الشاعر محمد منير المياحي✍️

#محرم_الحرام_١٤٤٤هـ
#الليلة_الخامسة
لمولاي مسلم بن عقيل(صلوات الله عليه)
_______
الكوفه رجفت من دخلها الضرغام
مسلم اعله الجيش كلش محتام
حيد لو يخزر يشل كل الجيش
غضب نازل بيهه ما يـرحم گام

ردم راس براس_من دخل ليهه
كسر ظهر الخيل_وكسر رجليهه
برجله داس الگوم_يشبخ اعليهه

دفان وبسطوح الكوفه
_______
هاشمي وبالحومه نازل فرّاس
ادخيل مسلم غيرته من عباس
ياهو يشرد لو اجه اگباله العين
واللي يفتر ما لگه بجسمه الراس

تاه دربه وضاع_كلمن يشوفه
هوه ملك الموت_صار بالكوفه
كلت كل الگاع_شسوت جفوفه

ظل سيفه يبلع بالوادم
_______
هذا ابو طاهر ابو راس الحار
يصيح ياحيدر إذا هـد و غار
هيه جلمت ياعلي تيبس گلوب
عله گلوب العسكر تصب جن نار

يبس گلب الگوم_من صرخ حيدر
الزلمه يزحف گام_يمشي مايگدر
و الركض فرار _وبقى يتعثر

صاحوله حيدرها الثاني
_______
وين ابو فاضل يشوف الجيدوم
مسلم الـمـا خله عالناس هدوم
هما هاشم كلهم احيود اسباع
ماكو عركه ما يكسرون خشوم

فرك خشم الجيش_بنزلت اجدامه
سحگ فوك ارگاب_وعوج جم هامه
العركه زلمه تريد_و شاد احزامه

واتحزم بحزام الكافل
_______
خادم الحسين محمد منير المياحي

#محرم_الحرام_١٤٤٤هـ
#الليلة_الخامسة

مولاتي حميدة (ص) تشكو آلآمها
الى والدها مولاي مسلم (ص)
___

خَيمت ملامحي يتمي عليه
عذاب...انتظار...مشتاگة اريدك
شـوگـي ذبحني مـو بـديـه
الجروح...تنوح...طيبتهه بيدك

ياهي مثلي
اتاني ابوها__ومثلي خانكها السفر
يـاغـريـبـة
مـن دمعها__خدها نصين انحفر
امن اشتياگي
من حنيني__عاشرت بس القهر

مسلم اريدك طالت حسرتي
اگضي نهاري وليلي بشوغتي
شنهو اليعطلك گـلـي بالسفر
مَـتحن عليه وتحـن لشوفتي

___

ليلي يمرني بس للمناحة
المنام...حرام...للعدهه غايب
ضليت الوج وماعندي راحة
انحنيت...بقيت...بس للمصايب

جاي اتاني
وكلي ارجف__خلصت حيل الگلب
عيني ذبلت
بالمخيم __وأنه اصد أعله الدرب
الفرگة تكتل
وانه طفله__ومرني من زغري غرب

الغربة عشتهه اناطر جَيّتك
ماتت عذاب ولوعة ابنيّتك
مو تدري اتعب دونك وانهضم
همي وعذابي يروح بشبگتك

___

الوياها ابوها تعيش بفيايه
عزيز...بعيد...من وين اجيبه
افراگك ضمه وبس انت مايه
يطيب...الحبيب...اليشبگ حبيبه

لو تجيني
لو اموتن__ذبلت اوراق الغصن
رد يمايي
وخل افرفح__راحتي بشم المتن
غير ابوها
الطفله گلي__يلمهه بلا ياحضن

ياهو اليلمني وكلي اتطشرت
مـانـي حميده هسه اتغيرت
صرت شكبرني وجرحي اشمكبره
بالفرگة كلش جبيرة بَيّنت

___

ظل اشتياگي يكتل دليلي
حَنين...ونين...جفني شيطبگه
امتيهه نهاري وامتيهه ليلي
غرام...هيام...اليفضه ملگه

من اشوفك
كلشي ينفض__وانسه لحظات الالم
اتخيلت لحظه
انت يمي__وكلشي بالروح ابتسم
بس نصيبي
ابقى اتاني__وجَيّتك صارت وهـم

بيمن اقـنّـع دلـيـلـي ويقتنع
شنهي اگله اليرافس بالضلع
سَـيّـر عـلـيـه مـابـيـه انتظـر
ذبلانه بنتك مثل ذبلت شمع

___
خادم الحسين محمد منير المياحي

#قصائد_محرم_الحرام
#الليلة_الخامسة

خطاب مولاتي حميدة(ص) لإبيها مسلم بن عقيل(ص)
▪️▪️▪️▪️▪️▪️▪️▪️▪️▪️▪️▪️▪️▪️

بوية غربة وداعت عيونك يمسلم
بوية صعبة الدمع ظل وجهي يجسم
بوية خلصنه الكلام
بالغرب مالك عمام
▪️▪️▪️▪️▪️▪️▪️▪️▪️▪️▪️▪️▪️1

