شپ ءِ آزمان
(خالق ارمان)
پہ من ءَ روچ ءِ آزمان دِگرے
روچ ویرانیں ڈاکے ءَ کپتگ
یک ءُ تھنا زمانگ ءِ پاند ءَ
سر جن آں سر جن آں، رو آں کہ رو آں
چِست بنت دنزءُ لُوڈ وھمانی
چونیں دروھاپے چول جنت بُرز ءَ
کمّیں دُور اِنت ناں باز نزّیک اِنت
روچ آسے کہ آس نوشان اِنت
شیشگیں برانزاں وھد پروشان اِنت
پُکّی ئیں جمّراں لگوشان اِنت
روچ تھنائیں ڈاکے ءَ کپتگ
من وتی اُمر ءِ ساھتاں جیڑ آں
زندگی چونیں اِلّتے باریں
پہ من ءَ روچ ءِ آزماں دگرے
روچ بے نامیں جَنگے ءَ گِپتگ
جنگ باریں کدی ھلاس بہ بیت
باریں شپ چوں تھار بیت باند ءَ
باریں استار روک بنت کہ نہ بنت
کسّے پؤراں ھساب کنت کہ نہ کنت
ماھیں گیوار روک بنت کہ نہ بنت
پاسپان اَنت چِرِت، توارانی
گُنگیں گویاک گالوارانی
مِِھر ءِ بام ءُ سھیل در کا اَنت
چاریں پاسانی کِسّہ اِش گون اَنت
روچ بلکیں وتی دل ءَ جیڑ ایت
کہ شپ ءِ آزمان، دِگہ ھلکے
بے دیاریں چراگ چمّانی
لیب کنت گوں مِجازیں استاراں
ماھِکان پاس جنت وتی شھر ءَ
شپ گشے ایمنیں پناھگاھے
مان پوش اتگ تھاری ءَ پوشاک
واب کپتگ زمانگ ءِ ارواہ
ھو شپ ءِ آزمان دِگہ چیزے
پہ من ءَ روچ ءِ آزمان دِگرے
@balochilabzank
