Смотреть в Telegram
(تجلبيه للشباب)
عله وليدي ونيني وروحي مهدومه
يفز كلبي عله طوله وريحة هدومه
🌿🌿🌿🌿🌿🌿🌿
ويفز كلبي عله طوله و ريحة الحلوه
واسمعنه يناديني وادور عليه ماهوه
وتخيب اظنوني و اتعنه الصور عنوه
و يعتاب الصور حسرات مضمومه
عله وليدي ونيني وروحي مهدومه
🌿🌿🌿🌿🌿🌿🌿
الصور يبجن على حالي منَ اگلبهن
و مثل اخر نفس بالروح انه اشگهن
و الك يايمه من اشتاك انه اشبگهن
فت كلبي الهجر وجروحي ملجومه
عله وليدي ونيني وروحي مهدومه
🌿🌿🌿🌿🌿🌿🌿🌿
ومن ظيم الهجر ركدان حيل امك
وعليمن تنتجي وانت الكبر ضمك
وعمت عينه التراب الضعيه وجهك
بدر وجهك ييمه وضايعه ارسومه
عله وليدي ونيني وروحي مهدومه
🌿🌿🌿🌿🌿🌿🌿
بدر وجهك ييمه و ضاعت ارسومك
وبقت بس الصور تذكاري وهدومك
ماترهم يشمامه ابدل يومي بيومك
وعلي صعبه اظل يوليدي محرومه
عله وليدي ونيني وروحي مهدومه
🌿🌿🌿🌿🌿🌿🌿
يشمامه بوسط روحي ويلب احشاي
يغالي انت شكثر عندي بغلات الماي
لو ترهم يبعد امك تبدل موتتك وياي
و لا يبقى الكلب يبني بحزن دومه
عله وليدي ونيني وروحي مهدومه
🌿🌿🌿🌿🌿🌿🌿🌿
✍الشاعره ام زينب الحسيني
Love Center
Бот для знакомств