bakiroo

​UzTest нима учун монополист деб эълон қилинмаган?

Олигархлар ва Монополистлар дастёрига айланган Техник тартибга солиш агентлиги қошидаги UzTest мокки тадбиркор ва истеъмолчиларни қоқиштираётгани масаласига ҳукумат вакиллари томонидан бирон бир расмий муносабати билдирилгани йўқ. Билдирилмасаям керак. Ўзбекистонда кичик бизнес ва истеъмолчи ким? На параламентда, на ҳукуматда вакиллиги ва овози йўқ ҳеч ким.

Лекин қонунларимизга қарасангиз, истеъмолчиларнинг ҳақлари ҳимоя қилиниши керак, рақобат муҳитини бузаётганлар жазоланиши, ҳеч бўлмаса тийиб турилиши керак.

UzTest DM деган мисоли аждарҳо автомобиллар ва электромобиллар мувофиқлигини текшириш (аслида электромагнит мослашувчанлиги бўйича текширув баҳонасида импортни чеклаш) Ўзбекистонда ягона синовчи. Қорақалпоғистонлик, сурхондарёлик, анджижонлик истеъмолчи ва тадбиркорлар ҳам 1 ноябрдан бошлаб ҳеч бир олдидан огоҳлантиришсиз шу аждарҳонинг Пискентдаги уясига келиб синовидан ўтмаса бўлмайдиган қилиб қўйилган. Синов тўловини истаса 6 млн.сўм, истаса 9 млн.сўм қилиб белгилайди. На калькуляция, на таннарх деган ўлчовлар бор. Истаса 2 соат, истаса 2 кун, ёқмасангиз 2 ҳафта куттиради. Ҳеч қандай процедуравий чекловлар ҳам йўқ бу ўзбилармонларга.

Бу ҳаммаси эмас. Мисоли аждарҳолар май ойида буён маиший техникаларнинг энергосамарадорлик тестини ҳам ўтказишади (бунгача яна бир моночўнтак “Eltech-Lab” МЧЖ ҳам тадбиркорларни пулини олиб, ҳам ҳеч нарса қилмай ойлаб сарсон қилган). Совиткич, музлаткич ва кондиционерлар энергосамарадорлик тестларини ўтказиш ҳам ҳафталаб, ойлаб чўздирилади. Пулини тўладинг, сертификатингни олдинг эмас. Чунки буларнинг мақсади олигарх валийнеъматлари учун импортни чеклаб бериш ва шу баҳона йўл-йўлакай миллиардлаб бебилиска соққа ишлаб қолиш.

Ўзи буларнинг тарифлари қанақа, шартлари қанақа, қайси асосда иш юритишади деб сайтига кирмоқчи бўлсангиз, ишламайди. Неча марта уринган бўлсам, ҳеч қачон ишламаган. Кунўз ҳам шунча уриниб, 503 рақамли сайтга кира олмаган.

Энди савол: Рақобат қўмитаси UzTest'ни автомобиллар ва маиший техника маҳсулотларини сертификатлаш хизматлари бўйича монополист деб тан олиши керакми? Аждарҳо монополистлар рўйхатига қўшиши керакми? Аждарҳо монополистлардан талаб қилинадиган тартиб ва процедураларни UzTest'дан ҳам сўраши керакми?

Ё UzTestнинг валийнеъматлари шонли энергетикларникидан ҳам қўрқинчлироқми?

Ишора

Ўзбекистонда хусусийлаштириш қандай амалга оширилиши,инвестицион муҳит туби ва қоронғулиги ҳақида бошқа инвесторларга ҳам яққол ва тушунарли ишора бу.

"Ҳаммаси аён бўлса, гумон қилиш яхшимас"

Ежи Лецнинг ушбу қанотли ибораси охирги пайтда янги Ўзбекистонда халққа товон юклаб катта пул ишлаш воситаларининг кўпайиб бораётгани сабабларини тушунтирмайди.

Лекин ҳеч бўлмаса саволлар берилиши кераклигига ундайди:

1. Ҳукуматнинг 2023 йил 1 июлдаги 224-35-сонли ёпиқ қарори ва бир нечта ХДФУ топшириқлари асосида автотранспорт воситаларига давлат рақамини ишлаб чиқишни хусусий секторга топширилиши ва “Gid License Plate” МЧЖ ўртасида қандай боғлиқлик бор?

