الليلة الاخيرة .. ليلة عاشر من محرم 🏴🏴🏴🏴🏴 الليلة النظرة حيرة ليلة حزن ليلة مدامع بصلاة الجرح كلا يصلي صلاة فراق وموادع التمن اعلى خيمة زينب الهواشم وبحال قلوبهم بس الله عالم ……………… حيرة وبجي ووداع وفيها الفقد يصفن اجا خيمة الحوراء اعلى بابها يستأذن احسين وبني عدنان عيونهم بالالم يبجن ها يامدلله تأذنين يالبيج الصبر يسكن نسهر سوى وياج وقلوبنا بس يحجن فزت زينب وبهمها قلب لهفان اهلا عزوتي اهلا يابني عدنان يالبيهم رافعة راسي بين العوالم ……………… هلا بننظير الروح ياكل ايامي وسنيني وين ماالتفت بالنبض القاها يم احسيني انت الذخر وكل ناسي وانت ضيا عيني جَيتك جية قلب فزة شوق بشراييني حياك يابن امي يالبعيونك مخليني شلون احتمل فرقاك وفقدك يابن امي يالتجلي همومي وباجر ذبحتك همي ماريد طاري فراق عسا بس تظل سالم ……………… ضمها الاخو الحاني احسين والدمع هامل دام انا حي موجود عن دمعج فلا غافل واخوانج فلا يقصرون كلنا لج حمى وكافل ظهر وسند لج خيه لو شفنا الحمل مايل تدللي يااخت الروح لاشوف الدمع سايل ماريد بخدج تجري ياختي الدمعه دمعتج منها احسينج يختلف وضعه هذا القدر جاري واشوف لمقتلي راسم ……………… التفتت للقمر زينب ياهلا برفعة راسي هلا بكافلي الحاني هلا بروحي عباسي مادام حي موجود ماينجرح احساسي بعدك يااخو الروح شلون اتحمل واقاسي وانت العهد وواعدني تظل لي اعز ناسي شلون اتحمل نتفرق يانبضه بوسط قلبي وانت الواعدني تبقى ظل إلي بدربي ترضاها ياخو زينب دمعي اعلى الحزن ساجم ………………… مسك ايدها العباس وتلاقت النظرة بالنظرة سكته بقلب لهفان وبالصدر بقت حسرة انا كافلج نادى وانا الواعد الزهرا ادللي اخت عباس لاتُكسر بصدرج العبرة فدوى الج العيون وتفداج اليمنى واليسرى مايمس قلبج خوف وانا من علي كافل من يرتاع القلب صيحي ها ياابو فاضل وانا لجل عيونج افني الارض والوادم ……………… زينب بقلب لهفان التفتت لشبيه الجد هلا بجمالك علي هلا بخد الورد ياوراث صفات اهلي اهل الشيم اهل الود انا ادري بوجودك لروحي سلام وبرد خوفي من اتروح يوصل عدونا الحد يفرح قلبي بشوفتك ياشبيه المصطفى وانت من الخمسة ياعلي وارث كل صفه عسى بشوفتك حبيبي النظر دايم ………………… قبل ايدها الاكبر ياعمه امدللة حيدر قلبي على خوفج لا ترتاعي من العسكر كلنا فدوى لعيونج قلبج لا يمسه الضر يامعلمه الصبر صبره وانتي له أم والسر اطلبي ياعمه وامُرينا ونادي ياعلي الاكبر لا تخافين لا تنجرحين وعندج الاكبر علي ياعمه احنا همنا مايتبدل دلالج الاولي بس المعذرة منج لو وصللج عدو ظالم ….……………… نظرت بعين جاسم وعيونها تلالي هلا بروح الحسن هلا يريحة الغالي ياغصن وردة ومن الحسن والي يالبسمتك حلوه راسي بيك عالي من اتروح عني يبني تتغير احوالي روحي انت ياذكرياتي من الحسن وادري بوجودك مايوصلني الحزن بس شلوني من اشوفك للمنيه عازم ………………… حضنها القاسم العريس لا تخافين ابد ياعمه من الحسن مذخور كل حزنج انضمه وعندي بس حلم واحد الله لايحرمنا هالبسمه لو يحصل حلم ثاني الله لا يضيع منا هاللمه بس انكتبت الاقدار عمنا و نجلي له همه اتدللي ولا تخافين عمتنا يالحنونه ووجهج بوجودي ابد لاينخطف لونه عندج بني عمي واعمامي والقاسم …………………… دارت عينها زينب بعيون اخوتها واهلها نظرت واحد لواحد وبس الدمعه تهلها محلكم هنا كربلا هذي الباري فضلها الوعد لروحي والذخر يروح مني كافلها عني تروح الغوالي عزوتي هذا محلها ادري بيكم ياخوتي ياا هلي وبنيني غالي اعليكم حزني واهاتي وونيني بعد افراقكم بس انتظر طلعة القائم بعد افراقكم بس انتظر طلعة القائم