#غزل_تبریکَرزنی، جینگاسر
دَس بَکِشیمِه شِه لَتِه لِتکارِه
سر سو بَزومِه صَدری آ نِدارِه
دِتا خال تیل دِلِه نِشاء بَزومِه
بینجِ خوشِه بَیتِه مِه سرِ رارِه
خِدِه انگورِ خوشِه جِر هِکِتِه
وِنِه بو دَپیتِه مَلِه مِلارِه
مِیّون کِمبِه زمینِ دِم تا گوشّه
اِشِمبِه بَرِسی بینجِ سِمارِه
بینجِ خوشِه نِیّه! خِدِه طِلائِه
جانِ خِدا تِه قدرِتِ بِلارِه
اِسا دَس به دهرِه شومبِه زمین سر
سر دِمبِه خِشالی جا شِه صدارِه
کَر وَندِمبِه کَسو رِه دَسّه دَسّه
دَچینم پِشتِه پِشتِه کَر کوفارِه
بَگِردِم خِدائِه روزی رَسونّه
خِر آ برکِت هِدا اَمِه دِیمارِه
وِنِه خرمِن چادِر رِه لا هاکِنِم
کَر رِه دَشِندِم دَس هایرِم لیفارِه
غَزِل آ کَهر رِه جینگا دَوِندِم
تا وارِش نَکِتِه مِه لِک آ لارِه
اَسبُون بَتِجِن نِخِل بُورِه هِوا
هابَیّه بَیّه بِن هایرِه صحرارِه
هِپاجِم فیّه جا زِلالِ بینجِه
اوِل در هاکِنِم مالِ خِدارِه
کِیلّاک جا بشمارِم یک تا دِوازّه
نومِ جانِ خِدا آ مصطفی رِه
کیسه که رَج بَوّه خِروار به خِروار
دلخِشی هَسّه که اینجِه دیاره
دَس به دِعا بوشیم خِدا رِه ویمبِی
پِئی دِمبِی آسِمونِ مِیّارِه
صَدری، نِدا: نامِ شالی (برنج)
خِرمِن چادِر: چادری است مخصوص خرمنکوبی
لیفا، فیّه، کِیلّلاک یا کِیلِه: از اثاث و ابزار کشاورزی مخصوص شالیکاری که در زمان گذشته کاربرد داشته است.
جینگا: حرکت اسبان با قدری سرعت به گِردِ چادر خرمن و کوببدن شالی را (جینگا زدن) میگویند.
غَزِل، کَهر: اسم اسب است، غَزِل اسبِ سفید، کَهَر اسبی برنگِ مایل به قهوه ای
ها بَیّه بَیّه: یعنی ای ماشاالله کارها داره خوب پیش میره
هِپاجِم و فّیّه کردن: جداسازیِ خاک و خاشاک از شالی
مالِ خِدا: قدری از شالی را از میان خرمن به تهیدست دادن
کِیلّاک یا کِیلِه: بمعنای پیمانه است.
هر دوازده پیمانه (کِیلّاک) یک کیسه شالی است، دو کیسه شالی را یک خروار گویند. یعنی ۱۲۰ کیلو گرم،
یعنی همان ۲۴ تا (کِیلّاک) در دو کیسه که وزن هر کیسه ۶۰ کیلو گرم است.
✍ #علی_شهمیری_سوادکوهی@lafoormycountry🌺🌼🌺🌼🌺🌼🌺🌼🌺