أُمبارح صادفني فيديو أجنبي متداول لأم بستأذن من الراجل الراكب جنبها في الطيارة إذا بيقدر يبدل المقاعد لإنو بتها بتحب تقعد جنب الشباك.. رد ليها الراجل بطريقة لطيفة وأداها درس قيم فقال ليها: أعتقد دي فكرة لطيفة، بس أنا شايف دي سانحة عشان تخلي بتك تتعلم إنو العالم بمشي بالطريقة دي: ما أي حاجة بتمناها المرء بيدركها مش أي حاجة بتتمناه بتحقق وهكذا قعد مكانو ورجع يقرأ في كتابو.. لوهلة حتحس إنو كسر بخاطر الطفلة مش فارق معاه يبدل المعقد عشان يسعدها.. بس كمان حاجة مهمة جدًا في تربية الأطفال لازم نوعيهم إنو ما اي حاجة عايزنها بتتحقق.. وأنا شخصياً ما بحب نوعية الأهل الشايفين إنو اي حاجة طلبوها أطفالهم لازم تتحقق.. وكمان بيزعلوا لو ما لبو لأطفالهم الحاجة العايزنها.. ما تخلي الطفل يقوم بشخصية إتكالية ويشوف إنو عندو إستحقاق ما أي حاجة بتتقدم في طبق من دهب.. عشان الأهل قدر لا سمح الله يختفوا وهم معودين اطفالهم على الحركة دي.. بنصادف النوع دا في المواصلات الطفل بتلقاه مركز مع حاجة عند الراكب الجنبو بدون أمو ما تقول ليهو كدا عيب.. وما تخت عيونك في حاجة ما حقتك.. أو لما تمشي ضيف لناس، أو يجوك ناس من أهلك عندهم اطفال بتلقاهم بتدخلوا في تفاصيلك أو بخربو ليك حاجة وأهلهم شايفين كدا عادي بحكم إنو اطفالهم وبالتالي إنت بتسكت وبتمشيها.. ربو عيالكم.. علموهم إنو اي حاجة عندها ضريبة ومقابل، حق الناس ما حقكم.. خلوهم يحترموا المساحات ويحترموا حقوق الغير.. الطفل بقوم بعقل خفيف الحاجة القام بيها بكمل بيها حياتو وهكذا. #محمد_ورق