#دلنوشته_محلیگردنه سر محله دله، چه انده باصفا بی یه
هر کجه ره قدم زومی، مهروونی پیدا بی یه
صبحانه ره که خردمی، چاشت شیمی همسایه سره
جانِ همسایه سونِ مه جان گت ننا بی یه
خانما محله دله، با هم شینه هیمه کرون
ظهر تا آفتاب بَزوبو، مه جان ِمار پیدا بی یه
نماشون که بهیبو، همه شینه تا بازکلی
بازکلی خِنه نیّه، مردمه تفریحگاه بی یه
هر زمان نیسون بمبو، اَمه چِشَم راه دَیی یه
دیاری چن کوچِ بار، نیسانه سَر پیدا بی یه
مردم ِ اثاث، دیگه یخچال و فرِ گاز نیّه
چند تا دست لحاف و چند تا کرک وچینکا بییه
بیست و شیش که بهیبو، شینه امامزاده حسن
اسب سواری کردنه، چه انده با صفا بیه
مسابقه ی کشتی، وشونه سرگرمی بی یه
بحث و دعوا نَییه، پهلوونی جدا بییه
اَتی شینه کِرِ سَر، رفقونّه شیرنی دانه
کرِ سَر که اِشایی، جانه محل پیدا بییه
هندونه و خربزه، بیست و ششه میوه بی یه
بازی هفت سنگ، بالای کوه، گَت ِ کا بیه
دور خنه باز بییه، حصار نیّه ته دور و ور
نماشون محله دله، گسفنه ونگ و وا بیه
خنه دور گرد نییّه، مهر و محبت فراوون
مردمِ سره ی پیش، گسفنه چراگا بییه
چپون و گالش، امه محله ی آبادی بینه
محله ی نگهبان هم، اون سگ ِباوفا بیه
امه اوی ِ خِردِنی، نروی بچا او بییه
خنه برق دنیبیه، همش چراغ لمپا بییه
همه جا صلح و صفا و مهربونی دهییه
مرد ریش سفید، امه محله ی شورا بی یه
چند روزِ اول کوه، همه خنه ره گِل زونه
اسبه گل که بزوبون، خنه ی سو صفا بیه
دترون دبّه به دست، بانگه به سَر، شینه نرو
ضبط ِصوت نداشتنه، چپّون ِ لل وا بییه
شو نشینی کِردنه، دور و درازه گپ بی یه
انّه شونیشت کردنه، تا که روز دیم وا بی یه
تنیره سر زردیجه نون، امه سوغات کونون بییه
جانِ مار خسّه تن،مه خنه ی نونوا بی یه
✍ #حوا_واحدی_گشنیانی🇯🇴🇮🇳
@LafoorMyCountryبرای حمایت از ما، لینک بالا را
👆👆به گروه ها و دوستانتان فوروارد کنید.