2. Агар ҳукумат автомобиль рақамлари билан боғлиқ давлат хизматини кўрсатиш жараёнларига хусусий секторни жалб қилишга қарор қабул қилган бўлса, хусусий шерикни танлашда тендерми, танловми ё аукционми эълон қилинганми, ўтказилганми? Уларда ҳукуматнинг бу қарори чиқишидан 2 ой аввал ташкил этилган “Gid License Plate” МЧЖдан ташқари яна қайси компаниялар иштирок этган?

3. Қоида бўйича қайсидир давлат хизмати ёки давлат функциясини хусусий секторга беришдан мақсад хизмат таннархини арзонлаштириш ёки рақобат яратиш бўлади (булмаса хусусий шерик билан ҳамкорликдан қандай маъно). Унда нега давлат рақами белгиларини бериш учун тўлов ҳукуматнинг хусусий секторни жалб қилишга қарор қилгандан кейин арзонлашиш ўрнига каррасига қимматлашди?

4. Ҳозирда автомобиль рақами учун тўлов 1 312 500 сўмни ташкил этади. Хусусий сектор жалб қилинмасидан олдин тўлов миқдори 450 минг сўмдан иборат бўлган. Давлат рақамларини ишлаб чиқиш таннархи жараёнга хусусий секторга жалб қилингач, каррасига ортдими ёки тўловнинг оширилишини бошқа сабаблари мавжудми?

5. 2023 йил 1 ноябрга қадар автомашина олди-сотдисида илгари шу автомашинага бириктирилган давлат рақамларини яна тўлов тўламасдан, ишлатиш мумкин эди. Нима сабабдан хусусий секторни жалб қилишга қарор қабул қилингач, ушбу қоидалар бекор қилинди. Мақсад янги давлат рақамини кўпроқ ва қайтадан сотиш билан боғлиқми ёки бошқа сабаблар борми?

6. Давлат рақамларини бериш бўйича хизматдан келиб тушаётган маблағлар 2023 йил 1 ноябрдан бошлаб қандай тақсимланмоқда? Ўтган даврда келиб тушган маблағларнинг қанчаси хусусий шерикка, қанчаси давлат бюджетига ва яна қанчаси вазирликнинг махсус жамғармасига ўтказилган?

7. Ҳукумат бошқа давлат хизматларини кўрсатишда ҳам, масалан автотранспорт воситаларини рўйхатдан ўтказишда худди шу каби хусусий шерикларни жалб қилиш амалиётдан фойдаланмоқдами? Бунда давлат хизматлари учун тўлов хусусий шерик жалб қилингач, қимматлайдими ёки арзонлайдими?

Биздан 6 карра бой Қозоғистонда автомобиль олди-сотдисини расмийлаштириш 13 карра арзон!

Келинг, узоққа бормайлик. Қозоғистонда автомобиль олди-сотдисини расмийлаштириш қандай ва қанчага тушади?

Биринчидан, бунинг учун нотариус ва "ГАИ"га бориш ҳам шарт эмас. Уйдан туриб ёки банкларнинг мобил иловаси орқали (kaspi.kz билан масалан) ҳам хизматдан фойдаланиш мумкин.

Иккинчидан, автомобиль рақамингиз ва техпаспортни уйингизга келтириб беришади ёки давлат хизматлари марказидан (ЦОН) бориб олишингиз мумкин.

Учинчидан ва бу энг асосийси, хизматлар учун тўлов Ўзбекистонга нисбатан солиштирганда сув текин:

Давлат рақами 2,8 АЕК (БҲМ);
Техпаспорт 1,25 АЭК;
Рўйхатдан ўтказиш 0,25 АЭК.

Жами 4,3 АЭК, бу 15 876 тенге, сўмда 411 минг сўм.

Яъни, автомобиль олди сотди битимини расмийлаштириш учун қўшнисидан 6 карра бой қозоқ қардошлар ўзбеклардан 13 карра камроқ пул тўлайди. Яна нотариус, ГАИ қилиб овора бўлмайди, навбатда турмайди, вақтини йўқотмайди, асаби ва соғлиғини кетказмайди.

Нимага бизда бу имконсиз? Қайсидир тўда оч қоладими? Ўртамчилар кўчада қоладими?

Балки шунинг учун ҳам камбағалдирмиз?

Балки турли ўйлаб топилган предлоглар билан таланмаётган мамлакатларда халқ бойроқ яшар?

​Автомашиналарни худди эски замондагидек "Доверенность" орқали сотилиши кескин кўпайган

Иқтисодий тадқиқотлар ва ислоҳотлар маркази автотранспорт воситалари савдоси ўтган йилнинг шу даврига нисбатан 44%га қисқарганини қайд этмоқда. Иккиламчи бозорда йиллик қисқариш икки бараварга етган.

