*#سلسلة_اتدري_من_يزيل_الهم* *#وماذا_عن_من_انجباني7* *#سارة_بشرى_عبدالله* "اللهم لا سهلا الا ماجعلته سهل وانك تجعل الحزن ان شئت سهل" كان توفيق وصالح الاتنين متوترين وهم بمشو وبجو لغاية جاهم مبارك وهو بلهث وظاهر عليه مستعجل مبارك:بسرعه خلونا نتحرك الكلام القالتو لي رؤيا مابطمن نهاااائي ارح معااي توفيق وصالح بدون مايفهمو شي طواالي اتحركو معاه وهم في الطريق حاولو يسألو عم مبارك ويفهمو منو شي بس هو كان بكتفي بهز رأسو وبيقول ليهم استعجلو وصلو مكان البيت المهجور توفيق: نحنا جينا هنا ياعمي بس ماكانو موجودين مبارك: عندهم مكان تاني تعالو معااي بس دخلو البيت من قدام وطلعو منو بورا ومشو شوية وكان في باب مكسرر كداا مبارك: جهزو نفسكم لانو ممكن نشوف اي منظر ورا الباب دا فعشان كدا خليكم جاهزين عشان تغمضو عيونكم الاتنين هزو راسهم باستغراب مبارك قال بسم الله ودفر الباب مافتح معاه فجو توفيق وصالح ولزو الباب مع بعض والباب اتفتح اول مااتفتح الباب الاتنين غمضو عيونهم دخل مبارك لقا لمى ومزدان والاتنين حالتهم صعبه رابطين ليهم يدينهم وملبسينهم لبس ماتمام بقا يستغفر جرا ملايات لفاهم بيها وفكا يدينهم مبارك: انتو كويسات يابناتي عملو ليكم حاجه لمى: للان ماعملو حاجه كانو منتظرين يوم بكرا يجي عشان يسوقونا من هنا الحمدلله لقيتونا من بدري مبارك طلب من توفيق وصالح يفتحو عيونهم فتحو ومشو قدامهم وطلعو وصلوهم على بيت ناس مزدان ومزدان جرت لبست نقابها اول شي طبعا اول ماشالت الملايه غطت وشهاا صالح وتوفيق رجعو القسم وحكو الحصل اتحركت معاهم دوريه طوالي للمكان ومع حظهم لقو الراجل والمره حاولو انهم يهربو بس اتقبضو وودوهم على القسم ولمن مشو القسم لقو عندهم الدهب هناك ضربو لابتسام جات استلمت دهبها ورانيا طلعت من السجن وروها انو بتها عند ناس مزدان وماحكو ليها الحصل طبعا ولمى كانت في بيت ناس مزدان اول مارانيا جات لمى استقبلتها بحضن طويلل مليان دمووع لمى: انا اسفه اسفه والله على اي شي اسفه سامحيني اعفي لي ياامي واديني رضاااك بقت تبوسها في راسها وتعتذر منها مزدان واهلها اتأثرو بالمنظر العااطفي فدخلو وخلوهم مع بعض ضامين بعض بحنان وبتصافو🤍 ___ توفيق وصالح مشو لمبارك توفيق: معليش ياعمي بس نحنا مافاهمين حاجه وحابين نعرف الحصل بصراحه صالح: بتك رؤيا قالت ليك شنو مبارك: انا خجلان بالجد لانو رؤيا بتي بس اكييد ماحاسكت عن عمايلها ولازم اتكلم قالت لي انو هي شغاله مع الشيخ والمره ديل من زمان بتجيب ليهم البنااات طبعا ديل ناس دجالين بغشوهم انو بحققو ليهم العايزنو وهم في الاخير.. سكت مسافه بعدين قال استغفرالله. رؤيا سودت لي وشي مافي انسانه طبيعيه بتعمل العملتو دي قالت انو لمى كان في عندها واحد دايراهو ومشو للشيخ دا عشان يغشها وتلف راسو وبعدين تجيب ليهو لمى كانت بتعرف بشغلهم وساكته توفيق عاين لصالح وظهرت ملامح الدهشه على وش صالح صالح: منو الكانت عايزه تلف ليهو راسو لمى مبارك: مابعرف ياولدي صراحه ماسألتا كان همي القاهم بس وقتها بعدين رؤيا وصفت لي البيت دا وقالت لي نحصلهم توفيق: استغفرالله العلي العظيم واتوب اليه البنات ديل الانسان ماعارف يقول شنو مبارك:بكرا ان شااءالله حاودي رؤيا القسم واخليها تقول العارفاهو واذا ربنا اراد ليها تنحبس مابقدر اعمل شي توفيق:ممكن ربنا يسترها ومايتكلمو عنها الراجل والمره واذا مااتكلمو ماتوديها مبارك:بتقول في شنو ياولدي معقوله ياتوفيق دا حق ناس هي ظالمه ناس كتاار توفيق:ماظلمت غير لمى وتطلب منها العفو وخلاص مبارك:بس عشان قلبي يرتاح حاسوقها برضو ونشوف اذا لمى بس ولا في بنات غيرها بس الحق علينا نحنا مااهتمينا بيها وماعرفنا نربيها نحنا اهملناها وخليناها تصل لهناا توفيق وصالح طلعو صالح:الكانت حتلف ليهو راسو انا صح وانت بتعرف عشان كدا كنتا عارف مكان بيت الشيخ توفيق:خلينا نقول انها كانت لحظة شيطان وزي ماشايف الموضوع اتحل بدون اضرار كتيرة صالح:كانت عايزه تكتبني عند شيخ توفيق:زي ماسمعت هو ماكان شيخ هو دجال صالح:لا حولا ولاقوة الابالله معقوله انا طول الوقت كنتا مع واحده زي دي كنتا واقف بحاول اساعد فيها وهي بتعمل كداا توفيق:العفو ياصالح اعفي ليها لمى ظلمتك وظلمت امها ادوها فرصه صالح:انا ما لي علاقه بيها من الليله خليها تحمد ربها اني مااشتكيت عليها بعد الكانت ناويه تعملو يلا اشوفك في ساعة خير واتحرك مشا توفيق جرا نفسو وهزا راسو ومشا _______ مزدان كانت راقده جنب امها وهي بتحكي ليها كمية الرعب الحست بيه الباب دقا قالوا اتفضل جا داخل مقداد مزدان: سبحان الله دقا الباب مقداد: عايز اتكلم معاكم : اتفضل ياولدي مقداد: انتي يامزدان متاكده انو ماعملو ليك شي وماداسه عننا حاجهه