الشاعر محمد منير المياحي✍️

#محرم_الحرام_1445هـ
لسان حال مولاتي الزهراء (صلوات الله عليها)
عندما جائت الى كربلاء يوم العاشر...
~~

للطف اجيت اعله الولد
ابني البقى بلايه سند
ونسيته ضلعي من اهد__گالولي ابنج طايح
هلبت نفس بيه وعـدل
فوگ الضلع زاد الحمل
ماخذته الارماح و نبل__والمنظر شگد جارح

الحسين ادوره__بيدي ارد استره
عود انه اجيته وجبت القميص اوياي
مـن دوريـتـه__امطشر لـگـيـتـه
روح امه وانه امن اعيوني اعصر ماي

كل وصلة منه بكل بكتر__اخ ابني شيلمه
اسهام وحجر حافر عليه__تارس الارض دمه

انكـث لـحـيـتـه و الـدم تسيله
حسراتي ذبحت روحي النحيله
طايح لگيته اعله اخيامه عينه
يلجمني ضلعي وابجي ارد اشيله

~~

من شفته حيل اتلوعت
حـيـرة تـرانـي اتحيرت
من هضمي اطيح وماگمت__هد حيلي كلش حاله
عالوجه طايح منگلب
يابس فلا ضاگ الشرب
ياريتهه فـوگ الـگـلـب__من داست الخياله

ماظلي واهس__من شفته يابس
ما عنده اديـن وحرگتله خـده الـگـاع
حرگتني نـاري__اگـعـد عـاري
گوم اويه امك ليش انهضم كلساع

هزيته ابني و ماگعد__حگي ابجي مفجوعه
حگه فلا ظل بي نفس__الما رحمو اضلوعه

يلجمني صدري جا بيش اضـمـه
ضليت اصيحن يـمـه يـيـمـه
خبطت ملامح صدره اويه ظهره
لـيـش انـه ابني محد يرحمه

~~

جم سهم بأصفاحه انكسر
وبجبهتهه نـايـم حـجـر
مدري شيضم حدر الظهر__اگلبته وادور بأيده
والگيته شو ناقص صبع
حگه الگلب من ينفجع
مكطوع مـنـه بيا شرع__ضايع برمل البيده

ضليت اجـالـع__بتسعة اصـابـع
و الــطــف عـذاب اتـراب و رمـاد ونار
الطشروله ضلعه__شلون الگا صبعه
شيلمه جسمه بـكـل صفحة مـنّـه اكتار

لا عنده راس ولاصبع__ولاعنده ظل حامي
بعده عدل من انسحك__وصاح شكثر ضامي

مـات اعـلـه گطرة گـبـل المنيه
حـي وتدوسه اخيول اعوجيه
ام وتـشـوف شـصـايـر بأبنهه
محتارة روحي واصفج بأديه

~~

لا يـمـه كـافـل لا عـلـم
مامش بـنـاتـه ولا خيم
بالواقع الـمـر انـصـدم__گلبي وادور ايتامه
ماباقي بس وصلة حبل
ابنياته راحـن عالهزل
بروحي خيمهن تشتعل__عالي رماد اخيامه

طايح لواهن__الحادي خذاهن
عـافـن ابـوهـن يخنگه رمـاد اخـيـام
مامش مخيم__بس ريحة الدم
وجربة عزيزة متروسة ويلي اسهام

جربة ودمه ووصلة حبل__هذا البقى وشفته
صحت بهضم آيا دهر __گلبي تره اشلعته

البعيني شفته مـحـد يحمله
وليدي بصحاري وعافته اهله
طايح اخـيـه بـراگ الشريعة
وراحـن بـنـاتـه والناگة هزله

~~
خادم الحسين محمد منير المياحي

#محرم_الحرام_1445هـ
ظهر العاشر
______

حسين ظل بعازت الماي
ايصيح عطشان
واليوم ثالث جبده يتفطر __اباعبدالله

سحك ينتظره تره اهواي
بدمعه حيران
ماله خوان وهضيمه بيش يتوزر__اباعبدالله

بگاع غربه ومابقى راي
للعذب لهفان
والماي عـن اشفافه يتعذر __اباعبدالله

______

استفردو جي منه اخو راح
بحيرته يندار
وبقه وحده يدير لضعونه__اباعبدالله

الگوم ترمي اسهام وارماح
والهضيمه احجار
لاح گصته ولايح اعيونه__اباعبدالله

عيونه سداهن الدم بكثر ماطاح
والمثلث النار
اجه بگلبه ورجفت امتونه__اباعبدالله

______

دارت اعله حسين الازلام
بغز برماح
ولازك بسرج المهر صدره__ابا عبدالله

انمرد حيله مـن الاسهام
أمن الفرس طاح
وجم سهم ويلي انكسر حدره__ابا عبدالله

هذا كله وهمه الاخيام
يسمع اصياح
مـات خل انسلّبه خدره__ابا عبدالله

______

يريد بس يوصل للاطناب
يزحف ازحوف
لجن ويلي الحيل ماعانه__اباعبدالله

عطر هـب وكـلـه عطاب
والمصيبة يشوف
شلون تركض طفله عطشانه__اباعبدالله

واستباحت حرمه اجناب
طلعن اركاض
شاف عگبه اوياها عدوانه__اباعبدالله

______

يسمع النسوان تـنـخـاه
صوت لأم عون
گوم خويه خدرك اتسلب__اباعبدالله

ينازع أمن جروحه بآه
احتار اشلون
يگوم واهوه بالدمه امخضب__اباعبدالله

انگطعت انفاسه اويلاه
وراح الضعون
عگب راعيهه شكثر تتعب__اباعبدالله

______
خادم الحسين محمد منير المياحي

#محرم_الحرام
ليلة العاشر


گلب من التعب متروس شوغات
احير بروحي لو حير بيتيمات
تكوم امن الترب يحسين هيهات

جمر الخيم جاويني
يخويه افتر يلاگيني—صوط وحافر اگبالي
يروحي عذبت روحي
تعال وعاين جروحي—يفتر بالفله اخيالي

ماكتلي خويه__شعدج بنص الخيل
———————————————-
عله اطفالك يخويه الوادم تصيح
خدرك بالبراري لاحته الريح
ظل نايم اخاف اضلوعك تطيح

اخاف عليك تتعور
تريد تكوم ماتكدر—ماخلو كتر سالم
الماعدهه اخو تنسب
بلحظة تبدلت زينب—ظلهه شافته الوادم