Лекин бу билан иккиламчи автомобиль савдоси қисқараяпти, деган алдамчи хулоса қилиш керакмас. Чунки де-факто сотилаётган автомашиналарнинг ҳар иккитасидан бири "бош ишончнома" ёки халқ тилида айтганда "ишончнома" орқали расмийлаштириб берилмоқда.

Нима учун орадан шунча йил ўтиб, Ўзбекистонда худди "ёмон Каримов" давридагидек одамлар автомашиналарини бир-бирига "ишончнома орқали" сотишмоқда. Сабаби битта: олди сотди шарномасини расмийлаштириш охирги бир йилда каррасига оширилган.

Автотранспорт воситаларини рўйхатдан ўтказиш ва қайта рўйхатдан ўтказиш учун тўлов миқдори 2024 йил апрелдан бошлаб 68,4 бараварга, автомобиль рақамларини бериш учун тўлов эса 2023 йил 1 ноябрдан 2 баравардан кўпга ошган.

Ҳозирда иккиламчи бозорда автомобиль олди-сотдиси учун 5,4 млн.сўмдан кўпроқ харажат қилиш керак.

Бош ишончнома бериш учун эса нотариал харажатлар жами 900 минг сўмни ташкил этади (6 баробар арзон).

Шунинг учун машина бозордами, кўчадами ё танишлар ўртасидами автомобиль олди-сотдисида ёппасига "ишончнома" орқали сотиш авж олган (айниқса, қиймати юқори бўлмаган Матиз, Спарк, Дамас ва Нексия автомобиллари бўйича). Албатта, бунинг рисклари ва йўқотишлари мавжуд, лекин танловсиз ва иложсиз қолган одамлар шунга мажбур бўлишмоқда.

Автотранспорт воситаларини рўйхатдан ўтказиш ва автомобиль рақамларини бериш тўлови нима учун каррасига оширилгани сабаблари ва мотивларига расмий изоҳ берилмаган (балки қанақадир ўртамчи ДХШ лойиҳаси ўйлаб топилгани бўлгани учундир).

Мутлақо тасодифга кўра, панель импорти тақиқланишидан олдин кипрликми, швейцарияликми ё гонконглик инвестор панель ишлаб чиқариш заводи очган

Ўзбекистонда автомобиль ишлаб чиқариш бошланса автомобиль импортига, электромобиль ишлаб чиқариш бошланса, электромобиль импортига чекловлар бошланади. Кондиционер ва шинадан тортиб металл конструкцияларгача бўлган маҳсулотларни гапирмай қўя қолай. Чунки бу "маҳаллийлаштирувчилар" аслида импортчи чайқовчи, бу ёпиқ кабинетлар билан чатишиб кетган олигархларнинг бошқа бизнес модели йўқ, улар том маънода ожиз, заиф ва қўрқоқ. Улар фақат тақиқлаб ва чеклаб, жафокаш ва ҳимояти йўқ ўзбек халқини танловсиз қолдириб ва талаб пул ишлай олишади холос. Исталган очиқ ва рақобатли бозорда улар очидан ўлишади.

Сиз нима деб ўйлагандингиз, ўтган ойда панель ишлаб чиқариш заводини кўз-кўз қилганлар истисно бўлиб қолишадими? Ахир юз миллиардлаб панелга мажбурлашлар бўп турган бўлса, йўқ жойдан янги ва янги триллионлик ДХШ лойиҳалар ўйлаб топилаётган бўлса. Пул оқимларини бегона қилмай ўзлаштириш керак.

Бунинг учун нима қилиш керак? Импортни ёпиш керак? Буни оқлаб кўклаб берадиган, кабинетларга ўтказиб қўйилган энергошотирлар бўлса бор.

Танишинг: Панель ишлаб чиқарувчи Enter Green Solar.

Ҳа, ўша захарланган Бойсунда уйсиз қолдирилганларга яна ойлик бермай азоблаётган Энтер'нинг невара компанияси.

​Қуёш панеллари импортига навбатдаги тақиқ киритилмоқда

Фармон билан 2025 йил 1 январдан бошлаб BNEF Tier-1 рўйхатига кирмаган компаниялар томонидан ишлаб чиқарилган қуёш панеллари, инверторлар ва электр энергиясини сақлаш тизимларини импорт қилиш тақиқланади.

