#مشاركة_من_صديقة_القناة #خادمة_الرباب 🚩 #أم_البنين_ع يبني من بعيد اتــوادع اويــــاي
ياعباس احذرك حته من هــــاي
علينه حسين اشوفه حاط عينه
نجرحــه لو تشابگنـــه وبچينـــه
ياعباس احذرك حته مــن هــاي
ــــــــــــــــ ✾ ✾ ✾ ـــــــــــــــــ
حسين كتله امن العواطف حيل حسّاس بنظرته
احنييّن ابگد الترافه تنجرح ريته ابحسرته
گلبي لو تدري عليمن يرفظ اوداعك عذرته
ينكسر گلب الزچيه يبني گلبه لو كسرته
ودعني ابنظـــر يالكلك احساس
لا نكسرله خاطـــر يبني عبــاس
لا ينـــغث ابــــو روح الحنينــــه
نجرحــه لو تشابگنـــه وبچينـــه
ياعباس احذرك حته مــن هــاي
ــــــــــــــــ ✾ ✾ ✾ ـــــــــــــــــ
لا تگلي اوداعت الله بصوت والغالي يسمعه
يذكر امه اتروح روحي اولا اشوف ابعينه دمعه
اتصور الزهره الحنينه هسّه لو يمّه اوتودعه
اوياك اخذني اتگله يبني ومحسن اخذه بهذا وضعه
يغفه المحسن اخذه بذيچ الاخيام
مــايعطش ولا يحتاجله اسهــام
روحه اتردله مــن تنخا سكِينـــه
نجرحــه لو تشابگنـــه وبچينـــه
ياعباس احذرك حته مــن هــاي
ــــــــــــــــ ✾ ✾ ✾ ـــــــــــــــــ
انت غالي يابو فاضل لكن امري مو بديه
حسين ابني وهذا كُبره وبعده يمه ايصيح اليه
وزينب اتغار اعله چفك من تِلف ايدك عليه
اتصدلي من طرف العبايه ابنظرت الحره قضيه
يبني الخاطــر اختـــك لاتجيني
فـدوه انــروح الهــا انــه وبنيني
خدر اختـــك يحمــــاي الضعينه
نجرحــه لو تشابگنـــه وبچينـــه
ياعباس احذرك حته مــن هــاي
ــــــــــــــــ ✾ ✾ ✾ ـــــــــــــــــ
عمري خلصته ابخدمته هالعمل موسهله اخسره
حسين ليفارگ خدمته ماله معنه ايعيشه عمره
تبقه عندي بس وسيله للحسن اكنسله گبره
اسنيني ابديها اعله لحده وابچي عمري قطره قطره
احط اذني اعله گبره وادعي للموت
يمته امن الحسن راح اسمع الصوت
كسر ضهري الگمــر گطعو يمنــه
نجرحــه لو تشابگنـــه وبچينـــه
ياعباس احذرك حته مــن هــاي
ــــــــــــــــ ✾ ✾ ✾ ـــــــــــــــــ
انه للطف راح اجيكم حته اعوضك عن وداعي
مني تسمع عالشريعه لعتذارك ماكو داعي
الله يتقبل چفوفك يبني مشكوره المساعي
يرتفع صيتي بوفائك نبلة العين ارتفاعي
ادري الزهــره راح الگيها يمكـــم
هنيــــالك تگــــلك انــــه امكـــم
اخوك اشحال بينـك يبني بينــه
نلم جسمك يبــو فاضـل بدينــه
نجرحــه لو تشابگنــه وبچينــــه
ــــــــــــــــ ✾ ✾ ✾ ـــــــــــــــــ
راح اجيك اشفافي حمره امقبله حسين ابوريده
اشبع اجروحه ابدموعي لكن ادموعي شتفيده
من چفوفي خنصر اگطع بلكي ارجع خنصر ايده
حيره احتار ابضلوعه مو ضلع واحد واعيده
اليّـــام الثلاثــــه يمّــــه باقيــــن
اتنــاوب نعــــي وي ام الاحسين
يعلم مــن ننــوح احسين بينـــه
نجرحــه لو تشابگنـــه وبچينـــه
ياعباس احذرك حته مــن هــاي
ــــــــــــــــ ✾ ✾ ✾ ـــــــــــــــــ
✍ كلمات الشاعر ثائر الربيعي
ـــــــــــــــــــــــــــــــــــــــــــــــــــ
👈 هنا نختار أفضل مشاركات متابعينا الأعزاء وننشرها بأسمائهم في قناتنا
☀منبريّون حسينيّون
☀@MINBARIYOON ـــــــــــــــــــــــــــــــــــــــــــــــــــ
☀ منبريّون يتواصلون
☀ https://t.me/joinchat/AGWwjjzFRmjUTNci5jQRfA