احتركن بناتك__وشاطن بنص النار
———————————————-
خوتنه تطشرت بين الاجناب
عفت حضن اختك ونايم بالتراب
عكب عطرك عبينه تفوح عطاب

عبينه حاضنه الجمره
وانت حاضن الغبره—عيونك غمضاها الدم
تشتم ضعنك الغربه
يخويه شتنحمل صعبه—بلا خوان وامخيم

عالگاع نايم__عايف اختك للضيم
———————————————-
ما متعوده اظل ابدون خوان
گلبي امن الدوارة حسين تعبان
عله ملگاك خويه الگلب عطشان

ادورك ياابو اسنيني
رمل حد راسي وبعيني—اثكنه وماترك رمشي
تدري شصاير بأختك
من عالرمل شافتك—ماكدرت بعد تحجي

محتارة ادورك__فحّطاني الدخان
———————————————-
خادم الحسين محمد منير المياحي

#محرم_الحرام
لسان حال مولاتي زينب(ص) لمولاي سيد الشهداء (ص)

((مصائب العاشر))
__

يحسين هدت صوبنه الخيل
مالي عله اركاض الظهر حيل
خطوت الخايف تنحسب ميل
ودرب اليريدك كلش ابعيد
__

گصدت خدرنه امهروله الگوم
لحگ علينه اهـنا يجيدوم
حشمتك ومـا تكدر تـگـوم
خويه خيمنه بلايه صنديد

__

وصلو خيمنه و شبو النار
محتار عقلي وشوفي محتار
والجيش حاوطنه وعليه دار
يَـردوني اطلع وأنـه مـاريـد

__

خويه البنات تـريـد عـوّان
والهيمة حيرة بلايه صيوان
دخـان سـد الـعـيـن دخـان
الدخان ضَيّع كضت الايـد

__

اصوات حيرة وتهنه يحسين
سدت عساكر دربي صوبين
مجبور يركض جدم خمسين
سوتهه خويه الموش اجاويد

__

الـتـل صعدته وشفتك شلون
تتگلب ودم غـطـه الـعـيون
تأشرلي رجعي ارجع شلون
ويلي ورجعتي بعد شتفيد

__

شتفيد ارد ومـاهـو ويـاي
يا بلوت الـمـا مـنـهـه بلواي
عالتل كلاني الشيب يعضاي
وادموعي حفرتلي تجاعيد

__

تالي هلي بس أنه مديوس
ظهرك حسافة تحرگه الشموس
مو فاس واحد كربله فوس
طاحن براسي وانلوه الجيد

__
خادم الحسين محمد منير المياحي

#محرم_الحرام_1445هـ
#ليلة_العاشر
لسان حال مولاي صاحب الزمان وهو يصف آلآم مولاي سيد الشهداء يوم العاشر

_(الناحية المقدسة)_
__

مملكة جرح
وناحية الم
وصاحب العلم __طايح على اتراب الصحاري
مُقبل لذبح
وما الك سند
مايسمعك أحد__محتار وحدك بالظهاري

جداه حسين....
اوكفت بين العده
زلمه وحده_العطش لاح الجبد_انزلت للمعركة

وبدوؤك بالحرب_فثبتَ للطعني والضرب
وطحنت جنود الفجار_واقتحمت قصطل الغبار
مجالداّ بذي الفقار_كأنك علي المختار

زَمّيت ايدك
ودارو عليك__بس أثبتت للضرب
راح الامان
ويلي الدخان__سد النظر والدرب

جداه حسين سلام سلام
__

منحرم عذب
حاطِتك زلم
وانته ما تهم__همك بناتك والمخيم
ابجي غُربتك
ويلا يكربله
وتارس الفله__ومن كل كتر يتنازف الدم

جداه حسين....
اياا جور الدهر
يراموك بحجر_جبينك صب دمه_وظهرك منكشف

فأمر اللعين جنوده_فمنعوك الماء ووروده
وناجزوك القتال_وعاجلوك النزال
ورشقوك بالسهام والنبال_وبسطو اليك اكفُ الاسطلال

مـنـا نـبـال
ومـنـا دلال__مـنـا يصيبك حجر
تكوم وتطيح
كلك جريح__سهم اعله صدرك عبر

جداه حسين سلام سلام
__

امحير السمه
ولية وبأسر
وبعينك الصبر__وحدك اسير بگاع غربه
مابقت جهة
ويلي منولي
تنادي ياهلي__الگباله أهله تطيح صعبه

جداه حسين....
اسير إبلايه اخو
واليك العدو_جم رمح وسهم_عبرن للظهر

قد عجبت من صبرك ملائكة السماوات
فأحدقو بك من كل الجهات
واثخنوك بالجراح_وحالو بينك وبين الرواح
ولم يبقى لك ناصر

اسمك امير
ضليت اسير __واستوحدك زلم
وحدك بقيت
والخوه بيت__والماله اخو ينهزم

جداه حسين سلام سلام
__

من على الفرس
عالوجه طحت
كلشي ماشفت__إهطاط الزلم جابت حوافر
شاغل النفس
وانت منجفي
طرفك الخفي__إتدوره لبناتك ويلي حاير

جداه حسين....
دُخان بـكـل كـتـر
محجوب الخدر_مشاعل حضّرو_يحركون الخيم

حتى نكسوك عن جوادك_فهويت إلى الأرض جريحاً
تطأك الخيول بحوافرها_وتعلوك الطغاة ببواترها
وقد رشح للموت جبينك

من عالجواد
عم السواد__عينك ترسهه الرمل
تلوج بتراب
من ذو الشعاب__بگلبك مجانه يظل

جداه حسين سلام سلام
__

راجع المهر
يصهل بهضم
والنسه بلطم__برزن يويلي من خيمهن
وين ابو علي
احجي يامهر
شيحجي والشمر__قابض لحيتك وشيگلهن

جداه حسين....
شبع جسمك طـعـن
بقيت إبلا متن_ترافس عالارض_وحريمك بالفله

فلما رأين النساء جوادك مخزيا
ونظرن عليه سرجك ملويا
برزن من الخدور_ناشرات الشعور
على الخدود لاطمات_الوجوه سافرات
الى مصرعك مبادرات_والشمر جالس على صدرك
مولعٌ سيفه على نحرك_قد سكنت حواسك
وخفيت انفاسك...