Албатта. фармон очиқ эълон қилинмагани учун тадбиркорлар бу ҳақда бехабар. Балки Энергетика вазирлигига апоқ чапоқларга аллақачон бу тақиқ ҳақида айтилгандир (балки тақиқ ташаббуси ўшаларнинг ўзидан ёки панел ишлаб чиқаришни бошлаган гонконглик инвесторлардан чиққандир).

Энди ўзингизга тасаввур қилинг, тадбиркорлар панелларни импорт қилишда, янги шартномаларни имзолашда, пул ўтказишда давом этишмоқда. Уларга 1 январь куни Божхонада нима дейишади? Бўлди, Шонли Энергетиклардан янги тақиқ чиқди, опкелган панелларинга, инверторларингга, тўлаган бўлсанг, пулингга куйдинг дейишадими?

Бу қанақадир янги абсурд? Навбатдаги ўзбилармончилик ҳақида қачон эълон қилишмоқчи? Бу навбатдаги тақиқ қонун талаблари бўйича Адлия вазирлиги, Савдо саноат палатаси, Рақобат қўмитаси билан келишилганми?

Ҳар эҳтимолга қарши, BNEF Tier-1 рўйхати билан бу ерда танишишингиз мумкин, шонли энергетиклар сайтидан топа олмайсиз.

​Президент фармонига амал қилинса, Учқудуқдаги шамол станцияси қурилиши мумкин эмас

2024 йил 11 сентябрдаги 139-сонли Президент Фармони (очиқ эълон қилинмаган) билан қайта тикланувчи энергия манбалари ҳисобига ишлаб чиқариш қувватларининг 20 ГВтдан, шамол станциялари қуввати 11,3 ГВтдан, қуёш станциялари 7,1 ГВтдан ошмаслиги белгиланган. Фармондаги вазифа ва топшириқларнинг ижроси Энергетика вазири Мирзамаҳмудовга юклатилган.

Фармон билан янги қувватларни барпо этиш фақат Бош вазир раислигидаги Мувофиқлаштирувчи комиссия қарорига асосан амалга оширилиши кўрсатилган.

Энг қизиғи, Мирзамаҳмудов ўтган куни Masdar билан Навоий вилоятининг Учқудуқ туманида қуввати 1000 МВт бўлган шамол электр станциясини қуриш бўйича имзолаган лойиҳаси фармон билан тасдиқланган станциялар рўйхатида йўқ. Президент фармони талаби ва руҳидан келиб чиқилса, бу станцияни қуриш мумкин эмас (захира қуввати яратиш талабларини бузади).

Учқудуқдаги станция ё шонли энергетикларнинг навбатдаги пиар акцияси ёки бу станция росмана қурилиши учун фармонга қўшилган қайсидир станция чиқариб юборилиши ва бекор қилиниши керак. Билгичларнинг айтишича, шартномаси имзоланган, лекин эълон қилинмаган лойиҳалар анчагина.

ДХШ бўйича лимит қаерда қолди, захиралар бўйича талаблар қайда қолди, дейдиган йўқ. Ё ўнг қўл чап қўл нима қилаётганини билмайди. Ёки энергосеҳргарга ҳамма ишонади.

Қуёш ва шамол станцияларига нисбатан захира қувватлари йўқлиги ниҳоят эсга тушди, янги ва янги ДХШ имзолаб ётилибди

Стратегия тушгача ёки навбатдаги селектор ва қўнғироққача экани айниқса энергетикада яққол намоён бўлади.

Энергетика вазирлиги навбатдаги қуввати 1 ГВт бўлган шамол станцияси қуриш бўйича шартнома имзоланганини эълон қилмоқда. Аввал эълон қилинган лойиҳалардаги қувватлар билан ҳисобланса, 2030 йилга жами 21 ГВт қувватли шамол ва қуёш станциялари бўлади. Зўрку, дейишга шошилманг.

Қайта тикланадиган генерациянинг барқарорлиги доимий эмас, унга нисбатан захиралар паритети керак. Вазир ўринбосари Умид Мадаминовнинг ўзи 2030 йилгача камида 10 ГВт захира қуввати яратиш кераклигини айтаяпти. Лекин қайси манбалар ва маблағлар ҳисобидан эканига, бу бўйича нима иш қилинаётгани ва қандай режалар борлигига тўхталинмаган. 10 ГВт ҳазилакам қувват эмас.

Хўп, стратегик ҳужжатларимизда нима дейилган?

