ابكر أخد لقب ابكر تسالي رغم إنو قاعد يبيع حاجات كتيرة في الدرداقة حقتو زي الفول المدمس والنبق والقنقليز والحلويات رغم الاصناف الكتيرة الكان ببيعها لكنو اشتهر بالتسالي وصار ابكر تسالي بجي شاقي السوق أول النهار بالدرداقة والجماعة يكوركو ليهو .. عمرو فاق العشرين سنة بشوية لكنو احتفظ بكامل الامية ممزوجة بالبساطة وحبو لشغلو وروح الدعابة والمرح وكانت كلو تصرفاتو بتدل على حلاوة روحو عشان كدة الناس كانو زي المتفقين إنو الزول دا قاعد يبيع ليهم (حلاوة روح) قبل ما يبيع ليهم باقي البضاعة يوم ابكر تسالي جا خاشي السوق في مواعيدو والدنيا كساد والسوق واقف والكهرباء قاطعة ومعظم التجار قفلو محلاتهم ورجعو البيوت وأنا وعصام الشيخ قاعدين زهجانين .. عصام من ماشاف الدرداقة بدا يشاغل في ابكر وعزل كم كيس تسالي ونبق وناولو ورقة نقدية وابكر فات يفتش فكة عصام ناداهو وناولو ورقتين تانيات وقاليهو خليهن معاك أصلا السوق الليلة معصلج وصحبانك قفلو الدكاكين ومشو ابكر ابتسم ابتسامة عريضة ورفض يشيل القروش من عصام وقاليهو أنا لسة ماخشيت السوق شفت الرزق لكن والله لو نقصت لي حاجة بجيك وكتر خيرك وبارك الله فيك مابتقصر وخيرك سابق عصام قاليهو بس أنا شايف معظم الدكاكين قافلات وبعدين انا بتعامل معاك كزميل اشيل منك وتشيل مني ابكر قاليهو كلامك سمح بس السوق قدامي ما وراي وكان احتجت حاجة وقسما بالله أجيك ما افوتك شبر . ابكر بعد مافات وأنا سارح مع الموقف دا عصام دقاني في كتفي وقال لي اسمع دي ياسهل واكتبها بطريقتك . أنا زمان خطاط خط رهيب ويوم استاذنا بتاع الجفرافية وكنا في أولى ثانوي شافني بكتب في السبورة وطوالي بعد كم يوم ساقني سلمني للناظر تسليم مفتاح .. قبل ما اندهش من دخولي المكتب المهيب دا لقيت الناظر جاب ورق مقوى ومحضر لي اقلام شيني وطلب مني أكتب ليه أقبل على النفس واستكمل فضائلها فانت بالروح لا بالجسم انسان زال مني الخوف وبديت أكتب والناظر بشارك معاي في ضبط تشكيل الحروف بعد ما إنتهت الناظر علق اللوحة دي علي الحيطة ورجع عاين ليها بفرح طفولي وكان لافي يدو حول كتفي ودي حركة ما متعود يعملا.. كان بتأمل في خطي باعجاب كبير ويحرك اصابعو في كتفي بحركة طروبة كأنو بوقع في لحن جميل زي لما تسمع اغنية طولت ما سمعتها وتحاول باندماج حالم انك توقع اللحن علي الطربيزة القدامك . قال هاك القلم دا أكتب إسمك تحت الخط الجميل دا عشان بعدين لو انا مت انت مشيت حتة تانية الناس تتذكرنا والخط يبقى زمانا بعد كاتبه وكاتب الخط تحت الأرض مدفون . بعد ما وقعت اسمي الناظر طلب من الفراشة اتنين شاي لي وليهو وقال لي عازمك شاي وداير اشرح ليك بيت الشعر عشان ما مقرر عليكم .. بدا يشرح لي في بيت الشعر واعربو لي اعراب كامل . يد الناظر الطوقني بيها واعجابو بخطي وعزومت الشاي وشرحو المطول لبيت الشعر وتخصيصو للزمن دا كلو عشاني ووصيتو لي إنو اكون مسئول عن اي حاجة اخطها وكل التفاصيل دي حببتني في بيت الشعر واتخلل كياني وامتزج في وجداني وختيتو دستور تحياتي إنو الزول يستكمل فضائل الروح . رحلتي التعليمية بعد اليوم داك بقت مركزة على الناحية دي (اقبل على النفس واستكمل فضائلها) بكلاريوس وماجستير ودكتوراة وكل المراحل خاتي البيت دا قدامي عشان يساعدني على الانجاز . اها ياسهل عرفتني قاصد شنو بالكلام الكتير دا قلت ليهو ابدا قال لي كل الشهادات الورقية الكسبتها عشان أصل للدرجة الوصل ابكر تسالي .. تعبي دا كلو عشان أصل مرحلة وصل ليها ولد أمي لاقرا لا كتب مع ذلك ماداير يخون الله ايوا ماداير يخون الله الرزقو الزمن دا كلو .. أول حاجة ياخد لفتو في السوق وكان ما استرزق وضاقت ليهو حتن يجي يشيل مني وما ظنيتو كان حا يجي يقيف قدامي يقول داير دين .. العينة دي أنا بعرفها كويس ياسهل ماتغالطني دا اقبل على نفسو واستكمل فضائلها جد جد _ سهل الطيب 💚💚