من الخباء
بزرن نساء__ويلي استباحو خدر
ماظل خمار
اخ النهار __صار احمر امن الجمر

جداه حسين سلام سلام
__
خادم الحسين محمد منير المياحي

#محرم_الحرام_1445هـ
ليلة التاسع

#شجاعة_وجمال_مولاي_الاكبر_ص
___
اجمل وسامه واجمل عين
الاكبر مـثـيـلـه مـاكـو اثنين
اشرس مقاتل وأشجع روح
عمه أبو فاضل وابن حسين

اجمل وسامة__ من كلشي متكامل
رب الشـهامـة__ شـكّـل لـلـدم نـازل
يجدح حسامة__ وعيونه أمن يقاتل

عليهه__شـاد أحـزامـه دخل
عليهه__عرجه من جده فحل
صطرها__نخسفت ظهور الزلم
بجيهه__للسمه السبعه وصل
___
شعره أعله متنه مغطي جتاف
و زلوفه ورگه أمن الصفصاف
تـيـهـت دربـها ازلام و خـيـل
خاطف وجـهّـم مــا يـنـشـاف

تيهت عگلها__من طب اعله المهره
بيده يخضها__والما لاحه يهطره
رجله نگلها__ويبّس وجه الشگره

دخيله__گاطع اعليهه النفس
دخيله__كلمن الشافه انخلس
دخلها__وانجفت يمه الخلگ
يشيله__ماكو اخضر مايبس
___
مـن ظهره يطلع بـس دخان
الاكبر عجيب وموش انسان
عالمهرة رجـلـه تـلـوح الگاع
يجويهه غـيـرة امـن البركان

قادر قدير __وحار شما سـولـفـتـه
الاكبر امير __ومـا أوصـل معرفته
بئس المصير__الله يستر طـگـتـه

ضربته__مثل جفين الگمر
ضربته__تگلب اشكال البشر
شهامة__تنحجي بس للشهم
خزرته__ركن لـلـمـوت وقـدر
___
صارت عجاجه من الناس
واليبقى يمّه فوگا انداس
هيه المراجل هيج تصير
زلمه اليلحّگ يكض الراس

ركضو و لاكن__محد لحگ يشرد
بجفوفه طاحن__فوك الرگبه يگعد
واگف يعاين__بلطاحو گام يعد

يعدهم__جم الف جوه الجدم
يعدهم__خبطت و بيهه يلم
عجيبه__ما رحم كائن يكون
يعدهم__امجومه اگباله الزلم
___
خادم الحسين محمد منير المياحي

#محرم_الحرام_1445هـ
#ليلة_الثامن
#شجاعة_مولاي_القاسم_بن_الحسن_ص
__

(هوه شيخ الساحة)
من ظهر الهواشم
لو طبها قاسم
ما يبقى صارم__كلهه حدر ريوله
(لو رخت شداها)
لـوحـة مراجل
وجـفـه زلازل
ومن ابو فاضل__ماخذ الهيبة وطوله

طباها وعالذبح وازها
خلاها إبلا هدم خلاها

يتلاهب السعير
وبالموزمه امير
محد گدر عليه
ابن الحسن خطير

من طب..گامت تنردم الوجوه..من طب
ضهضب..ابن معزب الديوان..ضهضب
يشرب..سيفه من دمه الفرسان..يشرب

__

(طالع يزف ارگابها)
وروسهم شوباشه
ويمنته بطاشه
وصطرته هرّاشه__امسرفن عليهه اردانه
(ابن الحسن محلاته)
بسيفه صلبها
يلم برگبها
وجوم حطبها__بالطف فتح ديوانه

والقاده هيه صارت زاده
صياده كل شرس صياده

بمرادم الجحيم
خله البشر تهيم
صاحو تره الحسن
خَلّف ابن كريم

ماهم..معزب لو تمدحه الناس..ماهم
بالدم..خله ادلال أبوه تفور..بالدم
للعم..يعزب روسهه ورجليهه..للعم

__

(بجفيت ابو متحزم)
وازنوده سمره
راكبله شگره
وعيونه خضره__جنهه جفيت الساده
(يطك الضوه بخدوده)
يلوح اكتماله
وحته بخياله
ينضح جماله__خارق جماله العاده

محلاته وهلهن عماته
صولاته مثل ابو صولاته

شبل الحسن يحوم
عن صيده مايصوم
كاسر بالانقضاض
مايخطي بالهجوم

جَسور..اسد كاسر على الميدان..جَسور
وكّـر..يصيد الزلم بالخزرات..وَكٌـر
تسحر..ارموش العين مثل الريش..تسحر

__

(حته انبياء أمعزب)
شيخ المضايف
وبطوله واگف
عـزب طوايف__بزاده عرفنه الحوبه
(العزوبيه تبطل يمه)
وامعلمه عمه
ينطيهه هدمه
ماشفنه زلمه__لو تطفه يشعل ثوبه

أمن لسانه تشبع الجوعانه
بيبانه ما يسد بيبانه

مابيهه اي جدال
والرايد الوصال
مو من زاده شبع
يشبع من الجمال

يشبع..عيونه الزاد كلمن صدهه..يشبع
يركع..عبد للحسن يوسف لأبنه..يركع
منبع..الدخان الـمـراجـل صدره..منبع

__
خادم الحسين محمد منير المياحي

#محرم_الحرام_1445_هـ
#ليلة_السابع
مولاتي زينب صلوات الله عليها بقلبها الكسير
وانتظارها لمولاي قمر بني هاشم صلوات الله عليه تقول...
~~~

ياگمر اهلي الهواشم__بيك حلوة ايامي
امتانيه بنص المخيم__گلبي شوفك ضامي
عالجمر منتظرة روحي__رجعتك لأخيامي

واحد يصد للثاني
بَجّـيته وبجاني
الحسين متعوب متعوب متعوب
ابطيت خويه اعلينه
لشوفك اشتاگينه
الحيل مسلوب مسلوب مسلوب

الروح حنت خويه واعلينه بطيت
يصبر حسين اعله روحي شما بجيت
يطيح سگف البيت خويه لو هويت
اخلاف عينك مايظل بالحومه بيت

عباس ترضى حسين يركضلك ويوگع
وانـه مـن تطيح كـلـهـه اعليه تفزع
اليطيح فَيّ اخيامه من الجمر يشبع

~~~

الدمعة ماتنظم واضمها__العطش فر صيواني
انـه وحسين انكسرنه__القلق بـاگ الواني
يلا جا شو بطى مايك__كافي گلبي يتاني

تأخريت اهوايه
گلبي غص بحجايه
گلبي حساس حساس حساس
شعطلك يعيوني
أطفالك ينشدوني
وينه عباس عباس عباس

الحسرة تشرب روح البگلبه انتظار
الخوف بايگ لوني لأضفاف الصفار
ياكفيل ام عون خويه شنهي صار
بطيحتك تستفحل اعله اجدامي نار