Энергетика вазирлиги ўзи тасдиқлаган Концепцияга кўра, 2030 йилга жами қуёш станциялари қуввати 5 ГВт, шамол станциялари қуввати эса 3 ГВтни ташкил этиши керак бўлган. Барча ҳисоблар шу ўлчовлар асосида олинган. Лекин улар аллақачон эскирган, янгилари балки бордир, лекин очиқланмаган. Қарорларга киритилиб юборилаётган лойиҳаларда рақамлар ҳисоб-китобларга асосланганми?

Энди саволлар: Биз истаётган энергетика бозори учун ўзимиз ўзимизга чуқур хатарлар яратмаяпмизми? Бозорни ҳали бозорга етмаёқ ўлдириб қўймаяпмизми? Ҳозирги ҳолатда узоқ йиллар инвестиция киришига иштаҳа ўлдириб қўйилмадими? Қуёш ва шамол ДХШ лойиҳалари ясашни балки бозорга етгунча ва захиралар барқарорлигини яратмагунча тўхтатиб турармиз? Бу потиратиб тузилаётган ДХШларнинг билвосита юки эртага давлат мажбуриятига ва эҳтимолий қарзига айланиши ҳақида ўйлаш пайти келгандир балки? Ёки лойиҳа шартномалари имзоланмаган бўлсаям, лента қирқиб пиарни давом эттираверамизми?

Монополистлардан навбатдаги шокхабар: Темир йўлда юк ташиш тарифлари кескин оширилади

“Ўзтемирйўлконтейнер” АЖ устав капиталидаги 35,0 фоиз давлат акциялар пакети 200 млрд.сўмга "хусусийлаштирилгани" фонида ўзбек бизнесини ақлини шоширадиган навбатдаги шокхабар эълон қилинди. Балки бугун монополистлар кунидир.

1 декабрдан темир йўлларида юк ташиш тарифлари 30%га кўтарилади.

Монополист хизмат тарифларининг оширилишини харажатларнинг ошгани билан оқлаган. Йил бошида Давлат раҳбари барча давлат корхоналари учун таннархни қисқартириш ва самарадорлик йили эълон қилиниб, таннархни 15 фоизга камайтириш бўйича топшириқ бергани темирйўлчиларнинг эсида бўлмаса керак ёки улар харажатларни ошириб таннархни шишириш ҳадисини шонли энергетиклардан ўрганиб олишган.

Темир йўллари компанияси, шунингдек, турли монополист ва чўнтаклар учун каррасига арзон имтиёзли тарифларни бекор қилиниши ҳақида маълумот келтирмаган. Ахир имтиёзлар бекор қилинса, тарифларни оширишга умуман зарурият туғилмаслиги ҳам мумкин.

Темир йўлларида тарифларнинг қимматлигидан ташқари ношаффоф шаклланиши, тарифларда тенглик йўқлиги, вагон ва контейнерларга доступ бир хил эмаслиги бизнесни доимий қийнайдиган муаммолардан ҳисобланади.

Кескин қимматлашаётган тарифлар истеъмол ва ишлаб чиқариш нархларида қандай акс этиши бўйича ҳисоб-китоблар эълон қилинмаган.

​"Олигарх ва монополистлар фойдасига импортни чеклаш агентлиги"

Бу агентлик йил бошидан бери нимаики ишга қўл урган бўлса, ҳаммаси рақобатни чеклаш ва истеъмолчиларни жазолашга оид бўлди. Шунинг учун агентлик номиниям қилаётган бузғунчилик ишларига мувофиқ ўзгартириб қўйиш тўғри бўлади.

Бу лифт ва эскалаторларга оидми,
нотариф чекловларга айланган энергосамарадорлик тестларими, маиший техника импорти учун нотариф тўсиқларми, электромобиллар бозорини бир қўлли қилиш ҳаракатларими ёки электромагнит мослашувчанлик текшируви баҳонасида автомобиллар импортини тўхтатишга уринишми, фарқи йўқ, шиор ва қарорларда қандай ниқобланмасин, ҳаммаси Ўзбекистонни талаётган олигарх ва монополистлар манфаатлари учун хизмат қилади.

Хитой, Корея, Япония, Германия солиқ тўловчилари ҳисобидан биз учун шу мошинларни бизникидан кўра қатъийроқ стандартлар ва сифатлироқ синовлардан ўтказиб бўлинган-ку, деган аргумент буларга ишламайди.

