مرحوم استاد حسین
#شأنیحسینون اهل بیتی یولانور شامه نه غافلسن
برهنه ناقه وار، بی پرده بی روپوش محافل وار
یتوبدور بیر قبیله قتله، قالموب جز مریض اما
محافظ اولماقا اعراب وحشیدن قبایل وار
اوشاق گور تترمز برگ خزان تک، گورسه مامورین
النده قمچی وار، چگننده شمشیر حمایل وار
اسوب تیرردی گلبرگ خزان تک نازنین قیزلار
دیرسن بیر چمنده تند باد سام اسور، یل وار
سارالمیش آج سوسوزلوق شدتندن رنگی اطفالین
طراوتدن دوشوب گل، گورموسن غوغای بلبل وار؟
یانوب گون اوزلیلر گون تابشیندن، جلد اولوب تجدید
اگرچه یوزلرینده تللری مانند سنبل وار
باتوب توز تورپاقا یوز، خشک ایدوب گوزدن آخان یاشی
او حالی گورماقا آغلار گوز اولسا، دیده دل وار
حسین باشین عبث اوخشاتمادی دوتقون آیا زینب
گوروردی مه جمالین قان دوتوب، توز چولقیوب کول وار
گیدر بیراهه دن یول، کاروان اهلی گجه گوندوز
نه زاد راحله نه مسکن و ماوا نه منزل وار
نجه محمل نشین اولماز گجه یول گیتماقا مایل
که هر بیر محمله بیر ماه تابنده مقابل وار
نجه مجنون کیمی اکبر جداده چوللری گزمز
شکسته قلب لیلا تک ، شکسته نچه محمل وار
نجه سرسلسله بولمز علیل سلسله بندی
اولار که جمله سنده قید و زنجیر و سلاسل وار
نجه هر لحظه تازه لنمز داغی عباسون
که دائم گوز قباقینده النده نیزه نوفل وار
نجه یاددان چیخاردار سود امر طفلین رباب آیا
که اصغر باشی نی ده النده ابن کامل وار
نجه زیبنده دور زینب یوزین دشمن گوزی گورسون
معاذالله مگر بو مطلبه، گویا اولان دل وار
یاخوندور ناقه لیلا دایانسون پا به گل قالسون
که سیل اشگ زینبدن بیاباندا اولان گل وار
قرا گونلر ایدنمز قورخودان اوز غربتیندن داد
گوروله قمچی الده، دوره ده نچه قراول وار
قوجاقلاردا اوشاقلار گه یاتار گه دیسگنور آغلور
تکان ناقه وار بانگ جرس وار، داد و غلغل وار
حیا مانع اولور عرض ایلیم بعضی اوشاق ئولدی
بیله نقل ایلیوب اوز مقتلینده بعضی ناقل وار
حسینون بیر قیزی دوشدی او یولادا ناقه دن قالدی
عدو فکر ایلدی گویا محافظده تغافل وار
نه گوردی نیزه باشنده دایاندی شاه دین باشی
ایدوب اوز قدرتین ظاهر دیمه جای تامل وار
که یعنی حشر اولونجا قویمارام بو کاروان گیتسون
بالام چولده قالوب، نه راهنما وار نه وسائل وار
نجه شامه یتینجه گوز گوتورم اهلیتیمدن
اگر چه خالقه تاپشورموشام منده توکل وار
خلاصه کاروانه ایلدی یول گیتماقی مشکل
او باش که اوندا دائم اقتدار حل مشکل وار
قضیه کشف اولوب زجر ابن قیسی ایتدیلر مامور
ایله بی رحم ظالم ای خدای حی و عادل وار؟
قوشوندان بیر نفر یاندی یتیمه حالنه اول دم
یانار صاحب زمان اما او حاله، مین اوچوز ایل وار
گیدوب تاپسا او طفلی، قمچی آتدا ئولدورر بولدی
دلنده رحمی یوخ، ظلمنده پایان تکامل وار
گیدوب زجریله آختاردی او مظلومه قیزی تاپدی
ایتوردی قیز اوزین، گویا گوروب مقتول، قاتل وار
قاچوب رنگی یوزیندن، اسدی برگ گل تک اعضاسی
یانندا گوردی نه عمه آنا نه اقربا، ایل وار
ستمگر زجر ال آتدی قمچیه، آتلی الین دوتدی
دئدی دریای قهر قادره فکر ایتمه ساحل وار
یتیمه بیر قیزیکه آیریلوب اوز اقرباسیندن
قالوب صحراده یالقوز، اوندا آیا نه تحمل وار؟
بالا تا گوردی رافت آتلیه اولدی پناهنده
سیخلدی آت دوشنده گوردی آتلی رحمه مایل وار
دئدی آتلی بالا چوخ وحشت ایتمه، دوشمه تشویشه
بیله فکر ایتمه سندن قافله سالاری غافل وار
آتان باشی دوروب نیزه باشندا انتظاروندور
اونون لطفی سنه اولدن ایمدی شامل وار
و لیک ایستی دور گون، یول اوزاقدور سنده یورقونسان
بو یردن کاروانه چوخ مسافت چوخ فواصل وار
دایانما گل سوار اول ترکمه هنگام سرعتده
اگر نیل مرامه منتها سنده تمایل وار
ایشتدی بو سوزی اول نونهال گلشن ناموس
حیا سیرین ایله بیر ذره، گور تکامل وار؟
دئدی جدیم بو امری نهی ایدوب شرع مقدسده
بو امره ایلمز اقدام او که قرآنه قائل وار
سورون سیز آتلاری منده سورنم گلم آردوزجا
ازل گون بولمیشم راه محبتده مراحل وار
اولار سرعتله آت سوردی، او قیز گه قاچدی گه دوردی
مسلم دور نجه آمالنه تعجیل آمل وار
بیر آز یول گیتدی، اگلشدی یره گوز یاشلی عرض ایتدی
داخی گور منده یارب طاقت طی منازل وار
گوتوردی معجرین باشدان ازل ائتدی ایکی حصه
بو مجمل مختصر مطلبده مین باب تفاضل وار
بیرین مجروح ایاقه باغلادی، سالدی بیرین باشه
گنه دوشدی یولا هولیله گوردی بانگ عاجل وار
یتیشدی کاروانه مین مشقتله او مظلومه
گوروب چوخ رنج و زحمتدن صورا مقصوده نایل وار
آتا باشین جدا باشنده گورجک بیر اورکلندی
دئدی عفو ائت منی، گوگلیمده گر بیجا تخیل وار
خیال ائتدیم منی یالقوز قویوب چولده اوزون گیتدون
خیالیم عکسنون اثباتینه ایندی دلایل وار
جدا اوسته دایاندون قویمادون بو کاروان گیتسون
ثبوت اولدی منه سنده همان لطف اوایل وار
گلوب منظور اله شه باشی گیتدی، یولانوب لشگر
بولوندی حمل و نقل کاروانه اوزگه حامل وار
تخلص شعر در ادامه...