ما يصدك گلبي عـالـي يطيح صـعـبـة
الگمر مـن يطيح تبدي النجمة غـربـة
گامت اختك تـنـزف الـدمـع و تشربة

~~~

طـرّت الخويه خيمنه__وخان بيه احسابي
أخ گلب ام عون ينزف__كلف بيك اصوابي
الماي ما يعرف اميرة__باگك امـن اطنابي

اعليك شيصبرني
خوتك تذكرني
بـذيـج الأيـام الأيـام الأيـام
جنت فيّ اخيالي
بس صرت جتالي
افياي مادام مادام مادام

بروحي احاجي وبعد ماظلالي راي
موتي لَتشوفين اخـوج بدمه جاي
حسين مايندل طريجه و كلفة هاي
ردلي شـايـب هـاي كسرتلي گفاي


ردلي مكسور وبياض يـخـط لحيته
لـو شـفـت حـالـه يبو فاضل بجيته
الجفن مـن گـد البجي خويه عميته

~~~

حسين رد واستقبليته__نعي لحاله وحالي
لا تشوف شلون طحنه__يعرف بس العالي
اخوانك الما مرة مالوا__ملنه يا كفالي

بقى راعي الشيمة
من عفتهه الخيمة
يگوم ويطيح ويطيح ويطيح
بفرگتك مذبوحه
حسين تاهت روحه
مـلـنه بالـريـح بالـريـح بالـريـح

احـنـه مـاننهز ولـكـن هـزنـه جـود
صوت هدم كلشي جان امن الصمود
حسين اول مرة شـو وحده يعود
خيامي طيحن طاح من عدجن عمود

