UMID XUDOYQULOV

Menga ham firibgarlar telefon qilishdi
#firibgar

Rossiyada aholini firibgarlardan ogohlikka chaqirib, "Go‘shakni qo‘yib qo‘y" ijtimoiy aksiyasi o‘tkazishgan. Aksiya doirasida turli vajlar bilan qo‘ng‘iroq qiluvchi firibgarlardan ogohlantirishadi va gaplashib o‘tirmasdan go‘shakni qo‘yib qo‘ying, deyishadi.

3 kun oldin menga ham birinchi marta shunaqa firibgar telefon qildi. Rus tilida gaplashdi. Shahar ichki ishlar bo‘limida tergovchiman, Sizga oid jinoyat ishi ochilgan dedi.

"Bir ayol sizning nomingizdan soxta ishonchnoma tayyorlabdi va bugun "Ipoteka bank"ga borib, sizning hisobingizdan 20 mln so‘m yechmoqchi bo‘libdi. Oxirgi daqiqalarda bank xodimi ishonchnoma soxtaligini sezib qolibdi, hozir jinoyat ishi qo‘zg‘atganmiz" dedi. O‘zimni bilmaslikka olib, "yo‘g‘ey, shunaqa bo‘libdimi, voooy, endi nima qilamiz" deb eshitdim. "Biz sizni himoya qilamiz, ayrim ma’lumotlaringiz kerak" dedi. Bir nechta savollar bergandim, negadir tezda aloqani o‘chirib qo‘ydi va qaytib telefon qilmadi.

Aytgancha, gapining boshlarida qo‘ng‘iroqni uzib qo‘ydim. Qayta telefon qilganda, umuman boshqa raqamdan chiqdi. Bu ham firibgarlarni aniqlashning bir usuli. Chunki ular odatda xorijda bo‘ladi hamda roumingdan telefon qiladi. Rouming orqali qo‘ng‘iroq qilinganda esa har safar turli mahalliy raqam chiqadi.

Eng qizig‘i, ularda mening ism-familiyam bor ekan. Demak, millionlab o‘zbekistonlikning shaxsiy ma’lumotlari internet kengliklarida kezib yuribdi. Bu jiddiy xavf hamda kiberxavfsizlikka mas’ul idoralar uchun jiddiy savol.


👉 @xushnudbek 👈