ماجرای یک خواب
وخاو دی یم آو گلالی بردم
افتامی د آو د تشنه ی مردم
مردم جم بینی و لو رودخونه
جنازه سردم بردن و حونه
قوم و قبیله همه اومانی
باند و بلند گو هم سیم نیانی
جنازم بردن و غسالخونه
گتن نباید زمی بمونه
جو مه سفیدی کردن د و رم
سیر گریوسن د بالا سرم
سه چار نفر هم قورم کننی
بالا سر مزار پکر مننی
موقع جنازم ونن د مزار
جمعیت بی و سه چار پنج هزار
دنگ بلنگ گتم مه حالم خووه
فقط دایاکه مر اشنفتووه
مردمن دی یم همه جوری بین
عجب مردم شر و زوری بین
دشو چی گرگ و دشو چی وراز
دشو زرافه دس و پا دراز
هیکل چی آیم ، قیافه ناجور
پنجعلی شل و براتعلی کور
همسایی داشتیم چی روایی بی
یه حیله گر بی خدایی بی
هر جا سیل کردم هه بیابو بی
دو سه کر ولگرد سر خیابو بی
ونو که د مه زیتر رتنی
بار و بنه شون بیتر بستنی
وض اوضاشو خیلی بد نئی
تاک یکیشو د او حد نئی
باوه من دییم ، داامن دییم
مابین هردک شو گری حفتییم
سیل کردم دییم خوورزا دارم
خوم تنیا نیسم برار زا دارم
عاموم اوچه بی گت بیا بشی
هنی وام دوس بی ، نازم میکشی
همه چین دییم د آن واحد
زار و زمی هم بینی وه شاهد
هه دور سر میزم سی ره فراری
نمی گریتم یه جا قراری
شیخی آوردن قری دعا کرد
ایماما شیعن همه صدا کرد
وه چار چقلی وننم د قور
پر سرم کردن برد و خاک زور
مردم که رتن قومونم منن
گریوسن و فاتحه ونن
گتم تشکر د لطف شما
کس وا گریوه نیما وا دما
منم د ظلمت قور وحشتناک
تکو نحردم زیر او همه خاک
همه رتن و مه تنیا منم
لش سردم و گور و کفنم
وحشت غروت افتا د جونم
هاسم ورگردم دی یم نتونم
داد بیداد زیادی کردم
قپ ریت ونم کفنن دردم
دو تا فرشته بالا سرم بی
خجالتیم د جومه ورم بی
یکیشو پرسی که ربت کیه؟
سی چی پروندت ایقدر سیه؟
یکیشو پرسی دینت کومیه؟
د کومی مرجع تقلید کردیه؟
چه لرز تویی افتا د جونم!!!
دردی تیر کشی د ملشونم
افتام د گیر نکیر و منکر
زنم د زمی بردنم توک سر
تا میرت بالا گرز آتشی
صدا خشنی وم می گت بشی
هم هنی پرسین اربابت کیه؟
سیل ئی پرونده کو چنی سیه
کر و لال بی یم زونم بنسی
گتن سی چی وه کوری خنسی؟
دو نفر قورم زیرو رو کردن
د هار تا بالا لشم بو کردن
یکی شو زشت و کریه المنظر
بد اخلاق بی و مایه درد سر
یکیشو قشنگ ، وه یک ونه بی
خوش اخلاق بی و لو د خنه بی
فرشته خووه، ملاکت گنه
و رفیقیشو بی یم د خنه
یارو ملاکت چی زغال کوتی
چی ی جمع میکرد میون د قوطی
جرات بی جرات دشو پرسی یم
د کار خوم و چی ی که دی یم
فرشته خووه پشتیبانم بی
هه چی مادر مهربانم بی
اما ملاکت نصیوتو نووه
گرگ هم بئینش زرتلاق مووه
غر حرد وا دورم هه چپ سیلم کرد
دس و یه غه بی ملشونم درد
اسم ایمامیا رتی د ویرم
د خجالتی ها سی بمیرم
دو قدم رتم هنی ورگشتم
خیلی زلم رت ، اسبی در گشتم
گتن خوت بیا پروندت بجور
اگر تونسی گنایات بشور
هرچی سیل کردم نامه اعمالم
چی خوئی نئی د دس و بالم
پرونده پر بی د کار زشتم
وا دستخط خوم سیشو نوشتم
شرمنده بی یم د کردار گن
فرشته گنه تون بی گت نخن
اجازه ندن گری بخنم
وم گتن بدو رو تا جهنم
هر چی التماس هر چی ری ونم
و گرز و شلاق بیشتر می زنم
بردنم سر پل خیلی باریکی
و ننم د چاه خیلی تاریکی
خدا رحم بکه و ئی بی کسیم
هفتا هزار سال بونش نرسیم
مار و اژدها زیادی دش بی
نه خاو نه خوراک ، نه آرامش بی
زنجیر کردار هه د ملم بی
زالنه هم د هر دو قلم بی
و هولک دولک وننم د تش
گتن یه جاته هیچ نفس نکش
یه دفعه دی یم د امر خدا
درگایی واز بی بی سر و صدا
نوری پخش بی د چپ و راسمو
یکی او ما د سمت آسمو
صورتش هه چی قرض ماهی بی
فرمانروا بی ، پادشاهی بی
دو فرشته ویر سر ونن هار
یهو همه چی بی عین بهار
ملائک همه همهمه کردن
شادی سی حسین"ع" فاطمه"س" کردن
بال ملائک فرش راهش بی
بهشت عاشق ری ماهش بی
لوه خنه کرد امیدوار بی یم
الهی شکرت مولامن دی یم
اشاره کرد وه ان الحسنات
سکوت افتا د کل کائنات
دستور ده وشو آزادم کنن
وا رفتار خو دلشادم کنن
گت یه د دنیا مخلصم بیه
یه جایی ریز مجلسم بسه
روز عاشورا سیم گریوسه
نو مم اشنفته دلش گیرسه
د خاک منه مهر نمازش
هدیه دارم سی راز و نیازش
نوحه سیم گته روز عاشورا
سی علی اصغر قلبش هلورا
پرچم عزا تا اربعینم
سر بونش بیه تا مه بئینم
و یاد عباس روز تاسوعا
مشکه ور داشته بیه و سقا
یه سی رقیه نذری کرده
چایی و شربت حاضری کرده
سیر گریوسه سی علی اکبر
دلش اشکسه سی علی اصغر
هر وقت آو حرده و یادم بیه
مرید امام سجادم بیه
نامه اعمالش ها و دس خوم
ایسه شما ها بوریتش و کوم؟
تاک خطایی داشته د دنیا
اما دورس نی بیلمش تنیا
یه چی غلام خانه زاد مه
بورمش خدمت بی بی فاطمه(س)
عجب خاووی بی حیف بیار بی یم
خاو سختی بی بهشتن دی یم
آذر 94 - منصوری
@grlbl