#مرحوم_استاد_حسینی_سعدی_زمان#کوچ_از_قتلگاهندندی اولمادی کرب و بلا چولینده قیامت
گلنده قتلگهه اهلِ بیتِ ختمِ رسالت
ولیّةُ اللهِ صغری' ، بتوله نایبه زینب
باخوب نگوردی او صحراده واردور اوزگه قیامت
صغیردور او قیامت یانیندا محشرِ کبری'
نجه قیامت اونون وار روایتینده درایت
کواکبِ فَلکِ احمدی یره توکولوبدور
نه حشر و نشر ، که محشر او حشردندی علامت
باخان دییر یخولوبدور حضیضه طارمِ اعلا
تمام صاحبِ انفاس آختارولّا هلاکت
یر ایله ایسّیدی آتلار قویانموری یره دیرناق
قیامت عالمینی گوسترور هواده حرارت
بویاندا ماهِ بنی هاشمی سالوبلا خسوفه
اویاندا قانیله مکسوف اولدی شمسِ امامت
شهیدلر بدنی دوغرانوبدی قطعه به قطعه
سماءِ مُنفَطِر اولدوزلارین ایدولّه حکایت
بناتِ نعش پراکنده در کنارِ جُدی ده
مکشّفات ، گزور قتلگهده اهلِ خدارت
اولان کلیمِ خداونده طورِ عشقیده تالی
گیدردی صاق و صولا ارنی ایدردی دلده تلاوت
گلوردی نالیه سسلردی اَینَ اَنتَ حسینیم
سسیمه سس ویر آنام اوغلی ای امیرِ هدایت
کلیمه طوریده نوری ایدن ازلده تجلّی
مخاطب ایتدی لن صوتینه باجیسین او ساعت
ویروب جوابینی یا اُخت اُنظری لِاَخیکَ
امام صوتین ایشیتدی او کانِ عزّ و شرافت
یتیشدی بیر یره مکبوب تاپدی نعشِ
حسینیبولنمورم که او خاتونه یوز ویردی نه حالت
نه گوردی قارداشی شیرازه دن چیخوبدی چو قرآن
ورق ورق اولوب اعضای نازنینی کتابت
ز بس وروبلا قلیج جسمینه خط اوسته دوشوب خطّ
ویروبدی الفِ آللهه خطوطِ مدّی اقامت
دوشوبدی بِسمِلَهین مدّی آیری نقطهء بادن
قویوب او نکته نی سر نیزیه گروهِ ضلالت
ازلده گون کیمی ایتمیشدی بیر جِدا بوئی معراج
ایدوب غروبینی قوسینِ قربی کلده اجابت
سالوبدولار صغحاتِ زمینِ کرب و بلایه
صحیفةُ اللّهی صفحه به صفحه اهلِ عداوت
کلامِ ناطقی قانیله ایلیوبله مُذَهَّب
یازوبدی فتحه و کسره ، سُهامِ قومِ شقاوت
قویوبلا نوکِ سِنانیله نقطه حرفلر اوسته
سه پَر خدنگیله تشدید ، سخت قلب جماعت
بارالاریندان آخان قان ایدوبدی مُصحَفی مرقوم
رَقیمه نشر اولوناندا هامی ایده لّه قرائت
خیالِ نشریله آت دیرناقی ایدوبدی مُترجم
اولوبدی نشر چو آیات ، عزیزِ شاهِ ولایت
شکست ایدوبله جفائیله دُرجِ علمِ خدانی
اولوب مروّجِ دینِ مبینه خیلی حقارت
اوزین سالوبدی حسینون یارالی سینه سینه اوسته
ازل او نحر اولونان نحرینی ایدوبدی زیارت
باسوبدی باغرینا جان تک او جسمِ پاکِ جریحی
توکوبدی گوز یاشی رخساره آچدی دُرجِ فصاحت
ایدوبدور عرض آنام اوغلی ندن بو حاله قالوبسان
مگر ثواب بیلوب قتلیوی بو قومِ جهالت؟
یارالی پیکریوی دوغریوبلا قطعه به قطعه
نه باش نه سینه نه ال جسمیده قالوبدی سلامت
تمام عضوده بیر بوسه گه تاپولموری نیلوم؟
گوروبدی کیم اولا بیر جسمده بو قدر جراحت
سنون یریوه حسین نحر ایدیدیلر منی ایکاش
سنیله منده ایدیدیم شهادتونده شراکت
بو اوخ که خصم ویروب لامکان مکانینه قارداش
دگیدی زینبوون قلبینه ، تاپییدی سعادت
نه وار باشون باجون ئولسون نه اللّرون نه لباسون
هوا حرارتی قویموب بو گل بدنده لطافت
یارالیه چوخ اذیّتدی قالسا گون قباقیندا
نجه روادی امامه اولا بو نوع جنایت
بو سهلدور که عبا و قباوی جمله سویوبلار
بو ظلمه کوفه و شام اهلی ایتمیوبله قناعت
او کهنه کوینگی که آخر وداعده آلدون
سویوبلار اونیدا ختم اولاندا امرِ شهادت
نجه گوروم قوری یرده یارالی جسمیوی عریان
ایدیم نه چاره کسوب چاره می بو حالِ اسارت
یارالی نعشیوی دفن ایلرم اگر قویا دشمن
شریعت اهلینه چون فرضِ عین اولوبدی بو عادت
شهیده رسمیدی ویرمزله غسل ، قانیدی غسلی
لباسینی کفن ایللّه بسدی بیله جلالت
ویروبله قانیله غسلون ، ولی سویوبلا لباسون
کفن ضروریدی تا اولمیا بو جسمه اهانت
بیر امتیاز گرکدور سنه شهیدلر ایچره
سنی بو امّت ایچینده بابام قویوبدی امانت
دوباره من سنه لازمدی اشگیمیله ویرم غسل
ایدوب امانته امّت اگر چه ظلم و خیانت
ایدم کفن حَدَقِینیمده دیده پَرده لریندن
که نوری گوزدن آیریماق دگل طریقِ عدالت
ایدم بو دوغرانان اعضایه غملی قلبیمی مدفن
مزارِ اکبریله ایلیه بو قبر قرابت
بغیشله گیتملیَم من دیارِ شامه برادر
اسیرم اهلِ جفایه نیدیم یوخومدی فراغت
حیالی عترتوین دورین اهلِ کینه آلوبلار
مسافروخ گیدیروخ یوخ ایدن بو چولده حمایت
الینه قارداشیم عبّاس سویله بیرقین آلسین
بیزی گلوب یولا سالسون باجیوا ایتسین عنایت
یری واریدی کسوک حلقیدن گلیدی صداسی
باجی گذشت ایله اعدا اونی ایدوبله خجالت
کسوبله اللّرینی ، بیدقین ننوع گوتورسون
دیارِ شامه یتورسون سیزی او کانِ شجاعت
گچن گیجه نی علاوه کشیک چکوب یورولوبدور
قوری یر اوسته یاتوب قان ایچینده تا اولا راحت
او قدر زینبِ علیا جناب ایلدی ناله
که دوست و دشمنی آغلاتدی ایلیوبله روایت
عزیزِ فاطمه نین گلدی بیر بالاجا بالاسی
باباسینی تانیوب اشقیادن ایتدی شکایت
ادامه دارد
🔽🔽🔽