*#سلسلة_اتدري_من_يزيل_الهم* *#وماذا_عن_من_انجباني4* *#سارة_بشرى_عبدالله* لا اله الا انت سبحانك اني كنت من الظالمين مزدان كانت بتصلي وبتدعي ربنا يهدي اخوها مقداد ويتعامل مع اهلهم بطريقه احسن خلصت وقامت ابوها ناداها مشت عليه : مزدان كلمي امك وجهزو نفسكم حنرحل من الحله دي مزدان: معقول ياابوي حنرحل من البيت الاتولدتا فيه وعشتا كل حياتي فيه : طيب يابتي نعمل شنو اذا مارحلناا حتقدري تتحملي نظرات البنات واتهامهم ليك حتتحملي ينادوك اخت الحرامي حتقدري تعيشي في الحله دي واللطخه دي ماحتطلع منك وريني انتي بتقدري؟ مزدان: بس الناس مهما عملنا بتكلمو : قبل مااخوك يعمل عملتو ماكان في زول بتكلم يابتي بس بعد دا ماحينسو حتى لو مرت سنين واخوك كبر وبقا جد حيجي احفادو يقولو ليهو صحي انت سرقتا من بيت مرة عايشه براها الحكايات الزي دي مابتتنسي عشان كدا احسن خلينا نرحل مكان لا بعرفونا فيه لا بنعرف زول امشي يابتي اسمعي كلامي ووري امك خلينا نطلع من هنا مزدان هزت راسها وقالت حاضر ومشت لامها جوه ورتها كلام ابوها وامها وافقت وقالت ليها خلينا نبدا نجهز حاجاتنا ____ لمى طول الوقت ماسكه تلفونها بتتصل على صالح وبترسل ليه رسائل وهو مابرد بقت تبكي اخر شي قالت ليهو ياترد علي ياانتحر.. لمن قرا الرساله رجع ليها هو لمى: اخيرا ياخ يعني الا اهددك حتى تتصل صالح: عايزه شنو يالمى لمى: ماعارفاك ليه كبرتا الموضوع كدا ماقصدي شي انا والله ماقصدي انو امك بتمثل يعني صالح: اختصري لمى: عايزه نتصالح خلاص مابتحمل زعلك مني صالح: لمى لمى: عيونها صالح: انا ماعايز اتصالح معاك لو كنتي بتعرفي قيمة الام حتى لو بمقدار ذرة انتي اساسا ماكان اتكلمتي عن امي كدا ولا كان عشنا المواقف دي صدقيني مافي زول اهم من امك ومالازم اصلا يكون في اقعدي كدا وفكري مع نفسك واتذكري اتذكري ذكرياتكم من انتي صغيره امك عملت ليك شنو وانتي رديتي عليها بشنو وياريت ماتتصلي علي تاني واساسا ماحتقدري تتصلي لاني حاحظرك يلا مع السلامه وقتنا القضيناهو مع بعض كلو كان غللط ياريت تتعلمي منو وقفل الخط لمى بقت تحاول تستوعب كلام صالح وانو نهى اي شي معاها وماعايز يتواصل معاها تاني بس لانها اتكلمت عن امو امها نادتها مشت ليها بزهج وهي بتتنفض لمى: اها في شنو يااخ من قبيل لمى لمى لمى كرهتيني اسمي دا ماممكن اقعد لي كم زمن كدا براي محتاجه لاني اقعد برااي ممكن تخليني على راحتي ماممكن كل دقيقه لمى مافي عندك جيران اطلعي حومي يااخ ريحني من اني اسمع اسمي كل شووية امها كانت بتعاين ليها مخلوعه ولجوطتها دي امها: انتي مضايقه مني للدرجه دي ومن اني بناديك لمى: ايوا مضاايقه وحتى مضايقه جداا شوفي ليك شغله غيري والا حافكر في موضوع مشيتي لابوي بشكل جدي وقتها تتمنيني وماتلقيني ومشت دخلت غرفتها كانت بتفكر في طريقه تصالح بيها صالح فطلعت جات قاطعه في امها وامها كانت بتبكي ومشت لرؤيا لمى: صالح قطع علاقتو معاي وقال لي تاني ماتصل ليه وحيحظرني رؤيا: دا بعد يوم القعده وكلامك عن امو صح هو كمان بالغ لمى: بالغ شدييد يعني قلتا شنو انا للدرجه دي رؤيا: يازولة خلييي بالنااااقص اولاد ادم كتااار ماتهتمي ما الا هو لمى: بس انا عايزه صالح رؤيا: خلاص تمام عايزاهو شدييد كداا لمى: طبعاا رؤيا: المابجيبو الحنين بجيبو شيخ الدمازين اكتبي عند شيخ بس واحصلي عليه لمى: بس الشيخ بكون عايز قروش كتييرة رؤيا: الا مايكون بيتكم فيهو شي بتباع بيعي حاجه تكون ثمينه كدا وبتجيب قروش كوويسة وبي قروشها حلي موضوعك وشوفي صالح تاني لو عاين لزول غيرك لمى: معاك حق تمام اسي دا ماشه اشوف لو في شي في بيتنا بيتباع ___ توفيق بتكلم مع مجد حاول انو يجمع ليهو اكبر كميه من الناس خصوصي من حلتهم اولاد او بنات عشان الكل يسمع المحاضرة عن الوالدين يمكن الناس معاملتها تتغير مع اهلها مجد وافق بس بقو محترين كيف بقدرو يجمعو الناس كلهم ويتكلمو فقررو يمشو يتكلمو مع رجال البيت ويستأذنوهم اولاا وفعلا دا الحصلل بدو يدقو البيوت ويستأذنو الابهات عشان برنامج التوعية مجد: ياتوفيق انا حاتكلم مع ناس بيعملو ايفنتات وبخليك تشارك بجو كميات كبيرة توفيق: انا عايز اركز على اولاد وبنات حلتناا ضروري هم يحضرو عشان معاملتهم السيئه دي مع اهلهم مجد: في بت عايشه مع امها في البيت داك نجيبهم كيف توفيق: نشوف بت عمي علي بتساعدنا مجد: دي الاسمها غريب دي توفيق: اي ياها الاتنين اتحركو على بيت ناس مزدان وشافو تجهيزاتهم توفيق: خير ياعمي علي: طالعين نشوف لينا بيت للايجار قررنا نرحل خلاص توفيق: ليه ياعمي معقوله لكن تمشي تخلينا وين علي: السمعه الخلاها لينا مقداد دي مابتتنسي والله نحنا بنمشي في الشارع والناس بتأشر عليناا بقينا مابنقدر نطلع الشارع وماحنقدر نتحبس في البيت ومابنقدر نعمل شي اها الحل شنو قول لي انت