هل من واجبك تعطي فرص ثانية للي أذوك أو غلطوا بحقك؟ طبعًا لامش من واجبك وأنت مش مجبر تعطي فُرص للي غلطوا بحقك، وإذا كان اللي حولك يعتبروا هذا التصرف أنانية فمن حقك تكون أناني بهذا الشيء،، أقول لك ليش؟ ببساطة لأن 90%من الناس مايتعلموا من أخطائهم من أول مرة يحتاجوا عشرين فرصة وأكثر عشان يتعلموا، وأنت لما تعطيهم فرص جديدة يعني إنك تعطيهم فرصة إنهم يؤذوك مرة ثاني ويغلطوا بحقك مرة ثانية. اِعطاء فرص جديدة يعني أغلاط جديدة وربما هي نفس الأغلاط الأولة بس يكرروها عليك شوف بعطيك مثل مثلًا أنت عطيت فرصة لشخص عزيز عليك وغلط بحقك ورجع اعطيته فرصة وغلط بحقك مرة ثانية، هذا الشيء بيخلي البقية يغلطوا بحقك عشرين مرة لأنهم عارفين إنك في كل مرة تعطي فرص للي حولك وتخليهم يؤذوك بإرادتك أنت، ولو جيت تسأل أكثر الناس عن الفرص اللي اعطوها للآخرين بتحصلهم نادمين على قرارتهم وبيقولوا لك حتى لو اعطيت فرص لغيرك بتشوف إن الناس مايتعلموا من أول خطأ وإذا أنت بنتنظر يتعلموا كم بتنتظر عشرين مرة أو ألف؟،مافي فرق لذلك جرب ولو لمرة ماتعطي فرص لأحد بتشوف إن اللي حولك متمسيكن فيك أكثر وحريصين إنهم ما يغلطوا بحقك لأنهم يعرفوا إنك مارح تعطيهم فرصة ثانية لذلك الفرصة اللي معاهم مابيفرطوا فيها بسهولة وبيحاولوا قدر المستطاع يحافظوا عليها، ذلحين البعض يقول المسامح كريم وماينفعش الإنسان يحقد ومدري أيش... أعرف أن المسامح كريم بس هذا الشيء ماله علاقة بالتسامح، شوف أنت لما ماتعطي أحد فرصة مش يعني ماسامحته وكاره له وحاقد له،لاااا طبعًا بالعكس تمامًا يعني إنك مسامح له بس ماتشتيه يتقرب منك وماتشتي علاقتكم ترجع مثل ماكانت، صحيح أنت ماعطيته فرصة يرجع لك ويعدل غلطته معك بس هذا يعني إنك اعطيته درس كبير يتعلمه في حياته ومستحيل ينساه، وصحيح إنها ضاعت فرصته معك بس أنت أعطيته فرص مع غيرك، ومادام تعلم منك، بيصعب عليه يكررها مع غيرك، لكن شوف في استثناء لإعطاء الفرص إذا كان هذا الشخص قريب جدًا منك وماتقدر على فراقه اعطيه فرصة لكن قبل ماتعطيه هذه الفرصة خليه يعرف أنها بتكون آخر فرصة له علمه درس ماينساه طوال حياته وما تعطيه هذه الفرصة إلا إذا كنت عارف أنه يستحقها ومابيكرر عليك أفعاله الأوله وللأمانة في أشخاص يتعلموا من أول فرصه ولكنهم نادرين جدًا. _الخلاصة الناس اللي ماتقدر تستغني عنهم ولايقدروا يستغنوا عنك ويستحقوا تعطيهم فرص اعطيهم لكن بعدما تعلمهم كيفية الحفاظ عليها. والناس اللي يقدروا يستغنوا عنك مايستاهلوا تعطيهم أي فرصة،لأن اللي بيغلط بحقك مرة حتى لو عطيته عشرين فرصة بيغلط بحقك مرة ثانية.