🌺 تایپ کننده و ویرایش کننده از : جناب آقای کربلایی حامد محمّدی، متخلّص به زکی
🌺#آرزوی_زیارت و گریز به حالاتِ
#حضرت_ابوالفضل_ع#مرحوم_صحاف_تبریزی (مرحوم حاج محمّدحسین جنّتی مقام)
بخش ۱
هر دلده وار امام حسینون محبّتی
اولسون گرک باشیندا هوایِ زیارتی
بی اختیار دللرون آرامینی آلور
ششگوشه قبرینون اولا هر یرده صحبتی
قانلی گوزیله گوزلوری زوّارینون یولون
گیتسون گرک او کیمسه که وار استطاعتی
هرکیم گوروب بولور او شهنشاهِ بیکسین
بیر صحنی وار بهشتیدن آرتوقدی شوکتی
ایوانِ زرنگارین اودور آختارور گوزی
وار آرزوسی درک ایده بیرده او لذّتی
اوّل قویا یوزونی حبیبین مزارینه
دربانیدور حسینه اودور واردی عزّتی
داخل اولان رواقینه بی اختیار اولور
قبرین گورن کیمی کسیلور صبر و طاقتی
بالایِ سرده اللری قوینوندا دم به دم
رخساره گوزیاشین توکوب آرتار ملالتی
اِیله گوزونده سنده مجسّم او روضه نی
گور تحتِ قُبّه ده دایانان بیر جماعتی
بعضی اوپر حرم قاپیسین، آستانه سین
توأم اولور او حالیده شوقیله رقّتی
بعضی دوروب رواقیده اذنِ دخول اوخور
خوش حالینه، عجب اولارون وار سعادتی
بعضی یوزون ضریحه قویوب دردینی دییر
ایستر عزیزِ فاطمه دن وار نه حاجتی
آچسا بیری اورک گوزونی ایلسه نظر
مطلق ایدر مشاهده شاهِ شهادتی
یعنی گورر که قبرینون اوستونده اگلشوب
حالین پوزوبدی دلده کی اندوه و محنتی
گُل تک باتوبدی قانینه، صدپاره جسمینون...
گلمز شماره نیزه و خنجر جراحتی
دوت مین یارالی سینه سینه اصغرین باسوب
لایلای دییَر آخار یوزونه اشگِ حسرتی
مین اوچ یوز ایلدی اوخلانوب عطشان، وار ایندیده...
غنچه دوداقلاریندا سوسوزلوخ علامتی
گاهی اوپر بوغازینون اوچ شعبه اوخ یرین
گه یوز قویار یوزونه باتار قانه صورتی
هر قدر دیندیرور گوروری گلموری سسی
جوشه گلور آتا بالالیخ مِهر و رأفتی
شامه گیدوب آناسی چکر انتظارینی
ایتموش حرام اودور اوزونه استراحتی
پایینِ پایِ شاهیده بیر نوجوان یاتوب
زلفی بنفشه، عارضی گل، سرو قامتی
اکبردی آدی خلقاً و خُلقاً وَ منطقاً
جدّی رسولِ اکرمه واردور شباهتی
ً
چوخ با ادب جواندی جگر گوشه یِ حسین
بی حد آتاسینون اونا وار میل و رغبتی
امّا قلجلانوب باشی، باشدان علی کیمی
قانه باتوبدی خال وخط و ماهِ طلعتی
گُلدن لطیف پیکری صدپاره دوغرانوب
بسکه آخوبدی قانی گیدوب تاب و قوّتی
بی حال اولوب داخی ایاق اوسته دورانموری
آرامینی الیندن آلوب ضعف و شدّتی
باشین آلوب آتاسی دیزی اوسته نازیله
گور وار اونا نقدر حسینون محبّتی
مجنون ایدوب غریب آناسین چوللره سالوب
لیلا دیلینده ایندیده وار داغِ فرقتی
سال یادیوه امامِ حسن یادگارینی
دامادِ شاهِ تشنه دی، وار چوخ شرافتی
طوی خلعتی اولوب کفنی، طوی حناسی قان
قلبی سینیقدی یاسه دونوب بزمِ عشرتی
زلفون یولوب او قدری باشی اوسته نوعروس
گیت گورنه مُشگ ایگی ویروری قانلی تربتی
واحسرتا سسی گلوری جان قولاقینه
اَلدن آلور قرار، او غمِ بی نهایتی
گر دوشسه خیمه لرده یولون طوی اتاقینه
آهسته قوی قدم او یرین چوخدی حرمتی
فرش ایلیوب عروس یره قانلی ساچلارین
داماد اتاقینون اولا لازیمدی زینتی
سقّایِ کربلا آدی هر یرده ذکراولا
معناده وار او مجلسون اوزگه فضیلتی
کول حاضر ایلسونله، قاباخجا او بزمیدن...
چیخسون کناره هر کیمون اولسا منیّتی
زهرا گلور عزایه اوغول وای دیه دیه
لازیمدی احترامینون اولسون رعایتی
گوز یاشلی سینه سینده ابوالفضلون اللری
اوخشار، یانار او صاحبِ شان و جلالتی
آغلار دییر بو قانی آخان اللره باخون...
اولدی حسینیمه بولارون چوخ حمایتی
بیر مشگ سو یولوندا بو قوللار اولوب قلم
سیر ایلیون شقاوتِ اهلِ عداوتی
اوخلاندی مشگی، دوغرانوب اعضاسی بند بند
وار ایمدیده سوسوز بالالاردان خجالتی
زوّارینه دیون ادب ایلوب ملاحظه...
سقّا یانیندا ایلمسونلر سو صحبتی
قبری او علّته شهدادن دوشوب کنار
دلدن اوزی قبول ایلیوب کنجِ عزلتی
گوز یاشلی وار عریضه یازان توزلی قبرینه
مشهور اولوبدی گون کیمی کشف و کرامتی
باب الحوائج اولمیوب عالمده بی سبب
وار تحتِ قبّه سینده دعا استجابتی
زوّاری ایندی قبرینی آغوشینه باسوب
برپا ایدوبله شورشِ روزِ قیامتی
ادامه دارد
🔽🔽🔽https://telegram.me/ganjine5