ام وتباوع للمهد ....... خالي خالي
وتكله عبدالله اشكثر...غالي غالي
كل حلمي ابحضني اينام....ما ادري اتبوكه اسهام
___
دللو يالولد يمه دللوه
نحرك بالسهم يوليدي كطعوه
يالعطشان جنت ورايد الماي
ريكك بالذبح يوليدي رووه
من انكطع نحره ابسهم ويلي ويلي
مثل الجبل من ينهدم حيلي حيلي
شكد عشت وياه ايام ....ما ادري اتبوكه اسهام
____
يالزغير وبعد ما مرك افطام
نحرك وينه يمه ووين الاسهام
شمحلاته العمر لو يكضي وياك
من بعدك ثكيله اتصير الايام
دمك مطر صوب السمه طايح طايح
ازغيرون بعدك عالكبر رايح رايح
ما شبعت عينه احلام ......ما ادري اتبوكه اسهام
____
ام واحلم اشوفك يالولد شاب
ست اشهر وشمعك خلص وذاب
يبو طول الحلو الما حدتك عين
عمت عيني اعلى طولك شابع اتراب
عطشان لكن بالدمه سابح سابح
مو للحظن صوب الكبر رايح رايح
كل ضني عيونه اتنام.....ما ادري تبوكه اسهام
____
شمحلاته الصبح من يبدي وياك
وسالم يالولد كدامي الكاك
ست اشهر وتسعه ابطني اباريك
كل عمري نذرته لخاطر ارباك
تغفه اعلى ايدي يالولد ضني ضني
ما ادري يخفيك السهم مني مني
اتخيل طوله اوهام ....ما ادري تبوكه اسهام
_____
الله يساعد التفكد بالغروب
بكل لحظه تحن وتصير يعكوب
هيه الروح شمعه ونار العزاز
لمن تشتعل بالمغرب اتذوب
بكاروك تتخيل بجي منه منه
راح وبعد ماكو خبر عنه عنه
شاف الدم عكلي وهام ...ما ادري اتبوكه اسهام
_____
#لاتنسوا_صاحب_الزمان_من_دعائكم#اللهم_عجل _لوليك _الفرج