خويه ساعات و يطيح حسين عاري
اعـذر اخـتـك خـاف تطلع للصحاري
وعگبك فَيّك ماكو فَـيّ جمرة البراري

~~~
خادم الحسين محمد منير المياحي

#محرم_الحرام_1445هـ
شجاعة_مولاي_قمر_بني_هاشم
~

نـزل سـبـع الگناطر
الزلم كضت خواصر
ابو فاضل قيامة__عليهم سيفه صاير

من يصعده
ظهر المهرة
يخسف حدرة__وتهدل اصفاحه
راية تخوفج
عگدتهه امه
تضوي الضلمه__ترفرف بجناحه

ابو فاضل __صگر ذيج الخيم
عله الشاطي__ محط ماكو لجدم
الدمه براگه__ والف فوك الالف
هدل راگه__ وفقط روس ازدحم

~

على الشط الملاحم
الريّش طَيحت عمايم
ورايـة بـجـفـه تـفـتـر__فلا خلت جماجم

الماي اتغير
طافح طينه
غط ثلثينه__بروس الگدامة
يشرب خوفه
تخوف هاية
عصة الراية__ماخلت هامة

خبط طين__ودمه ذاك النهر
طفح خيل__وجماجم بس بشر
بطرف سادة__فـلا تندك زلـم
اشتهى موته__الاجه اگبال الگمر

~

كـفـو لـيـث الحريبة
فلا يخطي اليصيبة
سريع أسرع من الصوت__واليريده يجيبة

راسه امدخن
شايل شوف
ايخوف الخوف__اتبريد خزراته
من جفوفه
كلمن يشرد
لأجدامه يـرد__تعمي سطراته

الوغى عيده__على العسكر رعد
مثل حيدر__اسد خلّف اسد
واللي طگه__خسف حته الدرع
ربيع الطف__نزل بالطف حصد

~

يذب روس لـمـهـرتـه
غدت تسحگ شگرته
يشد ويلوي الـعـنـان__وبعد تگطع شفرته

اجدام المهرة
وشفرته سيفه
عيونه امخيفه__والسابع يومه
مـن الـخيول
ايگطف بيهه
شد اعليهه__امدخنات اهدومه

الزلم صارت__يسر فوك اليمن
غدو كلهم__حدر رجل الحصن
گمر هاشم__يـفـر منه السبع
اليصد عينه__فلا يوگف رزن

~
خادم الحسين محمد منير المياحي

#محرم_الحرام_1445هـ
((مقتل العباس))


(من سمع عطشانة عليهه منعو الماي)
(صاح انا العباس اغدو بالسقى)
(لبس درعه ولامته صاح ياقوم اسمعوا)
(لا اهاب الموت يوم المتلقى)

عندما اشتد العطش في معسكر الحسين خرجت الأطفال تتصارخ عماه عباس العطش ياعماه العطش

(اشفايف اطفال اتفطرن)
(منعو الماي اعله الضعن)
(صاحن بنات أم الحسن__واعطشا بكربلاء)

خرج العباس عليه السلام إلى مولاي الحسين وقال اخي قد ضاق صدري واريد اخذ الثار فقال الحسين اخي انت صاحب لوائي ، وإذا ذهبت تفرق عسكري
فأذا إذا غدوت إلى الجهاد فاطلب لهؤلاء الأطفال قليلا من الماء...

(الحگ للاطفال بعذب)
اجبود بعطشهه تلتهب)
(لا تبطي عجل جيتك )
(عگبك يخويه ننهب )

(خويه بعطشهه__يلهب صدرها)
(بيش الرباب تسكت الرضيع)
(وعاين بناتي__يلهب جمرها)
(لو ماجه مايك يعني نضيع)


فركب فرسه وأخذ رمحه والقربة ، وقصد نحو الفرات

(طلع للمشرعة هاد)
(يروي امخيمه راد)
(وابظهره استغاثته الفواطم)
(اگباله امطفحه الروس)
(والشط غادي مخلوس)
(وبراگه غدت تهوه الصوارم)

فكشفهم ، وقتل منهم ثمانين رجلا حتى دخل الماء...
(شيقنع سيفه ويرجعه للگراب)
(اسمه ايخوف اكثر من الصواب)
(هزهم هزه وحده وطاحت الگوم)
(واثمانين طاحو فوك التراب)

(اسد مرعب اشم حيد)
(ملتف علصناديد)
(اليلحك ذاك من ذاك)
يفل من لزمت الايد)


فلما أراد أن يشرب غرفة من الماء ، ذكر عطش الحسين وأهل بيته ، فرمى الماء

(يشيل الماي ويطشره)
(درس الوفه والعِبره)
(عطشانين عنده هواي)
(ماخلاهم ابظهره)


ملأ القربة وتوجه نحو الخيام فقطعوا عليه الطريق فحاربهم حتى ضربه نوفل الأزرق على يده اليمنى فقطعها ، فحمل القربة على كتفه الأيسر ، فضربه نوفل فقطع يده اليسرى من الزند ، فحمل القربة بأسنانه
،
(ترس جربته وتوجه للخيام)
(البيهه الماي صاير كل الاحلام)
(كطعو يمنته وفرها أعله يسرا)
(يوصل جربته ولصوابه ماهام)

فجاءه سهم فأصاب القربة وأريق ماؤها ، ثم جاءه سهم آخر فأصاب صدره ، فانقلب عن فرسه

(سهم بالجربة بدّاها)
(وسهم بالعين طفاها)
(واصواب الصدر يكلف)
(بيش الگاع لاگاها)

فنادى أخيه الحسين ادركني فلما سمع الإمام عليه السلام نداءه قال : وا أخاه ! وا عباساه ! وا مهجة قلباه ! فأتاه كالصقر إذا انحدر على فريسته

(ظهرك طاح خويه أدركني يحسين)
(طلع من خيمته متيه الصوبين)
(مايندل طريج المشرعه آمنين)
(وصل گوه ويشوف السهم بالعين)
(مگلوب اعله وجه بلايه جفين)

فوصل الحسين إلى مصرعه ووضع رأسه في حجره فأراد أن يحمله إلى المخيم فآبا العباس وقال اتركني في مكاني إني مستح من ابنتك سكينة ، وقد وعدتها بالماء ولم آتها به..

(مستحي من سكنه والأطفال)
(اتعذرلي خويه واشرح الحال)
(لا تسمّعك زينب من تگول)
(اجروحي غميجة وكلش اثگال)

فتركه في مكانه وعاد منكسره وهوه يقول الان انكسر ظهري متكئً على سيفه

(رد حسين لاحوله ولا قوه)
(يجر بروحه فوك الترب يتلوه)
(راح الجان لو مال الحمل تجوه)

من رجع_ماينعرف_امفارك اخو_وظَهر وسگاي
منهضم_ياحسرته_وحسرت ضعن_يتمنى الماي

وقصد الى خيمة اخيه واسقط عمودها فبدئن اخواته والعيال بالصراخ والبكاء

(خليته بمجانه_يزينب خويه_خليته بمجانه)
(منكم ترانه_گلي مستحي_منكم ترانه)

(مو عمود الخيمة جني جاي اجر عامود ظهري)
(للحرك والسبي خويه يلا يازينب تحضري)
(عگب كفال المخيم عله اعيالي انت سهري)

خادم الحسين محمد منير المياحي

#محرم_الحرام_1445هـ
#ليلة_السابع
((آلآم الحسين))
____

هاي اول مره يسمعها دخيل
بصوت سكاي الفواطم والكفيل
حسين طالع لاجن بمشية يميل
وطاح لمن طيحو خاجيته

____

يمشي خطوه خطوه بيهه يستراح
بيد يسند ظهره وبأيد الاصفاح
هسه موش حسين من عباس طاح
إبلا عمود شلون يوگف بيته

___

حسين تيه دربه ويدورله أيد
تدلي جدمه التيه امجان العضيد
يعثر و دربه صبح كلش بعيد
يصيح عباس الجدم شلّيته

____

وصل درب المشرعه والدرب عام
شمر روحه وشم أخيه وگلبه هام
شنو رده لَـوّن نشدته الـخيام
بيا كتر ظهرك عجب خليته

____

الروح تحجي والجسد ماظاله راي
واعدت سكنه وتناطرني اعله ماي
يگله مـارديتهه وهـالـمـره هاي
واعدتهه ووعدي ماوفيته

____
خادم الحسين محمد منير المياحي

#محرم_الحرام_1445هـ

الى كل عاشق هام في الطف
____
العاشگ حلاته يون وينوح
تگضي حياته كلهه جروح
الدمعه قدرها تصب لحسين
مثله منو ضامي ومذبوح

والغربه الما ترحم__بيهه احتار
من مهره للهيمه__و رمل الحار
متفرهد صيوانه__وطاح بناس
ما رحمت بعياله__بنص النار

ماينلام اليعشك من يبجي...اهواي
لا خير أمن الدنيه الما تنطي...ماي
محتار ابن الزهره إبلا ستر...اخيام
وياهو الگبله بغربة وماصحله...فياي

مولاي ياحسين مولاي ياحسين
____
اليعشگ مصيبة يتعبه الليل
يكضيهه آه وحسـره و ويل
هيه المصيبه اتريد اگلوب
تهم بالغريبه و ذيج الخيل

واليتعب يستاهل__جرح حسين
والمجوي أمن الخيمه__يشوف اثنين
المحدبه عالتله__و صدر انداس
ومالومه لو يهمل__دمـع العـيـن

الگلبه يون للطايح مسحوك...اجتاف
للوكفت عـالتله و مـن ظلهه...تخاف
شكد عايش باللوعه من گلب...وروح
الشال الطف بگلبه و بالدنيه...عاف

مولاي ياحسين مولاي ياحسين
____
التاكل بـگـلبه تطيح اخيام
جاشنهي حاله بطاري الشام
اليسمع ضعن ويطب عالسوك
يهجر ادياره و عيب اينـام

واحجيله عالمسبي__شگد سهران
أمن الخيمه للناگه__يون تعبان
هسه شگد متغير__كد ما طاح
البين أهله وبفيهم__امدلل جان

الجرحه يهزه و دمعه ينزل...مخنوگ
ما ظن لحظه يشرد من باله...السوگ
البي دخلن يا حيف بنيات...حسين
وگوه الحادي إيعثّر بأجدام...النوگ

مولاي ياحسين مولاي ياحسين
____
المرتاح يـفرق عــن مـتعوب
العاشك الطف تحسه منهوب
ما عنده راحة و يدوم يلوج
المسلوب عشگه بدمعه يذوب

و اليبجي للضامي__ايمل شلون
للضحه ابما يملك__يظل مديون
مايسكت من نوحه__وحجة يريد
عالسلبوله اثيابه__ولأخته ام عون


كلمن حصته وضيمه والطف...احساس
بس محد يعرف بي بس...الينجاس
ليش الـنار الـبردت يــم ...ابراهيم
مابردت يـم رجـلين اخت... العباس

مولاي ياحسين مولاي ياحسين
____
خادم الحسين محمد منير المياحي

#محرم_الحرام_1445هـ

((شعور الغربة))
~~~~

يا جرحي ظل اعله المصيبة نار
عيش بشعور الغربة والانكسار
ابجي الغريبة وغـربـة الغريب
ضعن الفواطم ويلي ماله دار

