——
دڵم تەنگە، وەکوو خونچەی دەمی تۆ
سەرم گێژە لە گێژی پەرچەمی تۆ
دڵ و گیان و ژیانم دا بە ماچێک
وتت پێک نایە، زۆری من، کەمی تۆ
لە چەشنی ئاگرن، کوڵمی گەشی تۆ
لە مار حەستەمترن پرچی ڕەشی تۆ
بڵێم وەک چی دەچی؟ هەر گوڵ دەزانم
لە گوڵ ناسکترە، ناسک لەشـــــی تۆ
لە گوارەی پڕ پەرەنگ دڵ پڕ پەرەنگم
چەماوی بەژن و باڵای شۆخ و شەنگم
لەسەر سینگی سپیت، چاوم سپی بوون
لە تاوی زەردە لیمۆت، زەردە ڕەنگم
کش و ماتە جیهان، لە ژوانی، لە نوێ
گەلاوێژ بۆمە دەڕوانێ لەسەر سوێ
چریکەی بولبولێک دێ، وا دەزانم
چپەی ماچی من و تۆی هاتە بەر گوێ
#هەژار#نەجمە_غوڵامی@SouranKurdpour