بوية تسمع ضيمي طاح من عيني الدمع
انه بوية سمعت كلشي جتني طكات الضلع
الصوت يابوية لفاني لمن طحت ومنصرع
هوا ياهو الماسمعها امن القصر طاح الشمع

طاح..دمعي ويه ماطحت
        ليش عايفني صحت
        ياهضيمة من رحت

بوية دمعاتي واشواكي وي دمعك تلاكن
بوية سهل افراكي عندك بلا امحاضن
سهر ماظليت انام
بالغرب مالك عمام

▪️▪️▪️▪️▪️▪️▪️▪️▪️▪️▪️▪️▪️2

شحجي يابوية هضيمة الله لاينطي القصر
يتماني وباك وجهك ما تصح من الزغر
بوية البنية الزغيرة ابيش تصبح كل فجر
لون ماهو وجه ابوها المن تعيش العمر

مات..بوية وجهي بالفشل
        دمعي بضعوني نزل
        حملي بأكتاري ثجل

بوية محتارة يالغالي كمت اشبك اخواني
بوية عاين حالي شنهي اللي جاباني
بدمعي غرگت الخيام
بالغرب مالك عمام

▪️▪️▪️▪️▪️▪️▪️▪️▪️▪️▪️▪️▪️3

شلون ترضاها يبابا تعوفني وحدي وتروح
انه لو اكدر اجيلك جان داويت الجروح
لاجن الدربا بعيد بضيم گلبا بس ينوح
انت كتلي بابا رايح ماكلت للموت اروح

ليش..بوية جروك بتراب
        انه عاشرت العذاب
        بالزغر جاني المصاب

بوية غالينه ياروحي فدوة رحت لأسمك
بوية ندهتك جروحي رادت ترا تشمك
رحت ياجف السلام
بالغرب مالك عمام

▪️▪️▪️▪️▪️▪️▪️▪️▪️▪️▪️▪️▪️4

يابعد كل المحنة بوية عشت بنص قهر
رافكت جفي المنية رافك عيوني السهر
بجفي باجر بابا تجوي نار ما يطفي النهر
عيني ذابحها انتظارك ليل ويتاني الگمر

ليل..بوية عشته بالالم
      انحب بكتر الخيم
      زغيرة ثكلان الجدم

بوية سالفتي تسمعها بس انت اريدنك
بوية كل قصة مطلعها انت شمل منك
ياهو اليمل الغرام
بالغرب مالك عمام
▪️▪️▪️▪️▪️▪️▪️▪️▪️▪️▪️▪️▪️▪️
خادم الحسين محمد منير المياحي

((#الليلة_الخامسة))

#خطاب_مولاتي_حميدة_ص_لإبيها_مسلم_بن_عقيل_ص_...
▪️▪️▪️▪️▪️▪️▪️▪️▪️▪️▪️▪️▪️▪️
يابعد حيلي يوجه لكل لصبح
بوية شوگ بگلبي ويطول الشرح
مسلم وعايف حميدة ماتصح
وداعتك يابوية مو وگت الذبح

ياعشگ بأنفاسي
ياهلي وكل ناسي
بوية اريدن حضنك
بوس كصتي وراسي

ياغريب الغرباء ياغريب الغرباء
▪️▪️▪️▪️▪️▪️▪️▪️▪️▪️▪️▪️▪️▪️
فدوة اروحلك يسالوفة عشگ
بوية جتني اخبار كاسر جم عثگ
مگوم الكوفة بيمينك من صدگ
تشيل عشرة وخزرتك تحرك حرگ

يبو ايد الدافية
من امس ماغافية
بوية اخاف من الطف
باجر اركض حافية

ياغريب الغرباء ياغريب الغرباء
▪️▪️▪️▪️▪️▪️▪️▪️▪️▪️▪️▪️▪️▪️
يبو العيون الحلوة ياديرت هله
ترضا ابگا ببحدي بوية بكربله
فدوة ارجع يبن سبع المرجله
لون ما ترجع اتيهن بالفله

فدوة اروح لجفك
هناك صاير طفك
اعوذك من الوادم
قل اعوذو تحفك

ياغريب الغرباء ياغريب الغرباء
▪️▪️▪️▪️▪️▪️▪️▪️▪️▪️▪️▪️▪️▪️
بوية الك دزيت شوگ البلكلب
شلون وحدك منغدر نص الغرب
بوية اطويهه المسافة والدرب
عوف كل الوادم وعوف الحرب

خل نرد لبيتنه
بالسلامه ريتنه
مرافگا انه اخواني
كونك انت الجيتنه

ياغريب الغرباء ياغريب الغرباء
▪️▪️▪️▪️▪️▪️▪️▪️▪️▪️▪️▪️▪️▪️
  يابعد كل الهله لمن تجي
انه واخواني اعله متنك ننتجي
بوية والله بدونك انه اشبع بجي
وين اديرن وجهي والمن ارتجي

فدوة اروحن لأسمك
بعيني خضر رسمك
انتي بين احلامي
وانه بوية بحلمك

ياغريب الغرباء ياغريب الغرباء
▪️▪️▪️▪️▪️▪️▪️▪️▪️▪️▪️▪️▪️▪️
خادم الحسين محمد منير المياحي