هم وانكسر..
للما رجع اخوهن
وبفگده عذبوهن
ولوحده ظل ابوهن
بذاك الظهر..
تندب عليه عياله
ولا واحد البقاله
يبجي الصخر يحاله

مكسور بأخوته__ومحد رد نخوته
يصرخ ماله ناصر ويلي حاير وانكسر حيل
ياجرحي الهضيمة__ماظلتله خيمة
و اتسلبت حياته وكـل بناته بهدت الخيل

~~~~

ياگلبي دمعي قربة اله يطيح
عيش بحسرتك سيدك جـريح
دم و تـراب انترست الـجـروح
مثله فـلا صح ضامي لا ذبيح

لا ما يصح..
تتصارخ اليتامه
هجمو على خيامه
وجسمه انمله بسهامه
بكهف الجرح..
دمعة حزن طويلة
عالحشمته العقيلة
وماعانه ليهه حيلة

اجرحني بعويلي__لا ترحم دليلي
للصاحتله اجـونـي ايسلبوني خويه يحسين
بخيمّهه جريحه__محتارة وتصيحه
منو يلحگ عليه يشوف اديـه ترجف امنين

~~~~

ارد ابقى أسير الحسرة والعذاب
بدموعي يكمل عشگي والمصاب
عالطايح بـذاك الـظـهـر اسـيـر
ابـن الـزجـيـة بـعـازت الـشـراب

حيف وعتب..
عالشح عليه فراته
وماواصل لبناته
وخشبة صفت لهاته
مـن الادب..
تكسرني دمعة وانه
ابجي اليبس لسانه
ومحد وگفله عانه

ياجرحي المصيبه__مـابـطّـل نحيبه
وطايح عالترابة بدم خضابة وگطرة عطشان
واسموم الصحاري__تلوحه وهوه عاري
وحيله مـا يعينه يـصـد ضعينه ابـلايـه عوان

~~~~

غير الخيم ماريد احس بالضمير
بيهه انتخي مـن ابـرد واستجير
اليعشك يگلبي تظل سلوته الدموع
راضي بقسمتي وهذا أجمل مصير

ابجي واحن..
وتكسرني كل خرابة
طفلة تنادي بابا
نامت على الترابة
اسهر و أون..
ابجي ضعينة ضاعت
وبدون اهلهه سارت
للغربة تالي راحت

راحت ويه اجانب__دخلوها الخرايب
ومجروحة بحبلهه ابلايه اهلهه تطب دواوين
والمجلس هضيمة__علما عدهه خيمة
مايرحم قصرهم لا نظرهم ضعن الحسين

~~~~
خادم الحسين محمد منير المياحي

#محرم_الحرام_1445هـ

مولاتي حميدة (ص) تشكو آلآمها
الى والدها مولاي مسلم (ص)
___

خَيمت ملامحي يتمي عليه
عذاب...انتظار...مشتاگة اريدك
شـوگـي ذبحني مـو بـديـه
الجروح...تنوح...طيبتهه بيدك

ياهي مثلي
اتاني ابوها__ومثلي خانكها السفر
يـاغـريـبـة
مـن دمعها__خدها نصين انحفر
امن اشتياگي
من حنيني__عاشرت بس القهر

مسلم اريدك طالت حسرتي
اگضي نهاري وليلي بشوغتي
شنهو اليعطلك گـلـي بالسفر
مَـتحن عليه وتحـن لشوفتي

___

ليلي يمرني بس للمناحة
المنام...حرام...للعدهه غايب
ضليت الوج وماعندي راحة
انحنيت...بقيت...بس للمصايب

جاي اتاني
وكلي ارجف__خلصت حيل الگلب
عيني ذبلت
بالمخيم __وأنه اصد أعله الدرب
الفرگة تكتل
وانه طفله__ومرني من زغري غرب

الغربة عشتهه اناطر جَيّتك
ماتت عذاب ولوعة ابنيّتك
مو تدري اتعب دونك وانهضم
همي وعذابي يروح بشبگتك

___

الوياها ابوها تعيش بفيايه
عزيز...بعيد...من وين اجيبه
افراگك ضمه وبس انت مايه
يطيب...الحبيب...اليشبگ حبيبه

لو تجيني
لو اموتن__ذبلت اوراق الغصن
رد يمايي
وخل افرفح__راحتي بشم المتن
غير ابوها
الطفله گلي__يلمهه بلا ياحضن

ياهو اليلمني وكلي اتطشرت
مـانـي حميده هسه اتغيرت
صرت شكبرني وجرحي اشمكبره
بالفرگة كلش جبيرة بَيّنت

___

ظل اشتياگي يكتل دليلي
حَنين...ونين...جفني شيطبگه
امتيهه نهاري وامتيهه ليلي
غرام...هيام...اليفضه ملگه

من اشوفك
كلشي ينفض__وانسه لحظات الالم
اتخيلت لحظه
انت يمي__وكلشي بالروح ابتسم
بس نصيبي
ابقى اتاني__وجَيّتك صارت وهـم

بيمن اقـنّـع دلـيـلـي ويقتنع
شنهي اگله اليرافس بالضلع
سَـيّـر عـلـيـه مـابـيـه انتظـر
ذبلانه بنتك مثل ذبلت شمع

___
خادم الحسين محمد منير المياحي

#محرم_الحرام
الليلة_الخامسة
#شجاعة_مولاي_مسلم_بن_عقيل
____
مسلم شهامة وهالنزل مايرحم الكوفه
ماخذ اطباع المرجلة أمن الكمر عباس
والزلمه اليطگ ينعرف من طگته جفوفه
الرگبه اليطگها تنعوج وإيكسر الراس

شهامة وجف من غضب__تنازل ماتمل
الزلم مثل الفرس__غدت تصهل صهل
ولا حـيـد الـسـلم__وبـقـت عنده رجل
كسر عـظـم الزلم__يـهـد ويـرتـجـل

هذا ابن عم الحسين
واخو الگمر

تارسهه دمهم الكاع__ مسلم طرها نصين
غيرة ومرجله وزود__ماخذ من اخو حسين
_
ابو حميدة لـو وگف اطـول أمن الـرايـة
جتفه يطخ سابع سمه لو صعد عالمهره
راجـل يـدور عـالـزلـم صـطـراته دواية
اليطيح بجفوفه يطلّع ضلعه من ظهره

نزل هيبة علي__ وزلمهه اترادمت
البقى يسحكه الفحل__الشرد اي بي بخت
و لابيهم سـبـع__فوارسـهـه انثنت
نكث جفه ورِگب__يصدهـه اتشمرت