Юқори сифат ва назорат тизимига эга мамлакатлар томонидан сертификатланган импорт қилинадиган товар ва хизматларни яна қўшимча миллий сертификатлаш амалиётини тўхтатиш 2021 йилдаёқ таклиф этилган. Бу олигархсевар қулоқлар рационал таклифни эшитади деб ўйлайсизми? Улар учун Ўзбекистон иқтисодиётига солиқ тўловчилар чўнтагидан пул олиб етказилаётган зиён ҳисобмас. Юз марта айтганимиздек, улар экономика, бизнес ва якунда истеъмолчилар кўраётган зиёнга, харажатга тупуриб қўйишган.

Икки йилдан кейин ЖСТга киришимиз керак. Агентлик экспортчилар учун ташқи бозорларда техник тартибга солиш ва мувофиқлаштириш йўлида нимадир қилдими? Йўқ, уларга импортни чеклаш ва тақиқлаш мазалироқ, осонроқ.

“Трастбанк”дан фойдали ипотека кредити!

Ўзингизнинг шинам хонадонингиз бўлишини орзу қиляпсизми? “Трастбанк” сизга ёрдам беради. Бирламчи бозордан уй-жой харид қилиш учун ипотека кредитини тақдим этади.

Расмий даромадга эга бўлган мижозлар учун:

✅Фоиз ставкаси: 17,5 %
✅Миқдори: Қорақалпоғистон Республикаси ва вилоятлар учун – 330 млн сўмгача, Тошкент шаҳрида эса 420 млн сўмгача;
✅Муддати: 240 ойгача;
✅Бошланғич тўлов: 15%.

Ўзини ўзи банд қилган шахсларга:

✅ Фоиз ставкаси: 17,5 %
✅ Миқдори: Қорақалпоғистон Республикаси ва вилоятлар учун – 330 млн сўмгача, Тошкент шаҳрида эса 420 млн сўмгача;
✅ Муддати: 240 ойгача;
✅ Бошланғич тўлов: 35%.

Батафсил

Саволларингиз бўлса 1287 рақамига қўнғироқ қилинг.
Телеграм: @trustbankuz

Реклама

Буни аукцион деб атаб бўлмайди, бизга бир қўлли парковка монополияси керак эмас

Тошкент шаҳрида 50дан ортиқ кўчада пулли тўхташ жойларини бошқариш ҳуқуқи учун аукцион эълон қилинмоқда.

Агарда аукцион пойтахт маъмурияти истагандек ўтса, шаҳарда ягона Парковка қироли пайдо бўлади. Ғолиби олдиндан ёпиқ кабинетларда келишилмаган бўлмаса, бу жараённи аукцион дейишга тил бормайди.

Биринчидан, пойтахтдаги 50дан ортиқ энг гавжум ва ликвидли кўчалар битта лотда савдога чиқарилмоқда. Яъни "ғолиб" битта кўча ёки мавзедаги кўчаларни эмас, бутун шаҳарни "қўлга киритади". Нормал аукцион шароитида шаҳардаги бўлажак парковкалар ўнлаб лотларга бўлиниши ва улар ўзаро боғланмаган инвесторларга таклиф этилиши зарур. Бунда масалан, бир ҳудуддаги Шевченко, Чехов, Шаҳрисабз ва Якккачинор кўчалари бита лотда эмас, турли лотларда савдога қўйилиши ва битта қўлда жамланмаслигига урғу берилиши керак.

Иккинчидан, барча кўчалар битта лотга боғлангани учун аукционга кириш шартлари жуда оғир ва қиммат қилинган. Табиийкки, қайсидир аввалдан келишилган ғолибга мослаштирилган бўлиши эҳтимоли мавжуд. 5 миллион долларлик инвестиция шартини бажариш ва бошланғич нархи 57,2 млрд.сўмлик йиллик ижара нархини қабул қилишга журъат этувчи ўнлаб рақобатдош бизнес субъектлар топилмаслиги аниқ (спарринг рақиб ролини ўйнаб берадиганлар доим топилади). Лекин, айтайлик, лотлар 20та бўлса, аукционга кириш инвестициявий шартлари 100 минг доллардан бошланса, иштирокчилар сони кескин ортади. Табиийки, аукцион ҳам кескин рақобатли бўлади, ижара ҳақининг нархи аукционда тезроқ ва кўпроқ ошади, давлат ҳам каррасига ютади.

