#الناشر_الحاج_فلاح_حسنكلما اجيك .. يلفي الشمر وراي
لحسين اروح .. خيل انظر ابگفاي
من الشمر والخيل . وين البد ابهالليل
محتاره يا عباس
محتاره كلما اعتني يمك شمر يلفيني
وايگلي عوفي كافلچ او صوب الوغه ايوديني
اتعنه لحسينك تجي الخيل انحب اتخليني
تركض وراي او لصبح مگدر اغمض عيني
محتاره اخوي .. وين امشي واستراح
مامش خيام .. بيها اغفه لصباح
وابجسمي ماظل حيل . وين البد ابهالليل
محتاره يا عباس
_
حاولت اغافل هالشمر او صوبك يخويه اتعنه
لن شاهديته ايطگ متن خوله او رقية او سكنه
يمهن رحت يابه الفضل حاولت انه منعنه
واضربني فوگاهن يخي واجروحي كلهن منه
ظليت اصيح .. يابه الفضل تعال
وينك يخوي .. ارجعلي لو خيال
من متني دم ايسيل . وين البد ابهالليل
محتاره يا عباس
_
يم الحُسين آنه اركضت والخيل اجتني ابهمه
لن ابحوافرهن شفت ياخويه يگطر دمه
ترعبني وانظر عالأرض امطشر يكافل جسمه
امگطع وصل يابه الفضل حاچيني چا شيلمه
شيلم اخوك .. او منعتني هالخيول
ابصدر الحبيب .. يابه الفضل تجول
جسم الأخو شيشيل . وين البد ابهالليل
محتاره يا عباس
____
عن الشمر چا وين اظم روحي او اظم اطفالك
كل ودي اجيلك يالأخو واتخبه عن چتالك
بعباتي اظم خوله او خفت إرقية تتعنالك
من تنظر السوط الشمر تتمنه هيه اگبالك
رادت تجيك .. إرقية بالظلام
يا عم تصيح .. يمك اريد انام
راوونه عمي الويل . وين البد ابهالليل
محتاره يا عباس
_
تحت العباية نومت سكنه او يخي گعدوها
جابولها ثوب الأبو يابه الفضل راووها
سلبنه نادوا والدچ او ذاكى القميص انطوها
شمروا قميصه اعله الترب او تنحب علية خلوها
شافت دماه .. ابثوب الأبو حرام
گامت تصيح .. يا والدي السلام
والدنيا بيه اتميل . وين البد ابهالليل
محتاره يا عباس
_
راح امشي لشام او بعد ما نلتقي يالغالي
امودع يخويه او راح اظل اتذكرك للتالي
وياي بس راسك فقط برماح اشاهد عالي
او عالهزل امكانك ترى يابه الفضل ظل خالي
وياي اريد .. عالناگه يالكفيل
تصعد يخوي .. واتصعد العليل
بينه احنه من ايعيل . وين البد ابهالليل
محتاره يا عباس
حيدر الحلفي
#الناشر_الحاج_فلاح_حسن #حلم_مذبوح #لايسمح_تغير_اسم_الشاعر
