آزمانک : گُڈّی کِسّـہ ------------------------------------------------------------------- کسانی ءَ من ھرشپ چہ بلُّک ھاتون ءَ کِسّہ گوش داشتگ - بـے کسہ ءَ واب نہ کپتگ آں ءُ پد ءَ ھرشپ نوکینے لوٹ اِتگ - مات ءِ لاپشود ءُ لاڈُک بیتگ آں پمیشکہ گَلنازی کتگ ، اِشکُتگیں کسّہ دُبَر گوش نہ داشتگ - بلّک ھاتون ءَ باز کسّہ یاد اَت - داں سالے کَپّـے ءَ من تماشا کُت - پد ءَ یک شپـے آئی ءِ کسہ کُٹّ اِت اَنت - وھدے آورتگینے بُنگیج ئِے کُت ، گڑا من کوکّار کت کہ اے من اِشکُتگ - بلّک ھاتون ءَ گشت ” تو کسّہ ھلّینتگ اَنت ، نوکیں چہ کجا بیاراں ؟“ بلے من گِرّ بَست - آ سھتُکے بـے توار بوت - گُشئے وتی دل ءَ کِسّھے ساچگ ءَ اَت ءُ پد ءَ گُشت ئِے : ”ھست اَت نماسگے ، ھست اَت بَلُّکے - نماسگ ءَ ھرشپ بلّک ءِ کِرّ ءَ کسّہ گوش داشت - بـے کسہ ءَ نہ وپت - تئی وڑ ءَ ھر شپ نوکینے لوٹ اِت ئِے - ھو ، ھو ، یک شپـے بلک ءِ کسہ کُٹ اِت اَنت - تیوگیں شپ ءَ نماسگ واب نہ کپت - بلّک ءَ تور اِت - دِیر دگہ میتگے ءَ بلّک ءَ کوھنیں دَزگُھارے ھست اَت کہ باز کسّہ ئِے یات اَت - بلّک ءَ گُشت رواں یَپّاریگے دزگھار ءَ چاراں ءُ پہ نماسگ ءَ لھتے کسہ ھم کاراں گوں - اِندگہ روچ ءَ بلّک سر چادر بوت - میتگ دیر اَت - بلّک شپ کپت - سرشپ ءَ میتگ ءِ نزّیک ءَ رَس اِت بلے تھاری ءَ بزّگ ءَ مَیم نہ کُت ءُ کورچاتے ءَ کپت ءُ مُرت ! “ بلّک ھاتون ءَ کِسّہ ھَلّینت - ” گڑا بلّک مُرت ؟ “ ” ھو منی چُک ، بلّک مُرت -“ مئے میتگ ءِ نزّیک ءَ ھم کورچاتے ھست اَت - من جست کت ” آ کورچات مئے میتگ ءِ کورچات ءِ وڑینے بیتگ ؟“ ” ھو ، ءُ بلّک ھم منی وڑینے بیتگ “ من دل ءَ گُشت بلکیں دیمتر ءَ ھمے گُش اِیت کہ نماسگ ھم تئی وڑینے بیتگ بلے آئی ءَ چو نہ گشت ءُ لَٹّ ءَ جِکّ دیان ءَ شُت ءُ وتی نپادانی سر ءَ وپت - من داں دیراں واب نہ کپتاں - آ شپی من دگہ وڑیں واب دیست - کورچات اِت اَنت ، تہ ءَ بَلُّک کپتگ اِت اَنت ءُ ڈنّ ءَ نماسگ نِشتگ ءُ گریوگ ءَ اِت اَنت - من داں مُدّتے ءَ گُشت زاناں کورچات ءِ کِسّہ وتگڑینے بلے مَستر بیتاں گڑا زانت کہ آ شپی بلّک ھاتون ءَ وتی دزگھار ءِ کسّہ آورتگ اَت ! 📕شیتان ✍ڈاکٹـر_ناگمـان @balochilabzank