Учинчидан, аукционлар охирги йилларда амалдорлар қўлидаги ғирт манипуляция воситасига айланиб бўлди. Бу ҳақда ичкарида эмас, четдаги овозлар орқали ҳам очиқ гапира бошлашди. Ер сотишдан тортиб хусусийлаштиришгача қўлланилаётган аукцион жараёнида сунъий равишда қўшилган бюрократик ва коррупцион ғовларни, рақобатни чекловчи қоидаларни доимий инвентаризация қилиб бориш вақти аллақачон келган. Аукционлар шартлари масалан, Антикоррупция агентлиги томонидан коррупциогенлик назоратидан, Рақобат қўмитаси томонидан эса рақобатдошлилик мезонларидан ўтиши мажбурий бўлиши зарур.

Умид шуки, Рақобат қўмитаси ва Антикоррупция агентлиги пойтахтда парковка монополиясини яратиши мумкин бўлган, белгиларига кўра аукцион деб аташ қийин бўлган бу аукционни тўхтатишади.

ОАВ ва фаол жамоатчиликни бефарқ бўлмаслигини сўрайман. Ўзи тепадан ҳам, пастдан ҳам, ортдан ҳам, ёндан ҳам монополист ва олигархлар томонидан таланаётганимиз етмаётгандек, яна битта монополист пайдо бўлишига кўз юмиб қараб туриш мумкин эмас.

Ниҳоят 80 шиптир учун потолок спред ўрнатилди

Рақобат қўмитаси 80 шиптир лақабли ёқилғи учун биржа савдоларида бошланғич нархга нисбатан 5%лик спред ўрнатгани маълум қилинмоқда.

Кечаги савдоларда 80 шиптирнинг тоннаси айрим битимларда қарийб 10,6 млн.сўмдан сотилган эди (ўртача нархлар бешинчи кун кетма-кет рекордини янгилаб, 10 180,5 минг сўмга етган). Бугунги савдоларда эса битимлар 9,3-9,4 млн.сўмдан ўтмоқда (нархлар ўртача 10%дан кўпга арзонлаган).

Аввал ҳам кўп бора таъкидлаганимиздек, потолок спред қоидалари бозор йўқлигида, бир тўда олигархлар ва монополистларнинг ўзбошимчалигига қарши фавқулодда, лекин вақтинча чора сифатида кўрилиши керак. Энергетик тўданинг ўзбекистонликларни талашга қаратилган монополистик занжирлари парчалаб ташланиши ва эркин, рақобатли бозорга етиш асосий мақсад бўлиши зарур.

Синовларни Бойсунда ўтказса бўлмайдими?

Импорт автомобиллар ва электромобиллар учун ўйлаб топган синовларингизни Пискентда эмас, Бойсунда ўтказинглар.

Ахир, импорт мошинлар одам, бетон ва темир дош бера олмаётган Бойсуннинг захарли ҳавосида синовдан ўтиши керак-ку.

Шунда бузуқ мақсадинглар ҳам осонлашади. Шунча яратган тўсиқларингга қарамай, импорт мошин олиб келишда давом этаётган одамлар ва мокки тадбиркорлар охири қўл силтайди. Муттаҳам монополистлар ва ўғри олигархлардан яна бир олқиш ва балки мукофот ҳам оласизлар.

“Ўликни деразадан эмас, мўридан чиқариш” ҳақида фармойиш чиқарилган мамлакат тўғрисида латифа борку. Ўша сизлар ҳақингизда. Сизлар ҳали кўп латифалар қаҳрамонига айланасизлар, чунки қарғашга сўз қолмади.

Бойсунда энди нима бўлади?

Газета Бойсундан навбатдаги репортажни тайёрлаган.

Шу ҳолга етиб келдикки, сўраб олмаса, эслатиб турмаса, талаб қилмаса, Бойсун ўзбек амалдорларининг эсидан чиқиб қолиши аниқ.

Бир думалаб ўзбек халқининг ер ости ва ер усти бойликларига эга чиқиб олган, триллионларни шопираётган кипрликми, швейцарияликми ё гонконглик инвесторларнику гапирмасаям бўлади.

"Хўжайиним шу “Энтер”да ишларди, беш ойдан бери пластигига ойлик ташламаяпти. Ойлик бермаганидан Тошкентга кетди. 5,7 млн сўм берарди – шунинг ҳам ярмини, уч ойда бир берарди. [“Энтер” турмуш ўртоғимнинг] маошини бермай, болаларимнинг ҳақини еб юрибди”.

“Ҳаммани овора қилди, сарсон қилди. Битта тайинли гапни айтса, “бўлмайди, кетинглар”, деса, одамлар мажбурликдан кетади, иложи борича. Топган пулимиз укол-дорига, йўлкирага кетяпти. Еётганимиз йўқ, болаларимизни кийинтираётганимиз йўқ”.

