حلقة الإعلامية آروى خوجلي من بودكاست "شاي لبن" مع مصطفى النعيم أنا بصنفها على إنها تنمية بشرية دسمة لإنها ذكرت مفاهيم كتيرة ومهمة جداً في الحياة وتحديداً عن نظرتنا لنفسنا ونظرتنا للغير.. من العبارات اللفتت إنتباهي لما قالت: "أكتر حاجة بتهمنا هي ما بتهمنا" قد تبدو عبارة عادية بس لما تركز في محتواها.. حنلاقي معظم وأغلب إختياراتنا عموماً في الحياة إننا بنركز مع تفاصيل ما بتهمنا؛ قد يكونوا أشخاص أماكن، فرص لإننا بنأخد الإمور بعاطفة وللسبب دا بنشكي من الخذلان المتكرر وإنعدام الرغبة والشغف بسبب التجارب الكتيرة لإننا أدينا قيمة لحاجات المفروض ما نعيرها إنتباه من الإساس.. وعقبت برضو وقالت: كنت بزعل أيام الجامعة لما أشوف السناير بعملوا مقالب في الطلبة الجدد بحكم معرفتهم القليلة بجامعة والبيئة بتاعتها.. نحن دائماً بنحب نعقد على بعض الطريق بحين نحن موجودين في حياة بعض عشان نسهلها على بعض من باب الناس بالناس والكُل برب العالمين.. ما حيكلفني شيء لو وصلت مكان وقدرت أنجح فيهو إني إختصر لزول تاني الطريق، أنا تعبت بس ما ضروري الناس تتعب ذي ما أنا تعبت عشان الناس تصل.. بستغرب من تركيبة البشر البتقنعهم إنو نجاح الغير بخصم منهم بالمقابل حتلاقي سعادة لما تساعد الغير وحتلاقي تسهيلات.. القمة بتسع الجميع واي زول بنجح بطريقتو في الحياة، كل ما دعمت زول والزول التاني دعم غيرو مستوى المنافسة حيكون شريف.. في آخر المطاف قالت عبارة عميقة عن الكراهية.. صعب جدًا إنك تصل لمرحلة تختار تكره إنسان، فدا يعني إنك إخترت تقتل نفسك بطريقة غير مباشرة.. طالما كرهت شخص دا يبقى أديتو إهتمام أكتر وحيبقى شاغل حيز في تفكيرك ودا بحد ذاتو إهتمام.. إظهار المحبة إهتمام وإظهار الكراهية إهتمام.. فعشان تعيش مرتاح لازم تصفي مزاجك وما تكون شايل حاجة على إنسان بادل الببادلك المحبة، وإتجاوز الإنسان الToxic.. في نظري دي مسلمات السلام النفسي في إنك تختار نفسك ونفسيتك ومزاجك وما تكن للغير إلا المحبة وما تشاركهم إلا في الخير..💚. #محمد_ورق