ИШТИХОННИНГ ҚИЗИМАН Қуёшнинг зар қатимидан Каштамга гул тикканман, Орзулардан уват олиб, Жонимга сўз экканман, Сўзни олиб Оқдарёдан Отам билан ўтганман, Йўллар айтсин, йиллар айтсин, Мен отамнинг изиман, Зарбандсойда катта бўлган Иштихоннинг қизиман. Оқтовимни етаклаган Жиловбардори бўлдим, Ҳамма бир тараф бўлса Мен кўнгил сори бўлдим, Ёр бўлмадим йигитга Мен Сўзнинг ёри бўлдим, Азал қаламини ўпган Муҳаббатнинг ўзиман, Зарбандсойда катта бўлган Иштихоннинг қизиман. Сўфи Оллоҳёрни ўқиб Толдим Ҳақ жазбасига, Ҳар кўкламда йўлим солдим Чилмаҳрам равзасига, Мурид бўлдим ихлос билан Ҳар гиёҳ, сабзасига, Эшонларим кийган тўннинг Ямоғиман, бўзиман, Зарбансойда катта бўлган Иштихонннинг қизиман. Эсимда Тўрақул Йўлдош Бошим силаганлари, Чорлаб катта кунларда Уфқим тилаганлари, Тунлар сўз ғалвирида Жонни элаганларим, Ярми айбдан, ярми ғайбдан Зуваламан ўзи ман, Зарбандсойда катта бўлган Иштихоннинг қизиман. Ҳақдан илиқ илтифотлар - Шоён кунлар кутдим мен, Эзгу фикр, эзгу сўзга Юрагимни тутдим мен, Баъзан эса хиёнатнинг Оғусидан ютдим мен, Жон синса-да, лек юракнинг Ҳеч синмаган сўзиман, Зарбандсойда катта бўлган Иштихонннинг қизиман. Дунё кезиб топган ҳусни Оламоройим менинг, Ҳаддим қўйиб сўзласам-да Синмаган ройим менинг, Ихшидхон кўзига босган Бўлиқ дунёим менинг, Миёнқолнинг табассуми - Чеҳрасиман, юзиман, Зарбандсойда катта бўлган Иштихоннинг қизиман! Муҳаббат ТЎХТАШЕВА