“На бир тезак қилганмиз, на бир кўмир қилганмиз – ҳали қишга тайёргарлик кўрганимиз йўқ. Уйга борсак газлаб қоляпмиз, қайтиб келсак уйдаги иш қолиб кетяпти”

Ҳудудларда гўшт пойтахтдан кўра қимматроқ сотилмоқдами?

Рақобат қўмитаси ҳудудларда асосий озиқ-овқат маҳсулотлари нархларини эълон қила бошлади.

Кўзга яққол ташланадиган жиҳат вилоят ва туманларда мол гўшт нархининг Тошкент шаҳридан кўра қимматлиги билан боғлиқ:

Масалан:

Карманада 70-85 минг сўм;

Бухоро шаҳрида 75-85 минг сўм;

Гўшт макони Қаршида 85-90 минг сўм.

Солиштириш учун, Тошкент шаҳрида мол гўшти ўтган йил октябрдан бери 60-70 минг сўм даражасида сақланиб қолмоқда.

Ўзбекистонда уйда ўтирган ҳолда асалари боқиб ҳам даромад қилиш мумкин

Ўзбекистоннинг деярли барча ҳудудларида асаларичилик йўлга қўйилган. Ҳозирги кунда эса исталган инсон уйда ўтирган ҳолда асалари боқиб даромад қилиши мумкин.

Мисол учун 1 та асалари оиласидан йилига ўртача 15-20 кг асал олиш олиш мумкин. Яъни, уй шароитида боқилаётган 10 та асалари оиласидан йилига камида 150 кгдан зиёд асал олинади.

Шунингдек, битта асалари оиласидан 3-4 тадан асал пакеларини кўпайтириб, 15-20$ экспортга йўналтириш ҳам мумкин.

Айта оламанки, даромад қилишни истаган ҳар бир инсон учун уй шароитида асалари оилаларини боқиб, бизнес қилиш ва уни кенг ривожлантириш имконияти бор.

Маълумот учун, ушбу роликда Туркия тажрибаси намойиш этилган.

Нукусда катта халқаро ярим марафон ўтказилди

Куни кеча Нукусда ярим марафон бўлиб ўтди ва бу Оролбўйида ўтказилган марафон сериясининг якуни бўлди. Марафоннинг мақсади — инсонларни сув ресурсларидан унумли фойдаланиш ҳамда экология ва атроф-муҳитни асрашга чақириш, шунингдек, Оролбўйи минтақаси аҳолисининг саломатлигини сақлаш ва худуднинг иқтисодий ривожига ҳисса қўшишдир.

Марафонда 2000 га яқин югурувчилар иштирок этган ва унинг мукофот жамғармаси 92 млн сўмни ташкил этибди. Иштирок этганлар орасида нафақат Ўзбекистон фуқаролари, балки Буюк Британия ва Шотландиядан келган меҳмонлар ҳам бор.

Ярим марафон жорий йилда Орол минтақасида ўтказилган тўртта марафон пойгасининг кульминацияси бўлди. Унинг доирасидаги муҳим воқеалардан бири Борса-Келмасда бўлиб, унда 11 мамлакатдан 250 нафар югурувчилар қатнашди. Орол минтақасида бундай йирик спорт тадбирларининг ўтказилиши жуда яхши.

Ярим марафон Экология вазирлиги, ProRun ва бошқа корхоналар томонидан ташкил этилди. Якунда, ғолиблар ва уларнинг мураббийларига тегишли пул мукофотлари берилиб, эсдалик совғалари топширилибди.

​80 шиптир нархида ҳар куни янги рекорд, нарх пойгасига 92 бензин ҳам қўшилган

80 шиптир тўртинчи савдоларда кетма-кет нарх рекордини янгиламоқда ва тоннасига 10 125,5 минг сўмга етмоқда. Максимумларда 80 шиптирнинг тоннаси 10,9 млн.сўмга яқинлашган.

Нарх пойгасига 92 бензин ҳам қўшилган. Кечаги савдоларда 92 бензиннинг тоннаси ўртача 11 978,5 минг сўмга етган. Максимумларда тоннаси 12,2 млн.сўмдан қимматга сотилган. Эслатиб ўтамиз, монополист Ўзбекнефтегаз АИ-92 русумли бензин нархини босқичма-босқич пасайтириш ишлари олиб борилаётганини эълон қилганди. Амалда биржада ҳам, шохобчаларда ҳам 92 бензин нархи кўтарилишда давом этмоқда.