هذا ابن عم الحسين
واخو الگمر

ماكل جفه الازلام__واحد يشبه النار
مسلم جنّه عباس__راسه شماتجي حار
_
واحد لجن نازل غضب الخشوم داساها
ضهضب ومن خزراته فوك الگاع جم شارب
الاسباع جـدام الـبـخـت حـفـاي خـلاهـا
انـا الـفحل مسلم يصيح وعاوج الحاجب

الزلم مـن خزرته__تطيح امجفنه
الحرب تهوى الفطن__الجفوفه امدخنه
انجفو مثل البزر __واجاهم مطحنه
خبط يابس خَضّر__ وصلبها الميمنه

هذا ابن عم الحسين
واخو الگمر

الخزرة وسيفه حلگين__بلعن وادم وخيل
تــل لزينب اهـنـاك__باني أمن المجاتيل
_
زلـمـه يـعـادلـه سـلـف هـنـيـال مـن جـابـه
هـذا ابــن عـمـه اليفتخر ظل بي ابو الاكبر
مسلم عجيد وهزبر ومـن طـب عله الغابه
داس الفوارس واليدوسه ،يـشـلـه،،يـتكسر

جدم ثگله جبل__على العسكر نحس
السحگ وجهه انعوج__ولاظل بي ضرس
اخذ طبع الگمر __ اليلوحه ينخلس
ابو طاهر كلف__شجاع شگد شرس

هذا ابن عم الحسين
واخو الگمر

امفرعه الكوفه واركاض__غرگت بيهه طوفان
الـوادم تـدفـن بـگـاع__ومسلم بالسطح جـان
_
خادم الحسين محمد منير المياحي

#محرم_الحرام_1445هـ
خطاب بين مولاتي ام البنين و مولاتي زينب
گولات فزاعي...
____

اطلعت اتلگه ابني الراده اضعونه
شو ماهو الحسين وماهو ميمونه
ويـن ازلامـنـه وجا وين عمتجن
هـاي انـه وأبين جـنـي مدفونه

تيهتي بيه__وبيه ريحة عباس
____

من اطلعتي فوگج رفت الرايه
وضراج اسيوف هاشم كلهه حمايه
يمه الخوف يگلب وجه البنادم
وانـه اطلعت يمه وخيلهم جايه

السحگت متنه__متنه سحگته الخيل
____

احجيلي الصار بالتفصيل وبهيده
تره انه امكيفه جي عباس ذب ايده
ردت وياج محترگه وادور حسين
وحدر الشمس مثلج هايمه اببيده

شمس الشفتهه__للخدر موش اولام
____

هذا الشيب كله اشمسرع اتجمع
بداني أمن أسمعت گالوها خل تطلع
وكثر بيه ييمه أمن اوگفت عالتل
يامگيوده صوب اقصور يا ارجع

حگي امن اشيّب__فارّه الدواوين
____
خادم الحسين محمد منير المياحي

#محرم_الحرام_1445هـ
#الليلة_الرابعة
((حلم كتّال))
مولاتي ام البنين (ص) ترى مولاي سيد الشهداء(ص)
في حلمها فبحزنها وانتظارها في عالم الرؤية تقول....
~~~~

جني بحلم وانته بـغـرب طايح
ومـحـد يعينه المنه أخـو رايح
بالطيف شـفـت اشـفـاك ذبلانه
وطرفك على ذيج الخيم شابح

الدم خذاك الدم خذاك__والاسهام بكل كتر
الدم خذاك الدم خذاك__ياهو اليوصلك للخدر

گـلـب الشهم يـنـجـاس بـمـدلـلاتـه
امن ايشوف بين الناس تركض خواته
ياهو اليوصلك غـاد ياهو اليعينك
يـ أول بشر بـخـيـام ذبحوله ذاتـه

يمه يحسين يمه يحسين
~~~~

ظل يمشي حلمي وصعبت الحاله
وشـفـت الـحرم حـاطتهه خياله
ظلن يحشمن خويه مـا خـويـه
وزيـنـب شـفـتـهـه بـتـلّـه كـتاله

يـلا گـوم يـلا گـوم__وحيل زينب منهدم
يـلا گـوم يـلا گـوم__وصلت اخيامك زلم

عالتله صوت ايصيح ماتنهض الهه
امن الخيمه طلعت روح والتل كتلهه
عيون الزلم يحسين ماترحم اختك
وهالشدة يمه حسين يا من يحلهه

يمه يحسين يمه يحسين
~~~~

شفت الشمس ذَبلتلك اعيونك
وارمال الصحاري جَـوّت امتونك
يا ندي نشفت روحك الحسرة
من شفت طلعت هايمه ضعونك

طـالـعـات طـالـعـات__وانت بأصفاحك تكض
طـالـعـات طـالـعـات__طافن الصحره ركض

تلگت بناتك حـيـف خـيـل المنية
ومـيـدان صدرك صـار للاعوجية
يحسين يمه الخيل مارحمت احد
طاح الدمع بالطيف وافـرك بديه

يمه يحسين يمه يحسين
~~~~
فـزيـت مـن الـحلـم مـثـكـولـه
وبروحي احاجي ماهي معقوله
شيخ العشيرة يطيح يم غربه
مـاكـو كفيل و لا أكـو مكفوله

گـلـبـي نار گـلـبـي نار__وخذت حيلي العايله
گـلـبـي نار گـلـبـي نار__يعينك الله بكربله

مرعوبه ريت اطغاث احلامي تطلع
وضعنك يكونه بماي مو ركضه يشبع
واعله الـبـنـات فياي انته و گمرهن
الطلعت بهيبة اويـاك مهيوبة ترجع

