#مرحوم_استاد_حسینی_سعدی_زمان#ورود_به_مدینه#بشیر#حضرت_صغری_سبخش ۱
@ganjine5یتوب مدینیه چون بانوانِ مُلکِ حجاز
علی عیالی گلور یثربه دوشوب آواز
سوادِ شهر نمایان اولان زمان فی الحال
اولوبدی حضرتِ کلثوم چوخ پریشان حال
شرارِ آهیله دنیانی دلکباب ایلدی
دولاندیریب یوزینی یثربه خطاب ایلدی
بیزی قبول ایلمه جدّیمون
مدینه سی سن
گیدنده گیتمیشدوخ چوخ جلالیله سندن
و لیک ایمدی پریشان و بینوا گلوروخ
ایدوب جلالیمیزی چرخِ دون فنا گلوروخ
گیدنده سندن علی اکبرِ جوان واریدی
یانیمدا بیر نچه نورسته پاسبان واریدی
جوانلاریم قیریلوب، اکبریم ئولوب امّا
گلور دلینده اوغول وای قرا لچک لیلا
گیدنده سندن ابوالفضلیدی پرستاریم
بیزه محافظیدی اول رشید علمداریم
سالوبلا قولّارینی کربلاده قومِ ظلوم
باسوبدی پرچمینی باغرینا گلور کلثوم
بیری سوروشسا اونا یوز ویروب نه درد و اَلَم
حکایت ایلر اونون سرگذشتینی بو عَلم
گورن بو پرچمه زخمِ خدنگ چوخ وورولوب
بولر نقدر بونون صاحبینه اوخ وورولوب
شهید ایدوبله بنی هاشمین جوانلارینی
سو اوسته تشنه توکوبلر تمام قانلارینی
پیمبرین قاپوسی باغلانوب چراغی گیچوب
سو ویرمیوبله حسین سو یرینه قانین ایچوب
بو سوزلر ایتدی او پوزقون قطاره بسکه اثر
ویروبله سس سسه آغلاشدیلار مخدّره لر
گلوب فغانه چکوب آلِ مصطفی' فریاد
نزول امری ویروب آل حیدره سجاد
دوباره آلِ علی امری مشگله دوشدی
قیامت اولدی همان یرده قافله دوشدی
@ganjine5بورا کیمی یازیلان مطلب اتّفافیدور
ولی بو صون خبری نقل ایدن نراقی دور
زبانحالیله بیر آز تصرّفاتیله
او مطلبی یازیرام آغلادان نکاتیله
زیارته گیدن اولسا بولر بو اسراری
همینکه شهرینه چاووش گَتدی زوّاری
وورار یره عَلمین، حیّ داوری سسلر
باخوب مسافره شوقیله جایزه ایستر
بشیر ایسته دی رسمیّته بونی سالسون
علی قیزین وطنه گَتدی جایزه آلسون
دئدی کنیزه بو مطلبده اهتمام ایله
منیم دلیمجه خانم زینبه سلام ایله
بشیر عرض ایدوری سویله قیل منه اکرام
یتیشمیشوخ وطنه، مرحمت ایله انعام
گلوب کنیز خانم زینبی ایدوب حالی
ایشیتدی بو سوزی زینب پوزولدی احوالی
اولار که گیتمیشیدی کربلاده یغمایه
دوباره شامیده یتمیشدی آلِ طاهایه
اولاردان ایسته دی نچّه قلم حرملردن
آلوب اساسِ طلانی بناتِ حیدردن
بشیری ایستدی زهرا قیزی ایده خُرسند
حسین دیه دیه بوینوندان آچدی گردن بند
قویوبدی بوقچیه اوز عِقدینی او زار و حزین
علاوه ایتدی نچه گوشوارهء زرّین
ویروب کنیزه دئدی ویر بشیره عذر ایسته
دئنه بشیر سنه جایزه گوزوم اوسته
و لیکن ایمدی بغیشله که یوخدی قدرتمیز
سویولمشوخ تالانوب عزّ و جاه و شوکتمیز
گتورمه زینبی درده که بسدی اوز دردی
سیلنمیوبدی یوزیندن اسیرلیق گَردی
اسیرده بولوسن شوکت و جلال اولماز
اسیر اولاندا، بولوسن منال و مال اولماز
بو گوشواره لری آل که قیمتی چوخدور
حریمِ حق مالیدور غیره نسبتی یوخدور
بالاجا قیزلاری من مین دلیله دیندیردیم
قولاقلاریندان آچوب زینتین سنه ویردیم
بو عِقد، گنجِ حیانین دُرِ یگانه سیدور
بویون باقیمدی آنام فاطمه نشانه سیدور
کنیز او بوقچانی آلدی بشیره ویردی او دم
باخوب بشیر اولوب غرقِ بحرِ محنت و غم
@ganjine5گلوب فغانه ووروب باشینه ایدوب ناله
دئدی یوخومدی منیم حاجتیم بو امواله
دئ زینبه بیله آرتورما قلب یاره سینی
مخدّراتین عبث آلما گوشواره سینی
زنانه زینتی سیزدن خانم آلان دگلم
بشیر نوکروزم، شمر یا سَنان دگلم
یارالی قلبیمی علّت ندور کباب ایدوسن؟
مگر خانم، منی شمر و سَنان حساب ایدوسن؟
من ایستورم ذخیره آلام قیامتیمه
او جایزه منیم اسباب اولا شفاعتیمه
غنی ایدوب منی حق دهرِ دون اساسیندن
یانوزدا وار شهدانین اگر لباسیندن
ویریلسه گر منه بیر پاره، عینِ عزّت دور
یانیمدا اولسا اگر مایهء شفاعتدور
ایدون عرایضیمی لیلیِ دل افکاره
عنایت ایتسون او، بو رو سیه گنهکاره
اولان یانینداکی سرمایهء عزاسیندن
کسوب بیر آز منه ویرسون اوغول لباسیندن
کنیزین عرشه اوجالدی صدای افغانی
یتوردی زینبِ کبرایه بو قضایانی
جنابِ زینبِ کبرا اولوب پریشان حال
کنیزه ایلدی تسلیم قانلی بیر دسمال
ویروب کنیزه دئدی سن بونی بشیره یتور
بو مرهمیله اونون زخمِ سینه سینی بتور
دئ آغلاما خانمیم امر ایدور سنی صبره
یانوندا ساخلا، ئولنده آپار بونی قبره
او ساعتیکه دمِ صور اولار قیامت اولار
سنون الونده بو سرمایهء شفاعت اولار
ادامه دارد
🔽🔽🔽https://telegram.me/ganjine5