"مع التوقيت الشتوي حابة أقول شوية تذكيرات ونصايح ربنا ينفعنا بيها كلنا. أولاً: وقت المغرب بيكون ضيق وصعب أوي، محتاج تفكر نفسك بيه وتركز معاه أوي عشان ماتسقطهوش، ولو بتخرج من الشغل خمسة مثلا استنى تصليه قبل ما تخرج. ثانياً: وقت الفجر اتزحزح لورا، فبعد ما كنت بتصحاله تلقائي مع وقت الدراسة أو الشغل إلخ هتحتاج تصحاله مخصوص، ومافيش أي عذر يخليك تسقط الفجر وتظبط المنبه على أي شىء آخر، حاول تنام بدري شوية علشان تقدر تواصل بعد الفجر. على قدر إحساسك بالمسئولية وخطورة التفريط في الفرض هتعرف تتصرف. ثالثاً: الصيام في الشتاء أسهل بكتير، الوقت أقصر، والعطش أقل، حاول تغتنم أكبر قدر ممكن من الأيام في الصيام، خاصة لو حد عليه قضاء أيام من رمضان. رابعاً: دي نقطة مهمة ناس كتير بتقع فيها، لا تتكلف المشقة، بمعنى إن طبيعي الوضوء في الشتاء أصعب من الصيف بطبيعة الحال حتى لو توضأت بمية سخنة، ففي ناس بتظن إنه لو توضأ بمية ساقعة في الشتاء هياخد ثواب أكبر لأن المشقة أكبر!، والحقيقة إن الدين يسرٌ وليس عسراً، والمشقة في الطاعة اللي الإنسان بيثاب عليها هي المشقة اللي من أصل الطاعة وليست متكلفة، فلو كنت بتبرد ارحم نفسك وتوضأ بمية سخنة خامساً: الليل وقته أطول فعندك مساحة أكبر لقيام الليل سواء بالصلاة أو الذكر، والقيام وقته بيبدأ بمجرد دخول العشاء. يا رب أعنا على اغتنام الشتاء."