ТУҒИЛГАН КУН Бир-бирига бермайин озор, Қўл ушлашиб ёғаётир қор, Теваракда бир майин виқор, Чунки бугун мен туғилган кун. Севдим қишни, аччиқ аёзни, Бўрон чалган изғирин созни, Нафасимда иситдим розни, Чунки бугун мен туғилган кун. Қорхат ўйнаб чопишади вақт, Оёғимга ёпишади вақт, Умрим билан топишади вақт, Чунки бугун мен туғилган кун. Қор кайфида айланади бош, Кўзларимга сизиб келар ёш, Қўлларимга қўнди эллик ёш, Чунки бугун мен туғилган кун.