Шоир кезган чўлда бўстонлар қатор,
Бекор бўлиб кетди замон нобакор,
Бир илҳом парисин кўрдим ишвакор,
Айт сен Ажиниёзнинг қўшиқларидан.
Мен уни тингласам қолмай тоқатим,
Кўнглимда сайраган мастона булбул.
Мен уни тингласам туққан элатим,
Ер жаннати бўлиб кўрингай буткул.
Юлдузларни ерга қаратмоқ бўлсанг,
Ёмон шоирларни уялтмоқ бўлсанг,
Агар мен ўлганда тирилтмоқ бўлсанг,
Айт сен Ажиниёзнинг қўшиқларидан.

Абдулла Орипов таржимаси