يمه يحسين يمه يحسين
~~~~
خادم الحسين محمد منير المياحي

#محرم_الحرام_1445هـ
لحن التراث
مولاتي ام البنين (ص)توصي اودلاها (ص)
وتحثهم على الوفاء والبطولة........
~~
يماشين بضعينة ماي صيرو ادروع لخيمهه
يجعفر، يا عـبـد ، عثمان، هـا يا گمر هاشمهه
~~

الـحـرة اتحشم الـويـلاد و لمتهم حواليهه
هاي ام الوفه ام عباس حجاية بخت تحجيهه
امشو بضعن ابو اليمة و زينب بالكم ليهه
ها يأسباع خوفي هناك يحف الخطر رجليهه

اجه يوم الوفه يأسباع
واحدكم يطر الگاع
اريدن الخبر ينذاع

ونعم ارباتج يصيحون بيكم روحي اشيمهه

~~

يجعفر يا بعد عيناي بـالـك يلما تخلف اوعودك
تمطه ارجاب ظهر الخيل وبسمتك تترس خدودك
اريـدك تشنط الـفـرسـان لـمـن تـگـرب احـدودك
نخيتك وانت صل بالكون خل الدم ترس جودك

روش اعله العساكر روش
لا ترحمهه ابد الجيوش
ولعضيدك درب مفروش

تجدس الخيل فوك الخيل ورواياهم تحطمهه

~~

يعبدالله يلب الـروح اصـوات الگـوم سجنّهه
يمعروف برنين الطوس وانته الضربة توزنهه
هـك هـذا الـعـلـگ مـنـي ومن تذكرني تدفنهه
ومـن تـشـتـد نـزيـز الـدم خل يوصل مواطنهه

خيظل عالي صوت الماي
حته تأمن اهله اهواي
اعرفك بالضرب چواي

عجيد ومن تفور تغير وانته الحومة لازمهه

~~

يعثمان انته هزبر صيد حيل الگط جماجمهه
سابگ سيفك و رمحك الاول يـاهـو يـثـلـمهه
حيل اسحگ طواغيها وفـن الـحـرب عـلـمـهه
وسريات العساكر كـون وحده بـوحـده تردمهه

خَيضك الهوه عالگوم
سيفك لعبه عالزدوم
لا تتعب عليهم حـوم

مثل الحنطة طش الروس ونوب احصد ولمهه

~~

يأجبير اخوتك عـبـاس وانته الـخـدر مسوؤلة
مااريد اسـمـع يكولون بـخـيـم عطشانه مدلولة
يصگار الـگـناطـر مـوج يـمـك مـامـش افحولة
وعـرج الهاشمي امـن ينط ياهـو الرايده ينولة

سطر ارگابهم عالشط
وخليهه الشگر تفحط
ضربتك ابـد ما تغلط

يخطاف النفس والخيل خلهه تدوس بأزلمهه
~~
خادم الحسين محمد منير المياحي

#محرم_الحرام_1445هـ
لسان حال مولاتي فاطمة العليلة صلوات الله عليها...
~~~~~

رجـفـت الايـد و رفـت العين
عرضة الدمعة اوداع مو زين
ما دار لَـيـّـه ضـعـن الحسين
من يمي راحت كلهه بسكوت

~~~~~

وجهي المفارگ لـونـه مخطوف
تبعد الخطوة ويگصر الشوف
عالگاع روحي تزحف ازحوف
اتمنيت بمجاني ويجي الموت


~~~~~

سعفة الگلب واتمايل بـريـح
اتمنيت ماكو ضلوع و يطيح
صوتي وراهـم يا هلي يصيح
ويرجع عليه بس صدى الصوت

~~~~~

جفني بـدمعته تـارس الـخـد
لا يرمش و لا يرضى يـنـسـد
جمرة الـگـلـب مـا بـعـد يـبـرد
مــهـجور صـار وجـنـه تـابـوت

~~~~~

ياگلب عـيـش ومـوت مذبوح
مـامـش عيون اتسامر الـروح
انـزف عذابك وابـقـى مجروح
والينعى فـگـد حسين مبخوت

~~~~~

ذابـل بـواجي شـحـم الـعيون
مـو متن راسي امفارگ متون
يـصوابهم بـگـلـيـبـي مـدفـون
وأنـشـغ عليهم گـلـبـي مفتوت
~~~~~
خادم الحسين محمد منير المياحي

#محرم_الحرام_1445_هـ
#لمولاتي_فاطمة_العليلة_صلوات_الله_عليها
((انكسار العليلة))
____

حملو__وانه عيوني عليهم
احتاريت__ماكلولي شبيهم؟!
يهلي__ليا ضيم تعوفوني
تانيت__ما اشرتلي اديهم

من ماكالو اهلي صعدي خنروح
اهنا بَـيّـن عله الروح انكساري
هـا يأجدامي عينني عـالـوداع
امن يبعدون عود اطفي يداري
انفت گلبي واگلهم گلبي رحمو
عليلة ويهلي جا شيطفي ناري

أي لـلـنـعاوي..دلالي صـبّـح...لـلـنـعـاوي
حسين ناوي..لاوين ابوي ..حسين ناوي
عافني العلاوي..ركبن..وعـافـني العلاوي
____

عالباب__مـانـزلـت جفيني
سَدرو__وضيعو مني سنيني
روحي__راحت ويه الراحو
حسرات__جن جف يحاجيني

انحنيت وانه اعاين تبعد النوگ
وجف من هودج ويومي عليه
جف يشبه جفوفي وكلش زغير
تمعنت وعـرفـتـه جـف رقيه
حسيت بوادع اختي أكو موت
وبـعـد ما نلتقي غـاد المنيه

گلبي ومصابه..ويلاه يا..گلبي ومصابه
اوجوه الخرابه..امبينه تره..اوجوه الخرابه
نفس اليـ بابا..اهنا والسبي..نفس اليـ بابا
____

الفارگ__الله يساعد ضلعه
يحسين__شبجيلك وشأنعه
عالگاع__اتراب النوگ اشتمه
متعوب__جفني تسده الدمعه

يگلبي المن تدگ بطل تدگ عاد
بعد ما تسوه روحي هذا حدهه
على ارموشي عگبهم سَدّر الشيب
وغواش امن البجي العيون سدهه
هلي ياگلبي كسروا خـاطـر الروح
شيردهم لَـيـه والـلـمـة اشيردهه

ماعطلتهم..عافوني جي..ماعطلتهم
ماچني بتهم..غص گلبي شو..ماچني بتهم
للموت زتـهـم..ايـالـدمـع..للموت زتـهـم
____

ترجع__ان شاء الله يعيوني
اللمة__وتگعد يمي ضعوني
ابقى__هذا اليوم انتظره
احضن__بيهم ويحضنوني

گبل مرتاحه واهلي كلهه ويـاي
وسهم الـفـراگ غبّش بيه ينبض
بقيت أحلم هلي عـالباب جايين
وطاسة ماي بيدي وليهم اركض
فص العين مولح ليش ما ليش
ما حسبوني هـاي اگبالي تعرض

ماني عليلة..اتحمل سفر..ماني عليلة
حته اشتكيلة..ياهو البقى..حته اشتكيلة
ليلة اعله ليلة..اذبل گمت..ليلة اعله ليلة
____
خادم الحسين محمد منير المياحي